HOTDAMNA
DINGA KHA HIHHINNA
(The doctrine of Regeneration)
1.
Pulakna
(Introduction)
Sinsakna
diklou apan kivenna ding, Khrist i batsemna ding, Pathian toh i kinaih semna
dingin thugin dik sinsakna alou theilou ahi. Lai Siangthou (LST) ah tanchinhoih
puanzakna ding kia i mukei ua, taihilh leh sinsak un chi a thupiak leng i mu
uhi (Matt. 28:19-20; 2 Tim. 3:16). Hiai banga thupiak sinsakna gingtute mohpuak
leh saptuam dik chiamtehna ahi.
Mikhial
tangtawn meidil pai dingte Pathian’ itna leh hehpihna ziak kia a, Kha Siangthou
tungtawn a hihhinna thugin; bang chidan a hong kipan a, bang teng hon hihhing
ahiam chih saulou in i kikum uhi.
2.
Hihhinna
thumal hilhchetna (The Definition of Regeneration)
Hihhinna
(regeneration) thumal tuh khalam pianthakna, khalam hihsiangna, khalam siamthakna
leh khalam thohnawnna genna ahi. Lai Siangthou Thukhun Thak ah “hihhinna” Greek
paubul “palingenesia” mun nih Matt.
19:28 leh Titus 3:5 ah muhtheih hi. Himahleh, hihhinna tuh tunglam apan pianthakna
(born from above, born again, born of God or born of the Spirit) genna in mun
bangzah hiam ah zat in a om hi (John 3:3–13; 1 John 3:9; 4:7; 5:1; 1
Pet. 1:3, 23; Titus 3:5).[1]
Thukhun
Lui ah “hihhinna” thumal om chetkei mahleh genkholhna kigente; siamthakna,
thukhun thak leh Kha sungbuakna chihte in a kok kha hi (Isa. 65:17-25; 66:22;
Jer. 31;31-34; 32:38-41; Ezek. 36:25-28; 37:1-14; Hos. 6:1-2; Joel 2:26-32).
3.
Hihhinna
poimohna (The Necessity of Regeneration)
[Sunggil
a sapna (internal calling) toh Hihhinna akinaih mahmah ziakin theologians te’n
a masa ding chih logical order genkhawm mahle uh, hiai gel Kha Siangthou nasep
ahihman in a kikhen thei kei hi].
Polam
sapna (external calling) hotdamna dingin a bukimlouh ziakin mikhialte’n sunggil
a, aphatuam sapna (efficacious calling) hotdamna tun teitei ding sapna apoimoh
hi (I Cor. 1:23-24; Rom. 11:29). Mihingte tuh khelhna ziaka khalam a site (Eph.
2:1; 2 Sam. 5:8), i pianken khelhna ziaka khalam a misi (spiritual corpse), kha
thilte semthei nawnlou leh Pathian dawng kikthei nawnlou (tangpi nasep hoihte bel i semthei uh), tangtawn gotmun pai dingte i
hi uhi.
Khelhna
in i taksa pumpi a kahiang tuamtuam (faculties); kha, taksa, hinna, lungtang,
sia-le-pha theihna leh lungsim niinsak/sesak vek hi (I Cor. 2:14; 2 Cor. 4:4;
cf. Rom. 1:21-22; Rom. 3:23; Eph. 2:1, 5; Eph. 4:17-18). Titus 1:15 in,“… alungsim uh sia-leh-pha
theihna him uh leng aniinta” a
chi hi. Jer.
6:10 in, “Bil zeksumlouh ahi ua, angaikhe
thei kei uh” a chi hi. Jer. 17:9 in, “Lungtang
bel thil tengteng sang in khemhat pen hoihlou pumlum ahi…” Romte 3:10-12 in,
“kuamah midik himhim om kei uh, khat lel
leng a omhet kei uh, kuaman theisiam himhim a om kei uh, kuamah Pathian zong himhim
a om kei uh.. kuamah thilhoih hih himhim a omkei” ana chi hi. Khelhna ziaka
siagawp dimdemte’n hotdamna i neihtheihna dingin aphatuam sapna tungtawn a
hihhinna i poimoh uhi.
4.
Hihhinna
pantu (The Author of Regeneration)
(i)
Hihhinna;
Pathian leh mihing nasep ahi (Both Synergistic and Monergistic):
Hotdamna
dinga Pathian in nasem masa himahleh, ei mihing lam apan i gintak a i sang/pom
(accept/response) ngai chih ahi. Hotdamna dingin Jesu na pom ding, thupukna dik
na lungtang a na lak ding, huchiin hihhin in na om ding chih ahi. Hiai tuh Pathian
in hotdamna thilpiak i sang/pom leh i pom utlouh ah kinga chihna ahi.[2] Na hotdamna ding nang a
kinga chihna a suak hi. Hiai sinsakna tuh Arminians sinsakna synergistic regeneration
(cooperate) ahi.[3]
Himahleh
Khalam hotdamna dingin ei mikhial, lungtang, kha leh sia-le-pha theihna nangawn
niinte’n thupukna la in eimah pianthakna ding nasep i nei theikei himhim uhi. Mihingte
khelhna a si, khelhna sal a tangte’n khalam hihhingna nasep i hih theikei himhim
uhi (Eph. 2:1-3). I Cor. 2: 14 ah, “Khovel
mi’n Pathian Kha thilpiakte a sang kei nak hi, amah ngaihdan in haihuai ahi
ngal a, kha a theihchet ahihziakin a theithei kei himhim hi” achi hi.
Jesu
leh Nicodemus kihouna John 3:3-8 ah chiang mahmah hi. Huih a ut nana ah a
nunga, a ging na za hi, himahleh koi a kipan a hongpai ahia, chih na theikei
uhi. Hiai bang ahi kuapeuh Kha a piang (John 3:8) a chi hi. Pianthakna dingin i
sia-le-pha theihna tungtawna thupukna dik laksawm a hotdamna ngah sawm i hihleh
LST in a gen, “Hehpihna ziaka ginna
tungtawn a hotdam na hi uhi, huai leng nou mau a suak ahikei, Pathian thilthawn
piak ahi. Huchiin kuapeuh in a kisaktheihpih louhna dingin (Eph. 2:8-9)” chih
kalh in “hehpihna ziaka hotdam na hi uh,
na free will uh ziakin” chih hong hita daih ding hi. Hehpihna ziaka hotdam
kichi in om zia neilou in, mihing apansuak free will a hotdam kihita ding chihna
ahi. I free will a thupukna dik la a hotdam i hihleh hehpihna kichi phakna chiang
(limit) nei i suaksak ding ua, phetlou in i hotdamna uh i kisaktheihpih ding uhi.
A ziak tuh i free will tungtawn a thupukna dik la a Jesu Khrist kigingta hiven.
Agingtaloute tungah ah kisaktheihna a om, amau agintaklouh ziak un. Eph. 2:8-9 “…. kuaman a kisaktheihpih louhna dingin”
chih kalh kha suak ding hi.
Huaiziakin,
na hotdamna dingin thupukna bawl in, Jesu sang in, pom in chi a kisawl diklou,
LST toh kituak lou ahi. Himahleh, Jesu sang/pom in i chih chiangin na lungtang
in Jesu Khrist gingta in chihna a genna dan a zat leh dik in, LST toh kituak
zaw hi (Rom. 10:9-11). Huai pellam ah na hotdamna dingin thupukna dik la inla
Jesu Khrist pom in na pomkei leh hotdamna hikei chih genna a i zat leh diklou
ding hi. LST in hotdamna tuh thil thawnpiak (gift) a chi a (Eph. 2:8-9),
himahleh thilpiak (offer) chih a genkei hi. Ahihziakin,
tangpi sapna (universal calling) tungtawn in thilpiak a chih theih veve hi.
Berkhof in tangpi sapna leh thilpiak (offer) thugin ah kikheng thei
(interchangeable) a chi hi.[4]
(ii)
Hihhinna;
Pathian kia nasep ahi (Monergistic):
Hihhinna
tuh Pathian nasep kia ahi.[5] Khalam hihhinna toh kisai in
mikhialte’n nasep/thoh bangmah i neikei uhi (entirely passive), Pathian nasep
(active agent) kia ahi. Hihhinna/ pianthakna toh kisai in gentehna kigen sek,
naungek apiang chiangin apianna dingin bangmah thoh aneikei hi. Huai bangin i
khalam pianthakna dingin bangmah thoh angaikei hi. Mikhialte misi toh kibang i
hi uhi. Khalam a i pianthakna dingin Pathian lalpen hihna tungtawna ahihhingna
apoimoh hi.
Lai
Siangthou in Pathian’ tate tuh Pathian apan suak ahi (John 1:13) ana chi hi. Mikhialte
ahihleh sa deihdan ahingte i hihman un Pathian deihdan a hing theiloute i hi uhi.
Sa deihdan ahingte i hi uh, kha a piang i hihlouh ziak un. Sa deihdan a
hingte’n, Pathian i dou ua, a deihdan in i omkei ua, om leng i om theikei himhim
uhi (Rom. 8:7-8) ana chi hi. Pathian it a athu i man theihlouh dan Deut. 30:6
in hichiin agen hi, “Toupa na Pathian uh
na lungtang tengteng uh leh na lungsim tengteng ua na it theihna ding un Toupa
na Pathian un na lungtang uh leh na suante uh lungtang a hon tansak ding hi”
ana chi hi. John 6:44 ah, “Kuaman ka kiang
hon zuan theikei, ka Pa hon sawltu in a kaih keileh” ana chi hi. I John
4:19 in, “Pathian in hon it masak ziakin
amah i it thei uhi” chih in agen chiang mahmah hi.
Huaiziakin,
Pathian kia nasep (Monergistic regeneration), mihing lam apan bangmah nasep
omlou ahi (Exe. 36:25-27; 37:12, 14).[6] Jesu’n Lazarus akaihthohna
ah mihing in bangmah thoh angaihlouh dan i muthei hi (John 11:43). Nasepte
16:11-15 a, Lydia pianthakna ah a chiang huntawk hi.
Hihhinna
in kha thak, lungtang thak ahon pia a, khalam a si himah lehang khalam a pianthakna
ahon tun hi.[7]
Kha Siangthou in i khalam mit ahon hihvaksak a (Acts 26:18; 2 Cor. 4:4, 6; Eph.
1:18), sa ngaihtuahna tuh kha ngaihtuahna in ahon khek hi (Rom. 8:5-9). Huaiziakin,
hihhinna tuh Pathian kia nasep ahi a, mikhial in hihtheih, thohtheih i khelhna
lou ngal bangmah akinei kei hi. Pathian hotdamna lemgeltu, pantu in alampi leh
atawp tanpha in a semsuah a, a mite ahumbit den hi. Sunggil a sapna, hihhinna
tuh ngeina banglou (supernatural), mimal (personal), hattak (powerful) leh
thuzohthei (convincing) banah a hon hip leh hon kipaksak (delightful) hi.[8]
(a) Hihhinna
nial theihlouh ahi (Regeneration is Irresistible): Arminians te’n hihhinna
tuh
nialtheih achi uhi. Nasepte 7:51 ah Stephen in, “Kha Siangthou na nial gige uh” achih tuh hihhinna na nial uh
chihna hilou in Pathian in tanchinhoih tungtawna tangpi sapna (common calling)
nialte a genna ahi [Thukhat ah,
mikhialte’n Pathian kinial gige hi]. Himahleh, hotdamna dinga Pathian Kha
Siangthou nasep hihhinna tuh kuaman a nial theikei hi. Rom. 9:19 in, “kua ahia Pathian deihlam kua ahia akalh”
achi hi. A dawnna tuh kuaman a chi hi.
(b) Hihhinna
teltuamte a ding kia ahi (Regeneration is only for the Elect):
Pathian
in hotdam hi dinga ateltuam leh asehkholhte kia in hiai hihhinna atang uhi
(Rom. 8: 10-11; 28-30; Eph. 1:4-5; I Peter 1:2-3). Hotdam hi dinga sehkholh
mite’n aphatuam sapna tangin, aphatuam sapna tang mite’n hihhinna atang uhi(Rom.
8:29-30).
(c) Hihhinna
in mihingte pumpi a khek (Regeneration renews the whole man):
Hihhinna
in mihingte lungsim, kha leh sia-le-pha theihna khek in Pathian dawng kikthei dingin
a siamthak hi. Hiai kikhekna tuh lungsim khekna maimai ahikei a, lungtang sunggil
apan pumpi kikhekna ahi. Kikhekna in thil hihtheihna thak, thilsiam thak, leh
kahiang thak (new faculty) ahon pia hi,[9] (Sam 51; Ezek. 36:26-27).
(d) Hihhinna
a kikhelkik thei kei (Regeneration cannot be undone):
Hihhinna
tuh Pathian nasep, mihing lam apan free will a hihhin ahihlouh ziakin a kikhelkik
theikei hi. Pathian Kha Siangthou in hon thuzoh kia hilou in lungtang hon
kheksak ahihziakin akip in, mangsaktheih ahikei hi (Rom. 8:31-39).
5.
Hihhinna
vanzat (The means of Regeneration)
Lai
Siangthou a i muh bangin hihhinna vanzat (instrument) tuh Pathian’ thu (God’s
Word), Tanchinhoih ahi (James 1:18; I Peter 1:23, 25). Pathian hihhing dinga
sapna tuh tanchinhoih zakna tungtawn kia a sepsuah ahi (2 Thess. 2:14).[10] Tanchinhoih zakna
tungtawn in Kha Siangthou in atelmite khalam mit Jesu hotdamna nasep theisiam dingin
ahihvak hi. Khalam hihsiangthouna /hihhinna tuh Kha Siangthou hihbuchin ahi (Titus
3:5), huai tuh tanchinhoih zakna tungtawn in ahi (Eph. 5:26; I Pet. 1:23-25).
Huchiin mihingte tuh tanchinhoih theisiam dingin Kha Siangthou in ahon thop hi
(Acts 16:14; I Cor. 2:12-15; Eph. 1:17-20).[11]
6.
Hihhinna
leh Ginna kizopna (The relationship of Regeneration and Faith)
Dotna
om gige leh gindan kibanglou khat tuh hihhinna leh ginna koi masa zaw a chih ahi.
Saulou in i en ding.
(i)
Ginna
in Hihhinna makhelh (Faith precedes Regeneration):
Arminianism
sinsakna gingtate’n Jesu gingta masa in huchiin hihhinna nei in hotdam na hiding
uh achi uhi. Huai tuh free will zanga hotdamna ahi. Mikhialte piakken free will
tungtawn a kigingta thei ahi achi uhi. Huai tuh hehpihna masa, kiningching
(Prevenient grace) tungtawn in a chi uhi. Prevenient grace tuh John Wesley in
mihingte siatgawp dimdemna apan bang chileh hotdam a omthei ding, Jesu kigingta
thei ding chih amah lemgel siamna zangin tangkoupih in a minthang (popularize)
sak hi (a concept bel Roman Catholic a om khinta). Huaiziakin Lai Siangthou
support tu ding kichiantak khat mah leng a omkei hi.
Huan,
Lai Siangthou ah mun bangzah hiam apansan uhi. Apansante lak ua khat John
1:12-13, “… amin gingtate tengteng Pathian
tate a suahtheihna apia..” achi ua, tang v. 13 a kigente tang 12 pansan dan
in a gen uhi. Himahleh, v.13 a sa deihna a suan, mihing deihna asuan leng ahi
samkei ua, Pathian suan ahizaw chih a kitheihmoh bawl uhi. Pathian suan
ahihziak ua, amin gingta a Pathian tate a suahtheihna apia hizaw ahi. Hiai sinsakna
LST pumpi et in a kituak in a kimil vekkei (inconsistent) hi.
Huaiziakin,
Sia-le-pha theihna zanga Jesu gingta ding i hihleh Rom. 3:10-13 “.. Kuamah Pathian zong omlou..” banah Rom.
9:16, “Mihingte deihdan ahikei a, Pathian
hehpihna ahi zaw” (depends not on human will or exertion, but on God, who has
mercy) kalh kha asuak ding hi. Huaiziakin, Hotdamna ginna ei a suak
ahihlouh ziakin ginna in hihhinna makhelh theikei himhim hi.
(ii)
Hihhinna
in Ginna makhelh (Regeneration precedes Faith):
Lai
Siangthou ah chiangtaka i muh bang un hihhinna a masa zaw ahi (Regeneration
precedes Faith). Hihhinna leh ginna akibang hun chet a om chi a theih himahleh
hihhinna tungtawna ginna hong om ahih ziakin a masa zaw a ngaih ahi. Mikhial in
Pathian thilte hihtheihna neilou in Kha thilte i theisiam thei kei himhim uhi
(Eph. 2:1-3). Pathian dou in, i lungkim sakthei kei uhi (Rom. 8:7-8), phetlou
in hotdamna ginna i nei kei uhi (Heb. 11:6). I John 5:1 in, “Kuapueh Jesu tuh Khrist ahi chih gingta(Present
participle) tuh Pathian suahsak (perfect)
ahi, kuapeuh a suaksakpa it in a suaksak leng a it nak” ana chi hi. I gintak
ziak uh Pathian in i lungtang ah nna a sep masak ziak ahi. Nasepte 16 na a Lydia
pianthakna leng Pathian in Peter thugen theisiam dinga alungtang ahihvak sak
masa a huchiin baptisma atang uhi. Phil. 2:13, “Amah
lungtuak dia, nou maua hon utsak leh hon semsak dia hihpa tuh Pathian ahi ngala”
a chi hi. Huaiziakin, hihhinna tuh
ginna sangin a masa zaw hi.
7.
The
Result of Regeneration
(i)
Ginna
(Faith)- Atunga i genkhawmte apan in hotdamna ginna (saving
faith) tuh hihhinna tungtawn a gah masapen ahi. Hotdamna ginna tuh ei a suak ahikei
a, Pathian apan suak ahi (Eph. 2:8-9). Hotdamna ginna hilou ginna dang leng a
om hi; ginna tomchik daih, thil lamdang hihtheihna ginna (temporal and miraculous
faiths). Hihhinna thak om nungin khelhna apan hotdamna ginna nei in Jesu i gingta
theita uhi. Hihhin a omloute’n hotdamna tunzou ding ginna
a neithei kei uhi (Johan 6:44, 65). Hihhin a om mite kia in ginna hotdamna
tunthei ding Pathian piak ahihziakin a nei uhi (Johan 1:12-13; 6:37). Huaiziakin,
na ginna tuh nang a hong suak ahimok kei a, Pathian hon piak ahi. Huan, hihhin
a na om chiangin, Pathian in hotdamna ginna hon pia in Jesu Khrist gingta thei
dingin na sia-le-pha theihna zangthei (exercise) dingin na lungtangah nna asem
ahi zaw hi.
(ii) Kisikna (Repentance)-
Kha Siangthou hihhinna i tangzoh nungin i khelhnate hon kimusuah sak in khelh
kisikna hon tun hi. Kisikna tuh lungtang taktaka
kisikna, thilhoihlou hihte apan kiheikhiakna/topsanna ahi. WSC Q. 87 “Hinna neihna dinga kisikna tuh hondam thei hehpihna ahi
(Nas. 11:18), huai pansan in mikhial khat in, ama khelhna kiphawkna diktak nei
in (Nas. 2:27, 38), huan Khrist a Pathian’ hehpihna theisiam in (Joel 21:2;
Jer. 3:22), lungkhamna leh ama khelhna huatna toh, khelhna akipan kihei in,
Pathian lam angata hi (Jer. 31:18, 19; Ezek. 36:31), thumanna thak neih ding
tupna piching leh huai hihzuizel ding tupna toh akipan thakta hi ( 2 Cor. 7:11;
Isa. 1:16-17). Sung giltaka kisikna, Kha panpihna nasep, Pathian
thilthawnpiak ahi (Nas. 5:21; 11:18; 2 Tim. 2:25). Khelh kisikna tungtawn in
kikhekna (conversion) ahon tun hi (Nas. 15:3; 26:18; Rom. 3:20). Hihhinna
kia in a tawp kei a, kikhekna tun in, kikhekna in siangthousakna ahon tun hi.
Mikhial ka hi chih kithei in ni tenga khelhna thil hihte apan in i kikem siangthou
thei uhi (I John 2:29; Rom. 5:4; Eph. 2:10; 4:24; 2 Cor. 5:17).
8. Thutawpna (Conclusion)
Hihhhinna tuh mikhialte hotdamna dinga Kha Siangthou nasep masapen ahi. Hihhinna kichi Pathian kia nasep ahi a, mihingte’n bangmah thoh theih i khelhna loungal i neikei uhi. Hihhinna tungtawn in hotdamna ginna Pathian in hon pia hi. Kha Siangthou in lungtang, kha, lungsim, leh sia-le-pha theihna thak hon pia in hon hihhing hi (Sam 51; Ezek. 36:26-27). Eph. 2:1 in, “Noute leng na tatlekna uh leh na khelhnate uh ziaka si na hih lai un ahon hihhing a” chiin ana gen hi. Pathian itna leh hehpihna ziakin khelhna apan Jesu Khrist tatna tungtawn in ahon hihhingta hi (Eph. 2:4-5). Huaiziakin hotdamna tuh abul apat atawptan Pathian kia nasep ahi. Pathian hehpihna leh itna ziak kia a hotdam i hih ziak un thupina leh pahtawina tengteng tang dingin a phu a, thupina leh pahtawina tengteng Amah i pia uhi.
By Kapsuanmung
Bibliography
(Laibu ette):
Achtemeier, Paul
J. HaperCollins Bible Dictionary. US:
HarperSanFrancisco, 1997.
Beeke, Joel &
Jones, Mark. A Puritan Theology: Doctrine
of Life. Grand Rapids: Reformation
Heritage, 2012.
Beeke, Joel. Living for God glory: An Introduction to
Calvinism. Lake Mary: Reformation Trust,
2008.
Berkhof, Louis. Manual of Khristian Doctrine. Grand
Rapids: Eerdmans, 1993.
Horton, Michael. The Khristian Faith. US: Zondervan,
2009.
MacArthur, John
& Mayhue, Richard. Biblical Doctrine:
A Systematic Summary of
Bible Truth. Illinois:
Crossway, 2017.
Mohan Chacko, “Khrist and
Salvation” notes
Sproul, R. C. What is Reformed Theology. Grand Rapids:
Baker, 1997.
Unger, Merrill F. The New Unger Bible Dictionary. Chicago:
Moody Press, 1988.
[1] Merrill F. Unger, The New Unger Bible Dictionary (Chicago:
Moody Press, 1988).1452. Paul J.
Achtemeier, HaperCollins Bible Dictionary
(US: HarperSanFrancisco, 1997), 921.
[2] R. C. Sproul, What is Reformed Theology (Grand Rapids: Baker, 1997), 184.
[3] R. C. Sproul, What is Reformed Theology, 184.
[4] Mohan Chacko, “Khrist and
Salvation” notes, pg. 131.
[5] John MacArthur & Richard
Mayhue, Biblical Doctrine: A Systematic Summary of Bible
Truth (Illinois: Crossway,
2017), 784.
[6] R.C. Sproul, What is Reformed Theology, 183.
[7] Joel Beeke & Mark Jones, A Puritan Theology: Doctrine of Life
(Grand Rapids: Reformation Heritage, 2012), 436.
[8] Joel Beeke, Living for God glory: An Introduction to Calvinism (Lake Mary:
Reformation Trust, 2008), 86.
[9] Beeke & Jones, A Puritan Theology: Doctrine of Life,
440.
[10] MacArthur & Mayhue, Biblical Doctrine, 793. Michael Horton, The Khristian Faith(US: Zondervan,
2009), 566.
[11] Louis Berkhof, Manual of Khristian Doctrine (Grand
Rapids: Eerdmans, 1993), 239.
0 Comments