1 Johan 2:15b
Mi kuapeuh in
khovel a it leh, Pa a itna amah ah a om kei hi.
Hiai Bible tang in a gen ahihleh, mi kua hiam khat in
kisuanlahna hiam ahihkeileh zakta hetlou a khovel a it leh, huai minu/mipa in
Pathian’ itna a chiamkha ngeikei, chih ahi. Hiai Bible tang a kigen tuh a
chiang mahmah a, thildang daih gen hi ding ahi chih theihna a om kei hi. Khovel
it a, khah ut tinten loute’n Pathian itna a neikei uh chih tuh nial vuallouh
in a dik hi. Zum-le-zahna ding thei hetlou a, khovel angpom mite’ lungtang
sung ah Pathian itna a omngei kei himhim chih a kichian mahmah hi.
A lunglut huai, kithalawp huai leh a lamdang
penpen Pa Pathian itna chiamkha taktakte tuh khovel angsung ah baih samtak in
a tailut kei ding uhi. Pathian’ itna sung a kibualkha khinsate lak ah kua’n
ahia khovel it sawm a khelah tak a va ngaihtuahtuah ding? Huchibang mite khovel
in a etlawmna teng toh khempuk tum mahleh leng, huai dinmun ah nuamsaloutak in
a om ding ua, a hihkhelhna atheih phetphet chiang un Pathian lam hon zong
ngitnget ding uhi.
Pathian itna in khovel itna i lungtang a pan hon sawnkhe
ding hi. Hiai gel mihing lungsim ah kituaktak in a hingkhawm thei kei uhi. A
kituaklou Pathian itna leh khovel itna tuh, mihing khat lungtang in tun khawm
theilou hi. Khat zaw samsam a ding a ginom dia kichiamna tuh a khat zaw pen dou
ding a kichiamna ahipah hi.
Jesu’n Matthai 6:24 a gen bang in, “Kuamah in heutu nih
na a sem kop thei kei; khat hua in khat a it ding a; ahihkeileh, khat gum in
khat a simmoh ding. Pathian leh sum na nasem kop thei kei ding uh.” Jacob
4:4 a Jacob in khovel thil delhte ana tai hilh bang in, “Nou angkawm hatte
aw, khovel lawm hihna Pathian melma hihna ahi chih na thei kei ua hia? Huchi’n
kuapeuhmah khovel lawm hih ut tuh Pathian melma in a kibawl nak hi.” Pathian
lalgam toh hiai khovel lalgam a kidou gige uhi; hiai gel tuh chikmah chiang in
kituaktak in a omkhawm ngeikei ding uh. Huchi ahihleh, bang chi’n ahia Pathian
tate’n, Pathian toh kimelmate a it theih ding uh? Khovel mi-itna in khovel a
Pathian hote (God-haters) toh hon pangkhawm sak ding hi.
Gingtu khat, bang chi’n khovel in a matchip lam a kitheithei
dia? A kitheihna khat tuh, khalam thilte sang in leitung thilte’n nakpitak in a
lungsim luah zaw ding hi. Khovel mi-itna’n a suk khak gingtu khat tuh Pathian
nasep toh kisai ahih chiang in a lungsim lianlou ding hi. Jesu Khrist a ding
hiam ahihkeileh midang khat panpihna nasepna a om chiang in nasepna toh kisai
bang, gimna bang, sen-le-paite ah bang, thangpaihna bang leh atuamtuam te ziak
in heh leh phunphun in om ding hi. Gingtute toh om sang in khovel mite toh om
manpha sazaw ding hi. Pathian min a kimuhkhawmna (fellowship), thum
khawmna, leh thil tuamtuamte ah tel sang in khovel mite toh kilawmtakna leh
khovel thil a nopbawltheihna munte telzaw ding hi. Bang in na lungtang a
kipaksak zaw a- PATHIAN maw ahihkeileh KHOVEL?
Prabhudas Koshy- “365 Daily Exhortation from God’s word”
February 13 ni a pan kiletkhia ahi.
0 Comments