TETELESTAI (Zoh ahi ta)

1. THUMAPI

‘Good Friday’, hiai ni bang ni ahia? Bangziak a Christian te a dinga hiai ni kipahni hithei hiam? Mihingte a dingin bang hamphatna a hon tun a?

I lal leh Hondampa Jesu Krist in leitung a, A hong painasan A zohni theihgige na dinga Christian masa te’n hunbi ana seh uh, tu 2023 kum inleng i tung nawnta ua, Toupa min phat in thupina tengteng Amah i pia uhi. Hiai ni hotdamtate a dingin kipahna ni ahi a, Jesu Krist hong sihna theisiamlou te a dingin bel thil haihuaipi ana hithei mawk hi (1 Cor 1:18). Ahihhang in, mikhialte tatkhiakna dinga Jesu hong sih tuh kul leh poimoh ana hi a (Heb 9:22), Pathian a kipan a deidan na omlou hehpihna hong kilatna leng ahi. Hotdamtate a dinga nan-vuallouh Pathian’ hehpihna a hong kilatkhiakna leng ahi. (John 6:37-40; Titus 3:5; Eph 2:5,8; Rom 5:10)

Hiai laigelh saulou a kipan in, Jesu’ kampau ‘Zoh ahita’ chihleh Jesu hong sihna tungtawn a mikhialte’n hamphatna i ngah uh tampite lakah chi thum kia iki kum ding uhi.

2. ZOH AHI TA

Zoh in om a, zoh zom lai leng ahi ding hi. Jesu’n Kros tung a a thugen sagihte lak a khat tuh hiai thumal “zoh ahita” Greek pau in "Telestai" ahi. Jesu’n bang ahia a zoh? Jesu’n ‘zoh ahita’ a chih in gen tampi neithei hi.

Khatna ah, Jesu Krist thumanna pulakna ahi. Jesu Krist kampau mahmah a kipanin, thumangtak a A sawlpa deihlam sem ahihdan a chiang hi (John 6:38). Jesu Krist hong thuakna leh Kros a hong sihna a kipan in, A ginomna leh thumanna a muhtheih hi. Pa’n ana sehsa (Gen 3:15) A thuakding bangbang thuakzouta ahihdan hon pulak hi (Luka 24:44-47).

Nihna ah, tatkhiakna nasep zohna pulakna ahi. Mahni kihondam theilou mikhialte a dingin a Siangthou Pathian mai a siam i tan theihna dinga Jesu Krist Siampulian a hong pang in thupha hon tawisak hi (Heb 2:17). Amah sisan ziakin I khelhna te ngaihdam in omtheita hi. Hiai tatkhiakna nasep zouta ahi chih pulakna inleng a gentheih hi.

 Thumna ah, Jesu tungtang a genkholhnate zohna puankhiakna inleng a gentheih nawn hi. Messiah hong pai ding, hong thuak ding, mikhialte khelhna ziak a hong si ding, chi a genkholhna tuamtuam Thukhun Lui a i muhte tengteng zoh hita ahih chih pulakna leng ahi.

3. Mikhialte Hamphatna

 Jesu Krist in Kros tung ah tatkhiakna nasep a zohtak ziakin mikhialte a dingin hamphatna tampi i ngah ua huaite lak ah tamlou kikum lehang i chi hi.

 3.1. Pathian lungkimna

Jesu’n i khelhnate ziaka ahong sihna in, Pathian a lungkim sak hi. Pathian’ hehpihna hau i khelhnate thupha tawina dingin Christ tuh a hon luikheta hi (Rom 3:25). Mikhial in a tan ding tuh sihna hi ahi(Rom 6:23). Pathian pen amah leh amah kitheihmoh bawl theilou a, zuau thei ngeilou ahi a, ginomgige ahihziak in, A dan bawl bohsia in, mikhialte a khelna uh ngaidam chih hithei mawklou hi. Mikhial siamtansak leh ngaihdam a omtheihna ding in kithoihna ana ngiat in, sisan suahlou in ngaihdamna a omtheikei hi (Heb 9:22). Hiai kithoihna latding himhim dembei ahih ngai sese hi (Exo 12:5; Lev 1:10; Lev 22;20). Huaiziak in eite a ding in khelhna theingeilou himhim, dembei Pathian tapa Jesu Krist hong si hi. (2 Kor 5:21; 1 Pet 1:19). Hiai in Pathian a lungkimsak in, Jesu’ tatna kithoihna setdet theih hi.

3.2. Khelhna sal apan suahtakna, Hinna thak neihna leh Pathian toh kizopna

Hotdamtate a ding in i hamphat nawn na uh bel khelhna sal a i tanna a pan suahtakna ahi(Rom 6:7, 18, 22). Huai tuh zalenna chi in leng a gentheih hi(Galatia 5:1, 13; 2 Kor 3:17). Hiai khelhna a pan suahtakna I neih ua kipan in, hinna thak i nei ua(2Kor 5:17), huai a kipan in Pathian toh ikal kilemlou pen kilemsak thak in a hong om a, huchiin hotdam tate’n Pathian toh kipolna nuamtak (fellowship) i neithei ua, kipahna bukim i neithei uhi (1 John 1:1-4).

4. THUKHITNA

Mi tampi te lungsim ah, Good Friday a kigen chiang in Jesu’ sihna leh thuakna lungsim a, aom lai in(hiaite a dikkei chihna hilou in), nang leh ken hiaini pen Jesu vualzoh nani ahi chihthei ni chi in ka hon ngen ahi. Huai in lametna a honpe ding a, hiai lametna Amah a nei le, lungmuanna leh lugnopna (Peace & Comfort) hon tun ding a, huai lungmuanna in tangthupha genna leh i niteng hunzatna ah nasatak in honpanpih zou ding hi. Jesu sihna in mihing a ding in hamphatna i tanvuallouh tampi honneisak a, huaite hotdamtate a ding in hatna ahi. Hiai laigelh ana simkha peuhmah in tu i hunbi zat a kipan in Lungnopna thak, kipahna thak leh Lametna thak (lametna hing) hon pe chiatleh chi in deihsakna sangpen ka hon khak ahi.

DK Siam

Young Reformed