Khristiante’n hun haksa
bang chibanga maituah/respond ding i hi ua? Bang chibanga thum ding tu covid
vengvung lak ah?
Covid
ziaka nu-le-pa, nu-le-nau ana suunta bang, ahihkeileh covid ziak hi sese lou a
sihna/lusuunna ana tuakte banah haksatna lungkhamna, kingaihsiatna ana tuak om
dingin ka gingta hi. Huchi banga i om chiangin Pathian ginlahna bang, Pathian
kiangah thum didan bang kitheilou in thumna i neih dek chiangin gen ding
kitheilou in i om khazel ding un ka gingta hi. Mi kuahiam kianga i gen chiangin
thum inla, Bible sim zel un chiin hon hanthawn zel ua, a hiding mahleng ahi.
Hiai ban ahihtheih uh a om tuan kei hi. Himahleh, agen anuam a a zuih a haksa
mahmah a, i zuithei tuankei uhi i lungkham luat ziak un. Hiai hun chiangin thum
didan (style) hizaw lou in i buaina
uh tuh i thumna content ding ahi zaw
hi. Lungsim ah bangmah omlou, gen ding omlou, a kihi meimuai mai a, phetlou in,
a om sunsun genkhiak haksa kisa zomah hi. Pathian ginlahna nei in i om khasek
ua thum lehang leng ka thumna dawn in om kente i chi zel uhi. Mihing hihna zar
a omthei thil mah ahi.
Himahleh,
lungmuanhuai na thu Rom 8:26-28 in tuabang hun a i om chianga gingtute a dingin
honna sinsak hi. Khatna, hatlou leh
bah a i om chianga Kha in hon na panpih/huh zel chih ahi. John Calvin in
genchian hoih mahmah a, hichiin gen hi, “I
hatlouhnate, lunggimna, i puakgikte Kha Siangthou in hon panpih kia hilou in,
Amah mah in i puakgikte amah a banga ngai in hon puakpih a, amah toh puakhawm
in a hon hihhat hi” ana chi hi. Hiai a “weakness” kichi tuh lungkham
mangbat ziaka gingtute’n thum didan leng theilou lam ahi agen. Thumna neih
didan a style ahikei a, himahleh a content or object ahi. Thumna neih chianga
bangbang gen ding chihte ahihban ah gingtute thumna apoimoh dantak a, neih didan
a thum theihlouhna ahi. Tuabang hun a Kha in i poimoh teng chihtakna,
aphatuam theipen (faithful and effective)
dingin honna panpih in Pathian deihdan (according
to the will of God) in gingtute a dingin honna thumsak gige ahi chih
theihchian apoimoh hi.
Gingtute
hatlou, lungkham leh hatsatnate tuak i hihman un, thumna a gen di bang lungsim
ah om hetlou ahihman in Pathian deihdan a thum ding ahihdan leng i theithei kei
ua, ahi ding bangtaka ngetna (requests)
leng i neithei kei uhi. Himahleh, Kha in eite sik-le-tangin honna thumsak in
Pathian deihdan toh kituak in ngetnate honna bawlsak gige hi. Lungmuanhuai
mahmah maw.
Huaiziakin,
hiai bang hun haksat i tuah chianga thumna neih haksa i saktak lehleng thum
teitei sawm in panla a, i thumnate Pathian deihdan ah nga lehang ei
hihtheihlouh ban zaw Kha in honna panpih dinga Pathian deihdan ahonna thumsak
leh ngetsak ding ahi. Gingtute i hamphatna hiai ahi, hun haksa ah leng hon
ompih gige hon panpih gige leh hon khamuantu Kha neite i hi uhi.
Ban
ah, haksatna tawpkhok i maituah chiang un, Pathian in kei a dinga sinsak nop
hon nei ahi chih thei kawm a lametna liantak toh thathak la a, Pathian in hon
panpihna ding ahi chih muanngamna toh Amah a kingak ding ahi. Thil nuam ahikei,
himahleh, zohlouh ding ahikei hi. Pathian a dingin thil haksa a omkei hi. Paul in Philippi saptuamte kia ana gen, “Amah hon hihhatpa ah thil tengteng ka hih
thei hi (Phil 4:13)” ana chi hi.
Pathian deihdan a nna I sep leh Amah hon panpih dinga Amah hatna toh hun haksa
kimaituah zou ding hi.
Dawngtu: Kapsuanmung
0 Comments