PATHIAN MINTE

 

Pathian minte

 

Lai Siangthou a i muh bang un Pathian tuh min tuamtuam a sap leh theih in a om hi. Pathian’ minte tuh Amah hihna, diktak, a thupina leh thilhihtheihna genkhiatna ahi. Mihing phuahtawm ahikei hi. Himahleh, Amah leh amah hong kilakna tungtawn in i thei lel uhi. Mihingte phuah hikei mahleh mihingte theihsiam dingin mihing paute (languages) tuamtuamte zangin Pathian in hon hilhchian hi. Lai Siangthou Thukhun Lui sunga kigen Pathian min tallang deuhte hiaite ahi:

1. ELOHIM: Pathian tuh Siamtu (Creator), Thupi (Mighty) leh Hat (Strong) ahi (Gen. 1:1-4; 17:1; 35:11; Num. 23:22; Deut. 10:17; Jer. 31:33). “EL” agen tuh “thupi, thahat leh thilhihthei” chihna ahi. “IM” tuh khatsanga a tamzaw genna (Plural) ahi. Hebrew Bible ah Pathian min “ELOHIM” kizat chiangin, Pathian a mi thumte (Trinity) genna in a kizang hi (Gen. 1:1, 26). “Eloah” tuh khat (singular) genna ahi. EL telna Pathian minte:

(a)      EL- ELYON:  Pathian tungnungpen (Most High) chihna ahi (Deut. 26:19). Hebrew pau apan kila sawn “paitou/kahtou” (go up/ascend) chihna ahi.

(b)      EL- ROI: Pathian in hon mu gige (Gen. 16:13).

(c)      EL- OLAM: Tangtawn a om gige (Gen. 21:33; Sam. 90:1-3).

(d)      EL- GIBHOR: Pathian thupipen leh kiningching, taksap neilou (Isa. 9:6; Gen. 17:1-2). Messia Jesu Christ genna a kizang ahi (Kilak. 19:15).

        2. ADONAI: Pathian min “Toupa” chihna ahi. Thukhun Lui laibute ah 434 vei a kizang hi. Pathian bangkim tunga thunei leh vaihawmtu ahihna, sikha leh apu kizopna genna min ahi (Exo. 4:10; 2 Sam. 7:18-20; Sam 8:1; I Cor. 6:1-20; I Pet. 1:14,15).

        3. SHADDAI LEH EL-SHADDAI: Pathian min “Shaddai” tuh “Shadad” apan lakkhiak, huai tuh thupi leh thuneipen chihna ahi. Pathian ah hoihna, chitna, migitna, theihna, itna leh panpihtu genna ahi (Gen. 17:1; 28:3; 35:11; 43:14; 48:3).

        4. YHWH: Pathian min kizang munpen ahi. Thukhun Lui ah 6,519 vei a kizang hi. Gen. 2:4 ah kizang masapen hi. Hebrews te’n Pathian min siangthou zahtak lua ahihman un a min in a sam khe ngamlou in “YHWH” in agelh uhi. YHWH tuh “tetragrammation” laimal li chihna ahi. Vowel omlou ahihman in a simkhia thei kei ua, a khonung in simkhiat theih dingin laimal ging bawltu vowels nih “a” leh “e” a bulh ua, “YAHWEH” chih hong suak a, huan, JEHOVAH leng a kichi hi. Pathian min tuh Pathian tangtawn a, kikheng ngeilou leh om gige pa chihna ahi (Sam 102:27; Eph. 4:23). Mosi in Pathian min a dot lai in Pathian in “KA HIH KA HI” chiin a dawng hi. Huan, hiai ah Pathian min “YHWH” kizang hi. Pathian min “YHWH” tuh Thukhun Thak ah “YESHUA” (JESU) in a kilak hi (Johan 8:56-59; Rom. 10:9, 13; Joel 2:32). Jehovah apan Pathian min dang tampi hong kigente:

(a)      Jehovah- Nissi: Toupa ka puanlap (Exo. 17:15).

(b)      Jehovah- Raah: Toupa hon chingpa (Sam 23; 80:1; Gen. 48:15; 49:24).

(c)      Jehovah- Rapha: Toupa hon hihdamtu (Exo. 15:26). Toupa taksa leh khalam damna hon petu.

(d)      Jehovah- Shammah: Toupa munteng ah om (Ezek. 48:35).

(e)      Jehovah- Tsidkenu: Toupa I diktatna uh (Jer. 23:5, 6; 33:16).

(f)       Jehovah- Jireh: Toupa poimoh leh taksapte hon petu (Gen. 22:7-14).

(g)      Jehovah- Shalom: Toupa, muanna, lungnopna petu (Vai. 6:24).

(h)      Jehovah- Mekoddishkem: Toupa hon hih singthou (Exo. 31:13; Lev. 20:8).

(i)        Jeohvah- Sabaoth: Pathian mihonpite Pathian (I Sa. 1:3; Isa. 1:24; 5:16; 9:19; Jer. 9:15; Amo. 3:13: Mika. 4:4; Mal. 1:6; Hab. 2:13; Zep. 2:9).

 

Thunkhun Thak sunga Pathian min tallang deuhte:

1. THEOS: “THEOS” tuh Thukhun Lui a Pathian “EL, ELOHIM leh ELYON” toh kikim in zatdan kibang in a kizang hi. Pathian min “THEOS” tuh a kizang tampen ahi (Mark 5:7; Luke 1:32, 35, 75; Nas. 7:48; 16:17; Heb. 7:1).

2. KURIOS: Pathian min “KURIOS” tuh YAHWEH apan lakkhiak, himahleh, YAHWEH min khiakna/gentehna (Connotation) toh kibang bel ahi kei. KURIOS tuh Pathian thupipen, Toupa neitu hihna, Vaihawmtu hihna thuneihna nei chihna ahi. Jesu Christ sapna min ah leng akizang hi.

3. PATER: Pathian min “PATER” khiakna tuh “Pa” (Father) ahi. Thukhun Thak a hong om pan a chisek ua, dikthou mahleh, Thukhun Lui apan kizang in leh gingloute biakna ah leng zat in a om hi. Thukhun Lui ah Israelte toh Pathian kizopna genna in akizang tangpi hi (Deut. 32:6; Sam 103:13; Isa. 63:16; 64:8; Jer. 3:4,19; 31:9; Mal. 1:6; 2:10), Israelte Pathian tate chih bangin leng akizang hi (Exo. 4:22; Deut. 14:1; 32:19; Isa.1:2; Jer. 31:20; Hos. 1:10; 11:1).  Thukhun Thak ah Siamtu chihna in akizang hi (I Cor. 8:6; Eph. 3:15; Heb. 12:9; Jakob 1:18). Mun dangte ah Jesu Christ toh kizopna hoihtak nei, ei a dia gensaktu/palai hihna, gingute Pathian Khalam ta kizopna hoihtak nei chihna in akizang hi.

 

Patian min tuamtuamte tuh Amah hihna leh nasepte genkhiakna ahihman in pilvang leh omzeneitak a zat ding ahi.

 

Kapsuanmung