Jesu Khrist Nungzui Tuailai Hinkhua

I kim leh kianga thiltungte, mimal/saptuam a i maituahte leh challenges tuamtuam i maituahte ziak un Jesu Khrist nungzui tuailai hinkhua bang hihiam chih nangawn hon ngaihtuahsak lou ahi de aw i chi hi. Paul in Kolosa saptuamte kianga a laikhak 2:6-8 pansa anei in Lai Siangthou mun dang khenkhat la in tuailai Khrist nungzui hinkhua kikum in mahni ki-en chiat lehang i chi hi.

Kolosa saptuam tuh Apostle Paul in phutkhiak in khatvei mah leng veh kha kei mahleh [aseppih Epaphras (Epaphroditus) phuhkhiak] aseppih Epaphras apan report a zak gige ziak in laithon poimohtak a khak hi. Paul in Kolosa saptuamte―paukamsiam a kuaman a khem zohlouhna ding uhleh Khrist a na ginna kip ziaka kipak (2:4-5) ahihdan agen zoh Khrist nungzuite hinkhua ua thilhihte agen hi. Jesu Khrist nungzui tuailai in hiai anuai a thil poimohtak ahih uhi.

 

1.     Khrist Jesu a Lal leh Hondampa in Apom uh:

A tunga Paul in a gente toh kizom in “huaiziak in” (therefore) chi’n a hon pan hi. Huaiziak in, “Ngah/tang /pom” (received-Aorist) uh “Khrist Jesu Toupa” (Christ Jesus the Lord) a chi hi. Hun khat lai a, Epaphras in Kolosa saptuamte kiang a Tanchinhoih ahon gen na pom uh agen hi. Thumal poimoh: Khrist Jesu―OT (Thukhunlui) lai apan Judate’n ana ngak uh Messiah/Khrist ahihleh Jesu ahi. Amah Toupa omsun (the) ahi a, na pom leh na san khitsa uh ahi. Toupa, i hinkhua a Jesu lalpen/toupen, thuneipen/control tu chihna ahi. Amah thunuai a kitahlutna ahi [ Huai hun lai in, Jesu Messiah/Christ hihna Judaism te’n nial, Jesu mihing hihna Docetists te’n nial, Jesu Lalpen/Tou pen hihna nial a tam mahmah].

Jesu Khrist nungzui tuailai/gingtu hihtheihna ding in, Jesu Messia i khelhnate ziaka i sik-le-tanga Khros a hong si a nithum ni a thounawn chih i gintaka i pom a poimoh hi. Jesu Khrist a hotdamna tuh Amah zuihna dinga a turning point or ticket ahi. Jesu Khrist nungzui tuailai in tuh Khrist ah hotdamna diktak anei ua, khelhna apan suahtakna a ngah uhi. Hotdam na hita hia? Na hih keileh Jesu nungzui na zui zou kei dinga, huan, na zui thei kei ding hi.

 

2.     Khrist Jesu toh Tonkhawm uh:

Jesu tuh Messia/Khrist a na pom uh, na hinkhua ua lalpen dinga na san bang un, Amah toh tonkhawm un chi’n Paul in Kolosa saptuamte kiang ah agen hi. Jesu toh tonkhawmna ahihleh Jesu gente, sinsakte, leh nasepte pom a zui chihna ahi. Sinsakna dangte’n a suling zou kei uh. Gendan dang in, Khrist toh pangkhawm, ki-control sak leh kigawmkhawm chihna ahi. Hindan (lifestyle) Jesu a toh a kibat ding chihna leng ahi. I Johan 2:6, “Amah ah ka om gige chi mi Amah a om bang in a omsam ding ahi” a chi hi.

Khrist nungzui tuailai hinkhua tuh a zuihpa uh toh niteng in a tonkhawm gige ua, khagah agah khia uhi (Gal 5:22-23). Khrist toh tonkhawm theihna ding un, Lai Siangthou sim in sut (meditate) gige ua, tawplou in a thum gige uh (I Thes 5:16-18). Phetlou in, gingtute kithuahkhawmna (fellowship) a ngaipoimoh uhi. Social media ah ahun tamzaw a zang bei kei uhi. Kumzabi 17^th/18^th hun a niteng a George Whitefield 3hrs leh John Wesley 4hrs meditation nei gigete a ettontak mahmah uhi.

 

3.     Khrist Jesu a Kibulphuh/Zungkai & Kilamtou uh:

Khrist Jesu lal leh hondampa dia na pom ua, Amah nasep leh sinsakte Epaphras in hon sinsak leh hilhte’n Khrist a zung akaih bang in noute leng Khrist Jesu ah zungkai in om gige un chi’n Paul in agen hi. Khalam vakna, khanna leh gahsuahna ding in Khrist tuh a nak/source ahi.

Huan, Jesu Khrist toh tonkhawmna gah tuh Amah a kilamtouhna ahi. Khrist a lamtouhna tuh Amah batna ahi. Lamtouh ahihleh present participle ahihman in Amah ah lamtouh a om gige ding chih a ensak hi. Pathian’ thute in Khrist ah hon kilamtousak hi (Nas 20:32). I Toupa Khrist Jesu leh i hondampa theihna in khandan dik a khang in hon lamtou hi (2 Pet 3:18). Khrist nungzui tuailai in a nasepte, Pathian thu theihnate (theology), a khovel muhdan (worldview), leh leitung siamna-le-pilna (philosophy)-te Khrist ah a kibulphuhsak in a lamtouhsak hi. Huai ding in, Lai Siangthou a sim gige hi.

 

4.     Khrist Jesu a Ginna Hihkip uh:

Khrist Jesu a kibulphuhna in khalam khanna tun in ginna a hihkip hi. “Hihkip” (established) passive voice in Pathian in ginna hihkipsak ding chih a ensak hi. Gingtute a ding in Khrist toh tonkhawm a ginna hihkipna tuh a lou theilou ahi. “A hon zilsak bang un” sinsakna dang hilou, Tanchinhoih Jesu’ nasep leh sinsakte ahon kisinsak bang in… a chi hi. Paul in Kolosate kiang ah Khrist Jesu ah na ginna uh hihkip semsem un chi’n a hanthawn hi. Khrist nungzui tuailai in Khrist ah a ginna ahihkip zel a, huai ding in Lai Siangthou sim in a sut hi. Pathian’ thu Khrist’ thu a theih semsem chiang in a ginna hihkip in a om semsem hi.

 

5.     A lungtang uh Kipahthu Genna in Dim uh:

“Dim” present active voice in kuapeuh Khrist a kibulphuh a, Amah a lamtouh a omte, ginna hihkip a om ziak in, na lungtang uh Pathian tunga kipahna luanglet in kipahthu gen gigena atun chih a ensak hi. Paul in Pathian in Khrist Jesu a eite a dia a nasepte ziak a Khrist toh kizopna neita i hihman un kipahthu gen gige un chi’n Kolosa saptuamte kiang ah hanthawnna thu agen hi.

Khrist nungzui tuailai in Khros a Jesu’ hotdamna nasepte, a hinkhua a Pathian’ vualzawlnate, leh Pathian’ venna leh kepbitnate ziak in kipahthu agen gige hi. Kipahdan theilou tuailai tuh a hehpihhuai tuailai ahi. Pathian kianga kipahthu genna di mulou tuailai tuh Khrist nung a zui taktak kei chihna ahi.

 

6.     Khovel Pilna a Khemzoh in a Om kei uh:

Paul in Colossae saptuam kiang ah khovel pilna leh suangtuahna diklou khem zoh in om kei un chi’n agen suk hi. Paul in philosophy tuamtuamte a dem kei, himahleh huai hun lai a sinsaktu dikloute’n Kolosa saptuamte a tokbuai uhi; mihing thugousiah (human tradition), leitung thubulte (elemental spirits of the world- identified as air, earth, fire and water; such as evil spirit, having higher powers), Khrist dungzui/deihdan (not according to Christ). Angel biakna leng a om hi(2:18).

Khrist nungzui tuailai tuh khovel a worldview tuamtuamte a kikhem zousak kei ua, Lai Siangthou toh kituak hihiam chih a zongkhe zel uh. Midangte guptuam neitak a (biased political ideology) sinsaknate kikhempuk saklou in, tuailai sung ah division leh groupism a bawl kei uhi.

 

7.     Khelhna That/Taisan:

I Korinth 6:18, “Zahmoh thangzatna taisan in…” Taisan-Present imperative active. Taisan, topsan teitei ding. I Tim 6:11, “…nang Pathian mipa aw, hiaite taisan inla (hauhsak utnate, siatna leh manthatna a mihingte kailut haihuai tampi leh liamsakthei taksa utnate, sum deihtaknate vv. 8-9), diktatna, Pahtian mitna, ginna, itna, thuakhatna leh nunnemna delh in” a chi hi.

Khrist nungzui tuailai in kingaihniamna hinkhua zang in, niteng in khelhna taisan phetlou in a that zel hi. Potipher zi in tangval melhoih leh thahat Joseph luppih a sawm lai in Joseph in taisana lohsam hi. Himahleh, kumpi David in khelhna a hinkhua ah a samlut hi. Khelhna na taisan hia? Or khelhna samlut/delh in na buaipih nilouh hia? Huan, Jesu nungzui tuailai in sex ahihkei ua, pornography a en kei ua, vuaktang lem/video a en kei ua, sexy tak in a ki-dress kei ua, filthy talks; f**k, etc., a zang kei ua, nek leh dawn tep leh muam a hihkei ua, mi siatna di agen kei uhi. Nang bang category ah na om a? Kivelchian in!

 

8.     Diktatna Lunggulh in a Dangtak uh:

Matthai 5:6, “Diktatna lunggulh a gilkial a dangtakte a hampha uh, tai ding ahi ngal ua.” Khrist nungzui tuailai in diktatna a lunggulh. Nekguknate, golhgukna, leh diktatlouhna himhim a kipahpih kei a, hih leng ahih bok kei hi.

Khrist Jesu nungzui tuailai hinkhua zang hi’n na kithei hia? Na kitheih a ahihleh hoih lua Khrist bang sem ding in hong khang in. Na kitheih keileh pan nasatak in hon la in kikhel nailou ahi.

 

Gelhtu,

Kapsuanmung

youngreformed@2024