TANCHINHOIH PUANZAKNA AH HANGSANNA

 

TANCHINHOIH PUANZAKNA AH HANGSANNA

Matthai 10:24-33

“Nungzui a heutu tung ah a om kei; sikha leng a pu tung ah a om kei. Nungzui tuh a heutu bang a a hong om leh, sikha tuh a pu bang a a hong om tuh a hun e. Inn neipa bawn, Beelzibul a chih uh leh, a innkuanpihte tuh nak chihna tel un chia; Huaiziak in, amaute kihta kei un; langlou ding a sel bangmah a om kei, theihlouh ding a im leng bangmah a om kei hi. Mial a nou k'on hilh vak ah na gen ding ua; bil bul a na zak uh inn tung a tuang in tangkoupih un. Huan, sapum hihlum a kha hihlum theiloute kihta kei unla; Gehenna a kha leh sapum hihmang theipa kihta zaw un. Kawlgit nih dal dangka khat in a zuak zel uh hilou hiam? himahleh, a lak ua khat leng na Pa uh theihlouh in lei ah a ke kei ding. Na sam zangte uh nangawn leng sim vek ahi. Huaiziak in lau kei un; kawlgit tampi sa'ng in na manpha zaw uh ahi. Huchi'n, mite ma a hon gum peuhmah tuh, ka Pa van a ma ah ka gum sam ding. Himahleh, kuapeuh mite ma a hon ki theihmohbawl tuh, ka Pa van a ma ah ka kitheihmohbawl sam ding.”

THUMAPI

Missions nasepna ah Nang-tu om ding ahihdan theihsakna leh laulou a pang dinga hilhna ahi. 10:24-33 kikal khenpi thum in aki khen thei hi.

1.      Nungzuite’n a heutu zuih uh thuakna a koppih hi (24-25).

2.      Nungzuite’n tuh Soisatu a lauh ding uhi ahikei (26-27).

3.      Nungzuite’n tuh a tawptan a thukhen pen a lauh ding uh ahi (28-33)

Jesu Khrist in a Nungzuite Missions nasem dinga a sawl khiat lai a akiang uah a tuah bangbang tuak ding uh ahih dan leh huaite a tuah chiang ua bang chi banga hih ding, bangchi bang a om ding chih a hilhna ahi. Hiai hun ah Jesu Khrist kampau te leh a thupawt te’n bang gen ut nei hiam chih i sut suk ding uhi.

ETCHETNA

24-25 “Nungjui a heutu tung ah a om kei; sikha leng a pu tung ah a om kei. Nungjui tuh a heutu banga Hong om leh, sikha tuh a pu banga a Hong om tuh a hun e. In neipa bawn, Beelzibul a chih uhleh, a inkuanpihte tuh nak chih na tel un chia:”

            Hiai ah I Toupa Jesu Khrist in a Nungzuite tuh nasemtu dinmun (servant state) a om ahihdan uh a theihsak thakna ahi hi. A heutupa uh hichi banga a bawl uhleh, a nungzuite hiaisanga nuam zaw in a bawl kei hial ding uh chih a thuhilhna a etsakna thu a hon gen ahi. A hihna uh (Identity) tuh amah a kizom ngitnget ahih dan leng a theisak hi.

“Nungzui a heutu tungah a om kei; sikha leng a pu tungah a om kei.” I Toupa Jesu Khrist in hiai bang ziak a gen hi hiam i chih leh, a heutu pen in a Thuak leh a naupangte/Nungzuite’n a Thuak mahmah ding uh, enghou a amah a hou uhleh amau leng a tuak ngeingei ding uhi. Kuama’n tan nuam zaw leh deihsakna sangzaw na tang kei ding uh chih a genna ahi. Huchi ahih leh Jesu’n tuh ka thuak bangbang enghouna, kouna, sawina, leh daltu tuamtuam te tuak ngeingei ding na hi uh a chih na ahi.

“In neipa bawn, Belzilbul a  uhleh, a inkuanpihte tuh nak chih na tel un chia” Hiai ah “Belzibul” a chih pen tuh Philistia te pathian satanic idolatry toh ki mekmat khat ahi a, Jesu’n tuh dawimat pautheilou a hawl pawt laia (Matt. 9:34), Pharisaite’n Beelzibul thil hih theihna toh dawi hawl khia (Lk. 11:15) ahi chi in ana ngoh uhi; huai tuh Jesu dawipai Belzilbul ana chi uhi. Hiaiah “In neipa” a chih tuh Jesu amah leh amah aki gen na ahi a, Pharisaite’n a ngohna uh agenna ahi. Kei bawn Belzilbul hon chih uhleh noule honna chih lotel ding uh ahi chih a gen na ahi.

26-27 “Huaijiakin, amaute kihta kei un; langlou dinga sel Bangmah a om kei hi. Miala nou ka hon hilh vak ah na gen ding ua; bil bula na jak uh in Tunga tuangin tangkoupih un.”

Hiai ah i Toupa Jesu Khrist in dena a gen tengteng, a tuah ding te tengteng uh a gen khit in Hiai a hon gen hi. Huaite tengteng laukei un, lau hetkei un, Na tuah khak uh leh leng ka hon hilh te thei unla, tanchinhoih tangkou pih thouthou un a chi hi.

“langlou dinga sel Bangmah a om kei hi” Hiai ah i Toupa Jesu Khrist in bang gen ut hiam chi a i sut suk leh, thil bangkim, a sia hi in a hoih hita leh Pathian mai ah sel himhim a omkei, nasep khempeuh khatvei tei Pathian in a tung uah vaihawm ding chiin ana gen hi (Eccl. 12:14).

“Miala nou ka hon hilh vak ah na gen ding ua; bil bula na jak uh in Tunga tuangin tangkoupih un.” I Toupa Jesu Khrist apan thumal pawt “Miala ka hon hilh leh bil bula na jak uh” chih te’n bang gen ut hiam i chih leh, Jesu Khrist in a tanchinhoih mipi lak ah a tangkoupih hun om mah leh, a tamzaw nungzuite kiang sinsakna midang zaklouh a petam zaw chih a genna ahi. Gendan dang ah, “Huai mite zaklouh a kon gente, ka hon sinsakte, thu ka hon nutsiah te tun mite lakah genta unla, sel nawn kei unla puangzak ta un,” a chih na ahi hi.

28-33 “Huan, sapum hihluma kha hihlum theiloute kihta kei unla; Gehenna a kha leh sapum hih mang theipa kihtajaw un,”

Sapum hih lum thei a chih tuh mihing hiamgamna bang, Solkal in man a thah theihna thuneihna a neih uh genna ahi a, daltute genna ahi. Huaite lauh huai lou ahi uh, huai sanga lauhhuai zaw tuh Pathian ahi, sa leh kha that theipa lau zaw un a chih na ahi hi. Gehenna a tangtawn a hon gawt theipa lauzaw unla amah thupiak zui zaw un a chih na ahi. “Kha hihlum” Hiai ah i Toupa Jesu Khrist in bang gen ut hiam i chih leh Pathian’ Itna apa’n a ki gamlatna genna ahi. Huaituh “Mohpaihna”, a itna apa’n a mahmah in a hon gamlatna a genna ahi. Huaiziakin, sa lel that theia, kha that theilou i chih chiangin, Pathian toh i kizopna ua pan hon lamang theiloute lauh huai lou ahih dan agenna ahi a, Huai sanga lauhhuai zaw tuh, Kha sihna ahi a chi hi. Huaituh, a itna apa’n hon gamlat theipa Pathian; huai nak lauhhuai zaw ahi. Chih a genna ahi.

29-30 “Kawlgit nih dal dangka khatin a juak jel uh hilou hiam? Himahleh, a lak ua khat leng na Pa uh theih louh in lei ah a ke kei ding. Na Sam zangte uh nangawn leng sim vek ahi.”

Huai a kawlgit kizuakte Pathian theihlouh a a zuak uh hilou hi. Huai kawlgit te ngei leng Pathian in mattheih na dia phalna a piak kei leh kuaman kawlgit zuak di man theilou ding uh ahi a chihna ahi. Hiai in a gen ut tuh, Na Thuak ding bangbang uh Pathian in na tuah ding ua aphal ahi. Pathian phallouh a thuak lou ding na hi uh a chih na ahi. Pathian’ Lalna genna ahi a, thilteng amah vaihawmna nuaia tung ahihdan chetna ahi. “Na Pa uh theih louh/Apart from your Father (v.29)” Hiai in tuh Pathian theihna (knowledge) kia genna ahi kei a, I Toupa Jesu Khrist in, Pathian in thil i poimoh hun bangbang a hon piak, leh huaite enkai ahihdan hiai kawlgit apan gentehna a hon zang a, i luzanga samzang pou di nasan amah Lalpen Pathian’ deihna banga a koih ahi hi. Gendan dangah, thil neu chikchik ichih te ngeileng Pathian in a etkai, a seh, leh a thunuai ah a koihdan a genna ahi.

31-33 “Huaijiakin laukei un; Kawlgit tampi sang in na manpha jaw uh ahi. Huchiin, mite maa hon gum peuh mah tuh, ka pa van a ma ah ka gum Sam ding. Himahleh, Kuapeuh mite maa honkitheihmohbawl tuh, ka Pa vana ma ah ka ki theih moh bawl Sam ding.”

            Na Thuak dingte uh lau hetkei un Pathian venna (Providence) nuaiah om na hi uh, na haksatna,na thuakna, leh sihna na tuah uh lele Pathian phalna a thuak na hiu chih a genna ahi hi. “Kitheihmohbawl (Deny)” Hiai thumal tuh a tawp (final) genna ahia, Huaituh atawptana kitheihmohbawlna (Permanent denial) genna ahi. Huaituh mahni ginna taisante (apostasy) bang genna (1 Tim. 1:19) ahia, Peter in Jesu Kris aki theihmohbawl dante ahi kei hi. Hiai a kitheihmohbawl chi a gente tuh chikmah a Pathian toh kizopna neikhaloute lah thei te genna ahia, tangtawna amaute thuak ding genna ahi. Huaiziakin, huai tangtawn a na taksa uh leh na kha uh hihlum theipa lauzaw un, tangtawn gawtmun Gehenna ah hon that theipa lauzaw un, Gendan dangah, a Itna apan hon lakhe theipa lauzaw un achih na ahi.

THUTAWP

Huaiziakin i NUNGZUIHNA leh Gospel tangkoupihna ah, khovel deihdana pai lou a, Pathian hon thupiakte zui leh a tanchin hoih tangkou pih a, amah a dia ginom taka ikizat Pathian in hon phut ahi. A tunga i thu sut te tengteng Pathian in a hon nget ahikeia, a hon ngiat ahi. Huaiziakin, Haksatna mun ah, douna tamna ah, leh hinna na ngawn tan na ding mun aleng Pathian thute a hi bangbang a gena, ahi bangbang a i hinpih ngeingei ding ahi. Jesu’n tuh tanchinhoih i tangkoupihna leh nungzuihna ah i tuah ding ana thei mahmah a, huaiziakin, a nungzuite a sawlkhiat in “Laukei un/kihta kei un” chih a hahzat mahmah hi. Hiai in a hon sinsak nop tuh, i tuah dingte thuak ngap ding leh Pathian khazaknuai ah ki tuk lut ding ahihdan ahon sinsak hi.

Munga Guite

Young Reformed