Hotdam didan (how to be born again) Lai siangthou in
hon sinsak mah hia? Mi khenkhat in hiai na hih a, hiai banga pan na lak leh
hotdam a om ding na hi a chisek ua. I kam a Jesu, ka lungtang tengteng in ka
gingta, ka lal leh hondampa dingin ka pom chih mai a hotdam kihi hia?
Honestly speaking
hotdam didan Lai Siangthou in hon sinsak kei hi. Himahleh hotdamna paizia bel
ahon sinsak hi. Ei lam a sep ding bangmah i khalam hotdamna dingin a omkei hi.
Mihing in ei ut thu, deihdan leh deihtelna pansan a thupukna la a khalam
hotdamna ngahtheih ahi mok kei hi. Na hotdamna dinga hiai na hih ngai, na
huchih di, thupukna dik na lak ding chihte Lai Siangthou hon sinsak dan ahikei chih
i theih masak dingin ka deih hi. Thupukna dik la a hotdam hilehang i hotdamna
ei a kinga suak dinga, Lai Siangthou in “Hotdamna tuh Toupa a ahi” (Ps 3:8; Rev 7:10) a chih toh kikalh suak ding ahi. A ziak tuh Pathian in hon hotdam hizaw lou in, nang
thupukna dik nalak ziaka hotdam hi ding na hihman in. Phetlou in, na
thupukna dik lak na kisialpih/saktheihpih lai ding thupukna dik laloute
kiangah, hiai in Eph 2:8-9 a, “… kuaman a
kisaktheihpih louhna ding un” chih a kalh kha nawn hi. Lai Siangthou apan
hotdam didan kisinsak chi in thupukna la in tu mahmah a na tangtawn mun ding
telthei na hi, deihtelna nei na hi gingta inla, kisik in chi a ki force bawl
chihte Bible hon sinsak dan ahikei hi. Ki brainwashed
na in kangaihtuah a hotdam taktak hiloupi hotdam kisa, gah suang khia mahmah
lou gingtu kichi i tam ziak hiai khong ziak ahi diam chih uthuai zozen kasa hi.
Lai Siangthou sung ah koimah ah thupukna laka hotdam hiding chih hon sinsak
khakei hi. Huaisangin Rom 9:16 in, “mihingte
deihtelna ahikei a, Pathian hehpihna ahizaw” chiin a hon sinsak zaw hi.
Lai
Siangthou in hotdamna paizia hon sinsaka, a bikin Rom 10 na ah i muthei uhi. Khatna, Gospel zakna- gospel zakna lou
in kuamah hotdam in a omkei hi. Pathian thu hing Tanchinhoih zakna tungtawn in
Pathian Kha Siangthou in i lungtangah nna hon sem in khelhna ziaka khalam
sisate kha thak, lungtang thak,
ngaihtuahna thak, deihtelna thak hon pia in hon hihhing (regenerate) a,
huchiin i deihtelna zangthei in ginna toh Jesu lal leh hondampa dinga sangin
hotdam in i om a, i lungtang tawng akipan, i kam in Jesu kei sik-le-tang a hong
si ahi chi in kisik a khelhna ngaihdam ngetna nei in kipuankhiakna public confession i nei thei pan uhi.
Hiai ahi hotdamna paizia tomkim a gen in. Huchilou in, hotdam taktak hiloupi a
i kam a ken leng ka gingta Jesu ka lal leh hondampa dingin ka sang chih
theihmah ahi. Hiai gen theihna mihing in ability i nei uhi. Huaiziakin, ka
gingta chiteng hotdam ding hileh dawite’n leng Jesu a gingta ve ua le? Bang
ziaka hotdam a omlou ahi ua?
Banah,
Ginna i chih chi 2/3 a om hi (saving
faith, miraculous faith, temporal faith). Himahleh, a tak leh a taklou
haksat hun, ahihkeileh a hinkhua ua a gah ah kilang khia in a kithei thei hi.
Gen dan dangin, kam a gingta chih rigot a hotdam kihilou ahi. Steven Lawson
says, “It is not the profession of Christ
that saves, but the possession of Christ,” Kam a Khrist ka gingta chih kia hilou a, Khrist sunggil a neihna
ahi hotdamna ana chi hi.
Huaiziakin,
Lai Siangthou in hotdam didan hon sinsak kei a Nicodemus leh Jesu, khalam
hotdamna thu kihouna Tanchinhoih John 3 a chiangtakin a muhtheih hi. John 3:8
na, “Huih a ut
nana ah a nunga, a ging na ja hi, himahleh koi a kipan a hongpai ahia, koi ah
ahia a hoh ding chihleng na thei ngal kei a; kuapeuh Kha a piang tuh huchibang mah in a om hi, a chi a.” Khalam hotdamna tuh nang leh kei thupukna dik lak ziak ahikei chih a chiang mahmah hi. Himahleh,
Pathian Kha Siangthou in i lungtanga nna hon sem in a hong kipatna leh a paina
i thei kei, a huih toh tehkak in a
om hi. Huai tuh Kha nasep hong kipatna i theikei a, himahleh Gospel zakna
tungtawn in nasem in mikhial hon hihhing in, i khelhnate hon kiphoksak a, kisik
in Jesu gingta thei dingin hotdamna ginna hon pia in lal leh hondampa dingin i
sang thei uhi. Nang leh kei deihtelna a
i hotdamna kinga ahikei hi.
Dawngtu: Kapsuanmung
0 Comments