GINGTUTE LEH I THIL GINTAK

 

Gingtute Leh I Thil Gintak

Mihing khat ihihna ah thilkhat peuhmah gintak ding leh gintak louh ding ei deihtel na ah kinga liuliau hi. Huai kawmkal ah, thilkhat peuhmah kimawk gintak lou a, ngaihtuah na seng zen in ki hisap masa hi. Huaikia le hilou, hun paisa te khawng sut masa in, tu lel lel a thu-omte  bang ngaihtuah kawm in leh mite ngaihdan te lakhawm kawm in thilkhempeuh ah hiaite tungtawn in gintak ding leh gintak louh ding mihing in thutanna kibawl hi. I thil sui/ngaihtuah toh kisai adikna ahi chih chet theih na ding, aziak atam chiang in kigingta pan tangpi a, huaiban ah a thunung-thuma kingakna thamlou I sak chiang in ki gingta ut khol lou hi. Huai ahih na ah, I gintak vanglak tuh mite chiangtak a pesawn thei di hial khop in kitheichian hi. I thil gintak in I hihna a genkhiat kia hilou in I hihna gentu ahih man in, I thil gintak ah I chitak mahmah ua, I poimoh ngaih mahmah uhi. 

 

Leitung thil toh kisai a hichituk a I pilvan lai un, ei pawl I lamdanna mahmah uh khat ahih leh, Jesu Khris kigingta in ahih hang a thei chian taktaklou te kihi hi. I theihchetlouh pen uh thutuam in koih zozen phot le, I gintak pen dik taktak mah hia ahih kei leh dik taktak lou chih chiang nasan sui peih lou, sui ngaplou a omte kihi lai hi. Zuau khawng ana hi zenzen khata mawk leh I buai didan u tuh ngaihtuah maimai di le a ngaphuai kei top. Jesu hihna tengteng zaw suikhe zoukei mah ni, ahih hang in, hiai leitung ah hongpai kha nana tuh muhtheih thil hiam ahih kei leh gelh thoh thil hiam bek ah, hong pai taktak na a hi, chih chetna om ding hi (Laisiangthou polam ah le). En Laisiangthou I gintak ziak in Laisiangthou in gen hiven kichi thei a, Laisiangthou gingta (nailou) te a din Laisiangthou polam, historical proof hiam ahih kei leh Archaeological proof a om kei leh Jesu Khris pen gintak haksa sa mahmah thei uhi. Huai ahih ziak in, gingtu ihih na ah I gintak kawmkawm in, a sung a thukigelh te thudiktak ahinahiam chih I zonkhiat uh kiphamoh petmah hi.

 

Hunlui lam sui mite’n, nidang lai a thiltung khempeuh, a taktak a tungna ahi chih a chet theihna ding un, historical leh archaeological data te ana zang tangpi uhi. Historical leh Archaelogical data ana omlou te hun paisa a thiltung taktak mah ahi chi’n pom kichian ngam lou uhi. Huchibang ahih chiang in, ei Christian te’ gintak Jesu pen, Historians te leh Archaeologist lam te’n leng naktak in ana sui ua, dikmah ahi chih chetna ding in thil tampi, Jesu toh kisaikha thilte ana musuah taktak uhi. Huai a thil muhkhiat un a ginna uh det dou sak a, huaizoh chiang in Jesu pen muanzawk, belh zawk in nei ua, amasa sang in kinaizaw uhi.

 

Ahih hang In eilam te’n, ‘ka gintak pen dikna ahi’ chih nasan zon khiat sawmlou in, Laisiangthou toh kisai a lunghimoh na aom chiah ‘gina mah hi poimoh’ chi kang kang in, a taktak in en di hile gina neilou khawng ana kihi zomahlai ding hi. Poi thei lotel. Hiai ziak khawngmah ahi de aw Christian maimai itam uh? I gintakpen uh I chetlouh ziak uh. Midang, I thieh ngei hetlouh toh kinaitak a kithuah chih pen haksa mahmah a, a hitheilousim khat le ahi hi. Huaiziak in mi tamtak te’n I gintak Jesu pen I suilouh ziak, I theihtam louh ziak, I houpih tamlouh ziak ua Jesu toh kinai tak a hingtheilou aki hizaw diam? I gintaklouh ziak hi pah zawlou in. Jesu toh kisai I theih tamlouh ziak ua Christian maimai kitam ahi zaw diam chih ngaihdan hong om hi.  

Philip Vander Elst (Oxford Graduate 1973) te lawi, C.S.Lewis (Oxford Graduate 1925 and professor) te lawi, Lee Strobel (journalism degree from University of Missouri and a Master of Studies in Law degree from Yale Law School) te lawi bang a tunglam in Athiest ahi ua, Christian te gintak Jesu pen a taktak mah hia chih zon chihtak a azon nung ua, atakmah ahihdan mukhia a, Christian hongsuak te hi uhi. A gintak pen uh bangtan hiam ah thei kichian mahmah ahih man un Pathian mizat mahmah te hong hi zeel uhi. Ei singtang mite’n ‘lai siam in siamkei lele, pil in pilkei lele Pathian in hon zangthei ahi’ chih ngaihdan I neih pen khenlam uah I om uh hunta hi. Om maimai na ding leh suanlam dia ihah zatluat ziak un Pathian toh iki naih ding hon dal mahmah hi. Pathian in a siamlou pen zong tel mah e, ahih hang a siampen te zong tel veve hi. I theihna tantan, I hihtheihna tantan ah Pathian in hon zang hi tangpi ahih man in, Pathian in a deihtawk a honzat theih na ding in ei mihing lam apan in zong eima hihtheih teng ginomtak leh chitak tak a ihih kisam hi. Samuel leeds in, (“Do the Possible, watch God do the Impossible”), Mihinglam a pan aki hihtheih teng semkhia inla, mihing thil hihna apan a ahitheilou te Pathian in asepkhiat ana en in chi hi. Pathian I muandan uzong dik a diklou khin khat om hi. Ei mihing lam apan bangmah lah sep tatak sawmlou, Pathian sep di kia ngak a ingak thoh chiang un, I muan zia uh dik khinlou hi. Hoihtak in en vengveng le, huchibang hun te ah Pathian in le bangmah hon sepsak khol lou hi.

 

I gintak pen, I gintak pa, theih sawm a suitaktak kan a hoih omlou ding hi. Gintaklouhna dia sui hilou in, gintak zawk na ding,  Pathian toh kitheihzawk sem na ding leh amah I it theih zawk sem na ding a I zon ding uh ah hi. I theih chet louhpi mihing in ki it thei ngeilou hi.

 

Laisiangthou toh kisai a thu buaihuai khenkhat kuahiam khat in Pastor te kiang hiam, upate kiang hiam ahih keileh heutu khenkhat te kiang hiam a adot khak chia, Bible gingtalou khawng hisak pah mawk. A dawnna zaw om ngial di hiven, kimtak leh diktak ahih louh tawp inle akitheisiam di tan bek a dawndan omkha ding hi. I theihlouh tawp inle, hiai toh kisai ka thei sau kei, hiai book ana sim in chihtan bek gentheih kiphamoh mahmah ta hi.

 

Tulai khangthak telak ah Atheist tamgawp chi in mohtangsak mahmah. I naupang te’n Laisiangthou toh kisai a buaina aneihte uh amau lungkimnatan a dawnna I piaktheihlouh ziak ua hichitan tungkha uh ahi zaw de aw? A ziak taktak en di chi le’ng a dawnna I zak ngam taktak uh gintak huailou hi. Achenkunju Pappy in “Stepping stones to the Brahma Kumaris” chih laibu a gelhna ah Christian te toh kisai hichi’n ana gelh hi, “In a class-oriented, stratified culture, Christianity gets stigmatized as the religion of non- thinkers”  hiai a athilgen pen bangchi leh Brahma Kumaris te lak ah Christian te’n Gospel kitangkoupih thei ding hiam chih agelhna a agenkhak ahi. Brahma Kumaris te pen simna leh theihna ngaina mi, middle class leh high class, educated pipi ahi uh a, a bawng bawng (class system) a kikhen te a hi uhi. A bawng bawng a kikhen tawndan zuimite lak ah Christianity, ngaihtuah saulou mite’ gindan pen khangtheilou hi, ana chitep a, Christian a tamzawtham te hon theihchet dan kilang chian hi. Gam khangtou mahmah ah dingta, siamna san namah mun ah dingta ihih man un ginna chouh poimoh nawnlou a, I genpen ngentel tak a theih zong hong kiphamoh petmah ta hi. Vangam kaina ding in Ginna kia zong hun a, ahih hang in Midangte Jesu thu ihilh theihna ding in ginna kia hun nawnlou hi. Christian hinkhua pen, gahkhia hinhua hidia Pathian in hon siam ahih man in I gah khiat theih nang in a zung chouh poimoh lou a, a kahiang te zong poimoh petmah hi.

 

Sunday school laa khat in, Jesu thu thei semsem le’ng ilung nuam semsem ana chi a, dik isa chiat uhi. Jesu thu I theih semsem na di’n “ka gingta hi” chih tan ah khawl mai theih hi lou hi. I gintakna khel ah I sutbeh (research) ding tampi om hi. Jesu toh iki naihsem na ding in thumna toh I sui beh ding poimoh mahmah a, mite kiang ah I genchet theihna ding in theih tam poimoh mahmah hi. Huaiziak in gingtu ihihna ah, I gintakpen I theihchet kan a hoih omlou ding hi. Huai ding in pan lani. Pilna teng, theihna teng, theihsiamna teng I biak Pathian kiang ah om ahi chih I gintak ngal leh a bemi, eite’n le’ng “kenle neithei di kahi”, chia ei lam apan bawltheih teng I bawl ding uh poimoh hi. Pathian in amah zong a theichian sem ding in hon vualzawl hen.

 

1 Peter 3:15-16a

A hihhang in na lungtang uah Khris tuh zahna toh Toupa in nei unla; noumau a om lametna thu, aziak hon dong peuhmah nunnem tak leh zahtakna toh dawng ding a mansa in om unla, sialepha theihna siangtak nei un.

Gelhtu: Liansuanthang H