PATHIAN HIHNA

 

Pathian hihna

 

Pathian tuh khat, bangkim siamtu, bangkim kipatna leh tawpna/abul leh atawp, Alfa leh Omega ahi (Johan 1:1; Kil. 22:13). Kuaman Pathian mu ngeilou ahihman in Pathian hihna tuh hilhchet haksa petmah hi. Bangkim siamtu mihingte leh thilsiamte tengteng siamtu ahihman in thilsiam a omte’n a Siamtu (Creator) theichian sipsip zoulou mah ding ahih ban ah, thil hitheilou khat ahi (Rom. 9:20-21). Himahleh, Pathian hihna leh nasepte theihna omsun tuh Lai Siangthou leh thilsiamte apan in i sutthei uhi.

 

Mosi in Pathian min a dotlai in, Pathian in hichiin ahihna a gen, “KA HIH KA HI” (I AM WHO I AM) chi lel in a dawng hi (Exo. 3:14). Hiai mun ah Pathian in kei Israelte Pathian bangkim hihthei, thuneipen, bangmah thildang toh teh theih hilou, hihna bukimtak suisuah vuallouh, theihsuah zoh vuallouh, hihna chituam vilvel nei, amah leh mah a om (self-existence), mun teng a om, kikhektheilou leh kua dang poimohlou (self-sufficiency) na kiang ua om gige ding ka hi chia a thuchiam a muanhuaina leh ginomna a hilh thak nawnna hi.

 

Pathian hihna theih zoh vuallouh himahleh Lai Siangthou apan i muhtheih ahihna bangzah hiam i en ding hi: 

 1. Pathian tuh Kha (Spirit) ahi (Exo. 20:4; Johan 4:24): Pathian tuh mihingte banga khut leh khe nei, pumpi nei, mit a muhtheih leh khut a lawn khaktheih ahikei hi. Pathian tuh Kha ahi. Himahleh, i Lai Siangthou mun khenkhat ah Pathian mihing batna pumpi nei a kigelhna om a hiai tuh sappau in ‘Anthropomorphism’ a kichi hi. Hiai tuh i theihsiamna dinga Pathian mihingte dan a hong kilakna ahi (Sam 118:16; Isa. 48:13).

        2. Pathian tuh tangtawn mi, tangtawn a om gige, ompat ni leh tawpni neilou ahi (Job 11:7-9; Sam 90:2): Thil tengteng siamtu ahi (Johan 1:3). Hiai tuh Pathian hing ahihna ahi. Vaite pathian dan bang chik chiang hiam a lei ngai, bawl ngai, hah ngai leh paih ngai Pathian hilou om patni neilou leh beini neilou Pathian ahi.

        3. Pathian tuh a khen lamdang theihlouh (Unchangeable): Pathian tuh thil bangmah in a sulam dang theikei a, khek le a khek theih kei hi (Jakob 1:17). Khen khat in Pathian thupukna tuh khek theih ahi, thumna tungtawn in a chi pawl om hi. Pathian in ahon hehpihna leh itna ziakin mikhialte thumna hon ngaihkhiaksak a thupuk nasa a sulam dang zel hi. Himahleh, hiai tuh Pathian khen lamdangna leh Pathian ei sanga neu zaw chihna hilou ahi.

        4. Pathian khophawk thei: Pathian tuh muh theih hikei mahleh, hing leh mihihna nei, houpih theih, hon houpih thei, kizoppih theih, khophawkna nei, deihteelna nei, sia leh pha khentheihna ban ah kipahna, dahna leh hehna nei thei ahi (Exo. 3:14; 6:2-4).

        5. Pathian tuh a pilpen ahi (Omniscience): A pilna tuh phaktawp a neikei hi (Sam 147:5). Aman theihlouh neilou, pilna bukimtak a nei hi.

        6. Pathian tuh Lal leh thunei pen ahi (Kil. 4:8). Lalpen leh tungpen ahi (Sovereign).

        7. Pathian tuh a siangthou hi (Rev. 15:4; Exod 15:11; 1 Pet 1:16): Amah a khelhna himhim a om kei, hoihbukim leh siangthou (holy) bukim ahi.

        8. Pathian tuh a thutak leh a hoihbukim a, ban ah thu dik in vai a hawm gige hi (Exo. 34:6-7).

        9. Pathian tuh mihingte theihsiamna khen ahi (Transcendence) Isa. 55:8-9; 57:15; Sam 113:5-6; John 8:23.

        10. Pathian tuh hehpihna leh itna Pathian ahi (Grace- Sam 145:17; Rom. 1:5; 3:24; 5:15, 20; Eph. 4:7; Heb. 4:16 leh Love- Deut. 7:7-8; John 14:31; Ro. 5:5,8; I John 4:8,16).

 

 

Kapsuanmung