Lai Siangthou in Khristian
khat ginglou (non-believer) toh kitenna bang hon chi sinsak a?
Paul
in I Cor 7:12-16 a, ginglou mi toh kitenna ana gen hi. Paul in ginglou toh
kiten ana phal a, a zi ziakin ginglou pasal tate tuh a siang (holy) a chi hi. Siang in agen ut tuh
hotdam ahi chih lam ahikei a, himahleh huai gingtu zi influence na ziakin atate
leh ginglou pasal in Pathian a ginna aneithei (possibility) uh chih lam a kok hi. Himahleh, ginglou pasal in a zi
a khen utleh, khen hen a zi kitenna a saltang ahikei a, pasal neithak dinga
siang ahi ana chi hi. Himahleh, kikhen teitei ding chih bel thupiak ahikei hi.
A zi in tuabang ginglou pasal toh kitenkik sawm a panla in va delh (pursue) teitei kei hen ana chi zomah hi.
Banah,
gingtu Khristian i kichih ngal leh ginglou mi pasal or zi a neihlouh sawm
teitei mai ding ahi. Gingtu toh kitengte nangawn in leng haksatna leh
kituahlouhna nasatak a neih uhleh ginna i kibatpihlou toh kitenna tuh ngaihngam
a huai kei hi. Huaiziakin, i ginna kibatpih leh ministry a hon lunglut pih a,
hon kithuahkhawmpih thei ding, phetlou in i hatlouh hun ahon panpih a, hon
thumsak thei ding zi leh pasal zong in neih sawm ni. Huai dingin Pathian kia
leng ngen in thumni abaihlua chih a omkei hi. Ginglou mi toh kiten in ahoih lam
sangin a hoihlouhna tamtak a nei zaw hi. Mi khenkhat in ka bawl hoih zouna ding
chiin a kitenpih ua, Pathian a ginna uh a hat leh hoih mahmah a, kipahpih huai
kasa hi. A lohching kei ding uh ka chihna ahikei a, mi a lohching leng a om tham
ahihziakin, a risky mahmah hi. Lohsam hita hile uh damsunga a innkuan haksataka
om ding, tate maikaihna leh mahni ginna nangawn leng hon bahsak mahmah ding hi.
Huaiziakin, gingtu (kua nam chih omlou) mah zi leh pasal dingin zong zaw ni.
Pilvan huai zaw ahi.
Dawngtu: Kapsuanmung
0 Comments