Kumpi Solomon, Job leh Sawltak Paul te tanchin apan Sinlai (Meaning of Life in Christ)

 

Kumpi Solomon, Job leh Sawltak Paul te tanchin apan Sinlai

(Meaning of Life in Christ)

 

Thupatna

“What is the meaning of life” chih toh kisai gendan leh sinsak dan tuamtuam a mi zilin om ding hi. Abikin, gingtute hinkhua a khiakna tuh Jesu Khrist kia a om chih ahi.

 

Mi vangsia, innsung haksatna, zawnna, gentheihna, simmohna, sihna, gal buaina thuak (war victim), cancer natna leh natna tuamtuamte ziaka haksatna tuakte a dia hinkhua khiakna (meaning) omlou, neilou chi lehang adik thei diam? Dik theilou ding hi. Mi neizou, hausa leh nuamsa ahihman a, a hinkhua in meaning neituam chihna hituan lou ahi. Khovel a thil lamdang tuamtuamte, telsuina (science) tungtawn a huihkhua (universe) a kha leh aksite, thilsiam tuamtuamte ziakin kua hiam designer (Pathian) om ahi chih a kichian thei hi. Huaiziakin, i hinkhua in meaning nei chiat ahi chih bangkim siamtu Pathian apan i theithei uhi. “Bangkim a vek in Amah siam ahi; thilsiam tengteng Amah siam louh bangmah a om kei” (John 1:3). Thil i bawl chiangin purpose leh meaning neilou in i bawl kei uh chih ah a chiang hi.

 

Kumpi Solomon: Pathian lau inla, a thupiakte zui in

“Hiai thu lel a tawpna ahi; a vekin zakin a omta: Pathian laudan siam inla, a thupiakte zui in; hiai lah mihing hih ding pumpi ahi ngala” (Eccl 12:13).

 

Kumpi David tapa, Kumpi Solomon tuh khovel a hausapen leh pilpen ahi (I Kum 3:12-13). Himahleh, a hauhsaknate, pilnate, thuneihnate leh khovel a nopsaknate (abikin nupa kipolhna) nei mahleh bukimlouhna (emptiness) nei in Pathian tellou a thilteng bangmah lou ahi (without God everything is meaningless) chih ahon musuah hi. Pathian thil teng siamtu leh vaihawmtu (Eccl 3:11), a thawnpiakte (gifts) a nuamsa ding (enjoying), zahtaka (reverence), athupiakte zuih ding chih a hon khonung theih hi, vaihawmna maituah vek ding chih a theihchet ziakin (Eccl 12:13-14).

 

Job: Bangteng tung mahleh Pathian muangin

Job tanchin i et leh milohching, gensiatbei ahihziakin amah haksa thuak banga thuak a omkei hi. A pianni nangawn leng a hamsiat hial hi (Job 3). Himahleh, Pathian in hon suakta sak ding chi in ginna khauhtak anei hi (Job 19:25). Haksatnate a thuakzoh nungin Pathian in a neih leh lamte ama a leh-nih in apia nawn hi (Job 42:10). Job tanchin apan haksatnate tunga Pathian’ Lalpenna i muhtheih uhi. I khualzinna khovel ah Pathian theichian ding, hunteng a muang ding abikin lungkham leh haksat hunte ah chih i sinkhia thei uhi.

 

Paul: Jesu Khrist theichian in

Paul tuh gingtute that leh bawlsiatute makaipa ahi. Himahleh hong piangthaka Pathian vanzat thupitak hong hi in Thukhun Thak Laibu 13 tak agelh hi. Paul hinkhua pan i muh theih tuh Pathian kumpigam nasepna a gah asuang theihna dingin (Gal 2:20; Phil 1:21-22) Khrist ah ginna toh a hinkhua a kipia vek hi (fully committed). Paul tup-le-ngim pipen tuh Khrist theih a, a haksatnate leh sihna apan thohnawnna thil hihtheihna theihpih ding chih ahi (Phil 3:10-11).

 

Pathian’ lim-le-mel batpih abawl, a ta it mahmah te i hi ua, a thupina vaksak leh tangsak a (reflect), a itna a om a, a deihdan (will) zui a hinkhua zang dingte i hi uhi. Kumpi Solomon apan i leitung hinkhua in meaning nei ahi chih i mu thei uhi. A lehlam ah, Pathian tellou hinkhua tuh a meaning bei (Eccl 1:2) ahi a chih bangin, Pathian tellouhna hinkhua, A deihlouh dan a nopsakna, kipahnate, sum-le-pai, neih-le-lamte neih in omzia a neikei hi. I nosapnate, neih-le-lam, sum-le-paite tuh siatna tuntu lel a suak zaw hi. Gendan dangin, Pathian tellou hinkhua in meaning a neikei, Pathian telna hinkhua in meaning nei in a manpha hi. Huaiziakin, i hinkhua in meaning neilou a, i ut dandan a omthei i hi chih om sinsak kha kei hi. Phetlou in, vaihawmna maituah ding i hihdan hon sinsak zaw hi.

 

Job tanchin apan in haksatna, gentheihna, natnate thuak mah lehang Pathian in thil teng control a, Amah a ginna nei a kingak ding ahihdan hon sinsak thakthak hi. Paul hinkhua apan Khrist theihna a khanga, ginna toh i pumpi a kilatkhiak vek ding (radical) ahihdan hon sinsak nawn hi. Jesu Khrist gingta a, sanga, theichian a i kilatkhiak vek chiangin i hinkhua in meaning nei taktak ahihdan i theichian ding uhi. Huchiin, Pathian hon bawlna diktak aziak a san i theithei ding uhi. Huaiziakin, hinkhua meaning kipatna tuh Pathian i Pa ahi chih theihchetna ahi. “Hiai khantawna hinna ahi, nang Pathian tak kia leh na sawl Jesu Khrist theih” (John 17:3).

 

Thukhitna

Huaiziakin, Solomon, Job leh Paul te tanchin apan i hinkhua in meaning nei ahi chih hon sinsak hi. Pathian lim-le-mel batpih abawl, gingloute laka Pathian diktak ahihdan i hinkhua mahmah a lakkhia (show) ding, a thupinate taklang dinga hon bawl ahi chih thei thakthak ni. Mihingte kimanpha lua ahi, Lalpen Pathian in meaningful neitak ahon bawl ahi chih thei thakthak a Pathian deihdan a hinkhua zanga, manpha lua i hihman un (i value neusak kei ni), amanpha theipen a hinkhua zang dingin i kichial uhi. A tawpna in, Jesu Khrist a ginna, kipumpiakna tellou in hinkhua in meaning a neikei hi. Jesu’n, “… keimah tuh lampi leh thutak leh hinna ka hi…” (John 14:6) ana gen ahi. Khrist a ginna tuh hinkhua khiakna bulpi (foundation of the meaning of life) ahi chih theithak ni. Lai Siangthou apan i hinkhua meaning nei chih theihchetna tuh Jesu Khrist gintakna kia a kimu ahi (John 20:31) chih thei thakthak dingin i kichial uhi. Huan, Khrist a omte’n bel meaning nei chih kia hilou in manpha lua ahihdan uh a kithei thei uhi.

 

Kapsuanmung