NEW YEAR MESSAGE
Sam 103: (15)-Mihing jaw, a damsung nite loupa bang ahi
a; pawn a pak bangin a lun nak hi. (16)-Huihin
a mut a, a mang jel ahi; a omna i na thei nawnta kei ding hi. (17)-TOUPA chitna bel amah kihtate tungah
khantawn akipanin khantawn pha in a om dinga, a diktatna leng a tusuan a tasuan
tan un a om ding hi.
I Toupa Jesu min in KUMTHAK 2022 CHIBAI kon buk masa ahi. Kumthak hon
musaktu i Pathian min i phat a thupi na tengteng i pia uhi.
“Kumte hong bei jel, hunte hong liam zel, sungkim nawnlou laikuang um, it leh ngaihte bei jel a, a hih hang in eite dam leh hing in i om uhi. Kumte hongthak jel chiang in mihingte hinkhua a tom dan leh apai hat dan kilang zungzung mai hi.”
Awle, Mite i simmoh kha ngei
uhia? I sang a niam zote, i customerte, inn a i na semtute i nelhsiah ngei hia?
Moute mudah leh simmoh, tekte mudah, enkol peihlou, nu-le-pa mudah enkol
peihlou chih kitam mahmah hi. Mihingte i kiletsakna ding bang i hi a? Bang tan
daih ding hinna nei i hia? Hiai pansan in thu saulou kikum khawm lehang i chi
ahi. I changtel Sam 103:15-17 apan in point nih kikum
lehang i chi ahi.
1. Damsung nite Loupa bang ahi vv. 15-16:
Bible sung ah mihing hinkhua tehkakna akigen chiang in, Pak, Meipi leh a dang tampi kizang hi. Etsakna dingin, “Pak zingkal a pak a nitak lam a vul nawn, Meipi zingkal a sah mahmah nisuah chianga mangthang zel” chih dan bang ahi hi.
Awle, ei mihingte’n i hinna toulouh lam akithei
a kingaihsaklou hia, kitheilou a ut leh dah a kigamtang hia chih theih zoh huai
ahi kei a, sotpi dam ding kisa i hi diam, sepna i neih leh I nuai-ate simmoh
pah, Saptuam ah panna i neih leh mi toh kituaklou pah. Huchi ding zaw ana hilou
hiveh aw maw unaute, kiletsakna dingin ei mihingte’n zaw hoihna khat lel leng
kineilou hiveh aw. Aziak tuh i hoihnate
vulpah in tangtawn daihlou hi. Hiaiziak ahi Sam gelhtu in, “Mihing damsung nite loupa bang ahi a; Pawna pak bang in a lun nak hi.
Huih in a mut a, a mang jel ahi a omna i na thei nawnta kei ding hi” a
chih. Ahausa mahmah Job in leng hichin ana chi hi, “Job 14: 2-Pak bangin hong
dawn khia a, a vuai nawn pah, limliap bangin a tai a, a om gige kei.” Job
in tuh khovel hinkhua om gige lou ahi chih chiantak in ana thei a, kiniamkhiatna
lungsim/lungtang a nei hi.
Tu kumthak ah, akiliansak lou, i om omna mite’n nuam salou chih hilou in, i omna peuh ah mite’n Peter banga nang leng nungzui mite lak akhat na hi chi a hon theih ding tan un i om dan i ginna lenkip in Jesu bang in kiniamkhiatna, kingaihniamna, mite hehpihna khiangkhun len tinten ni chi in i kichial hi.
2. Toupa kihtate tusawn tasawn tan
in a chitna a om ding v.17:
“TOUPA
chitna bel amah kihtate tungah khantawn akipanin khantawn pha in a om dinga, a
diktatna leng a tusuan a tasuan tan un a om ding hi.”
Barnes in, “Hiai tuh Pathian zahngaihna, a itna tangtawn daih ahihman in, khalam hi in taksa lam ah leng a chitna dong ding uh a, a tusawn khang sawnte tan in leng vualzawlna a tang ding uh” chi hi. Hoihna, migitna, nunnemna, delh a i delh ding mah ana hiveh aw maw? Tu kum hongthak toh kiton in, ei mah a ding leh i innkuan a ding khual in Pathian zahngaihna delh in, nunnemna, Pathian itna leh midang a dinga vualzawlna hithei lailai ding in i kichial uhi.
Jacob 4:14 in “Jingchiangin bang hong awm ding ahia chih nathei ngalkei ua. Na hinna uh bang ahia? Mei sawtlou kal a hong dawk a, mang nawn lel jel ban gphet na hi ngal ua,” hi eive maw, kiphatsakna toh nungta mihingte, mite that ngam mite, sum-le-pai, thuneihna i neih jek chianga khovel ei a dan a i bawl chiangin zaw, Pathian a i hihlouh dan uh kilang hi. I hinna uh bang ahia i hi chi kisaktheihpih uh? Paunakte in hichin achi hi, Paunakte 27: 1- Jingchiang thu ah ki-uangsak ken; niin bang ahia a hon suahsak ding lah na theikei ngala. I kiim i kiang dak mah dih unau, niteng a sih dak ging a, niteng a lusuun mi om hi, tua bang din mun ei a dingin leng a tung thei gige ahi. Huaijiak in nunnemna, migitna toh kithuah kilemna bawltu hi dingin i kichial uhi.
Thu toppen dingin, mite hehpihni kiletsakna
lungtang i pai laiteng zaw a niamkiat ding sa i hi uhi, khalam hi in salam ah
leng. Ban ah, mi inn a nasem, naudon akiloh i om leh Martin Luther in a saptuam
mite kiang ah, “na hih khempeuh uh Christian na hihna uh toh sem un” achih mah
bangin, eite’n leng naudon akiloh, mi inn a nasem a kiloh i hi zongin diktatna
toh Christian te sep ding dantak a sem dingin i kichial uhi.
Ephesate 4:32 in achih bangin, “Huan, kihehpih chiat a lainatna nei in om
unla, Pathian in Krist a a hon ngaihdam bangin, noumau leng kingaidam tuah
chiat un.” Kihehpih chiatna toh tua kumthak 2022 i muh uh pan in, tuhun
mahmah in kiniamkhiatna, hehpihtheihna, leh midangte a dinga vualzawlna leh lam
dik kokmuhtu hih sawm in kumthak ni masa pantou dingin i Toupa Jesu min in i kichial
uhi.
By Lamkhanlian Hangshing
0 Comments