Reformation Message: Lai Siangthou Deihdan a Saptuam Puahthakna

German monk leh scholar, Martin Luther, in Roman Catholic saptuam sinsakte leh paidante abikin Indulgence kalh in October 31, 1517 in Ninety-Five Theses Germany gam a Wittenberg Biakinn baang ah hon takkhia hi. Hiai thiltung in khovel pumpi a khek maimah hi. Roman Catholic saptuam sunga thuneihna zatkhelhna, nekgukna, tanau leh sanggamte deihsaktuamna, kha mangthangte ngaihsaklouhna nasatak om ziak in Forerunners of the Reformation chih a om―Peter Waldo, John Wycliff, Jan Hus, leh midang khenkhat in Luther ma in kipuahthakna pan ua himahleh thah in om uhi. Luther in haksatna tampi toh kipuahthakna hon pan nawn a Pathian ompihna ziak in Frederick the Wise, electorate of Saxony tungtawn in suakta hi. Frederick in Luther sihna apan hunkhia kia hilou in Reformation movement ahumbit hi. Huan, Luther hun in saptuam tuh banglam peuh ah buah in a siangthouna mansuah a, “Khrist’ Saptuam” omsun chih a theih tuh akiphuhkhiatna tup-le-ngimte ngaihsak ahita kei hi. Huaiziakin, Luther in pona lua in Lai Siangthou a kikthak a saptuam sung kipuahthakna (Reformation) hangsantak in apan hi. Martin Luther in kipuahthakna apat ziak bulpite:

1.  Pathian’ Thutak Nelhsiahna: Luther in kipuahthakna apatma in Lai Siangthou tuh siampute simkhiat ahi. Saptuam kia in Lai Siangthou neithei in, mipite sim ding, leh pau danga let ding hanthawn ahihkeileh kham ahi. Lai Siangthou zilna neiloute’n dikloutaka a letkhiat khak ding venna ahipen hi. Saptuam heutuliante’n Pathian’ Thutak thei mahle uh nelhsiah in mipite mawlna lemtang (advantage) a la in amau deihdan/hamphatna ding in letkhia in a sinsak maimah uhi. Lai Siangthou sim leh sut theihna zalenna mipite’n neilou ahihman un Pathian’ Thutak theihna tasam ua saptuam heutute―Pope, Bishop, leh siampute thugen tuh dotna bawl ding in akoih kei ua Pathian’ Thu chiin a pom thrap zel uhi. Saptuam heutute’n a haikhem maimah uhi.

 

2.  Thuneihna Zatkhelhna: Peter kianga Jesu thugen, “Nang Peter na hi, hiai suangpi tung ah ka saptuam ka lamtou dinga, misi khokulh kongkhakte’n huai a zoukei ding” (Matt 16:18), pansan in saptuam phutkhiatna ding in Jesu Khrist in Peter thuneihna sangtak pia a huai paizom in Pope tuh Peter thakheng a thuneihna sangtak nei chiin a sinsak uhi. Pope tuh sahkhua leh biakna vai ah thunei mahmah a gamsung kumpi vaihawmna chou ngam hial in thuneihna anei hi. Reformation nung tanpha in Europe gam khenkhat ah Pope in thu aneih sawm ziak in buaina ana om hi.

 

Pope, Bishop, leh siampute thu sel a kalh ngam ding kuamah a om kei hi. Huaiziakin, Roman Catholic saptuam’ sinsakna tuh nial/kalh theihlouh ahi. Kumzabi bangzah hiam kuamah in niallou/sellou phetlou in sel ding in leng akoih kei uhi. Pope leh Bishop-te’n Lai Siangthou a tellou amau hamphatna ding tawndante (tradition) sinsak ua, huaite angaipoimoh uhi. Pathian’ Thutak sangmah in amau sinsakte ngaipoimoh zaw in Pathian’ Thutak toh kikim in koih ua thuneitak in mipite a zuisak uhi. Huaiziakin, a thuneihna uh a zangkhial uhi. Gentehna in, Siampu kianga, “khelh kipuanna” leh Siampu in “khelh ngaihdam theihna thuneihna” (Penance: confession & absolution) nei chih a sinsak uhi. Luther in Lai Siangthou toh kituak lou chi in apom kei, Pathian kia in khelhna ngaidam thei banah mitengteng amah leh amah kisiamput thei achi hi.

 

3.   Tanchinhoih Hihsiatna: Martin Luther buaina pipen tuh hotdamna ahi. Roman Catholic saptuam in Lai Siangthou’ sinsakna a tellou “nasep hoih a hotdamna” sinsak in Khrist’ Tanchinhoih ahihsia hi. Luther in Lai Siangthou sinsakna “Ginna tungtawn a hotdam” toh abukkak a kituak leh dik asa kei hi. Huaiziakin, Luther in Romte 1:17 a “mi diktat tuh ginna in ahing ding” chih tangkoupih in Romte 3:28 a “mi diktat tuh ginna kia (ALONE) in ahing ding” chi in German translation ah behlap a, hotdamna tuh ginna ahi, nasep hoih a muh ahikei chiin a sinsak hi.

 

4.   Sum Deihtakna―Indulgence: Kumzabi bangzah apan politics hoihlou leh kineksiatna in Roman Catholic saptuam a pumtuam hi. Kineksiatna khat ahihleh Pope’ thuneihna sangtak zang in niteng khelhna ziaka gawtna kiamsakna ahihkeileh ngaihdamna piak/phalsakna ding in lai dal (pieces of paper)―Indulgence zuak apan uhi. A damlaite khelhna ngaihdamna kia hilou in “mikhialte khelhna siansakna mun” (purgatory) achih uah a innkuanpih sisate khelhna ziaka gotna amaituah ding uh hihkiam/maisakna dinga lei ding chih ahi. Bang ziaka Lai Siangthou’ sinsakna a tellou Indulgence zuak uh hiam i chihleh sum deihtakna ziak ahi―Rome khopi a St. Peter’s Basilica building bawlna ding paulam a fundraise kibawl ahihziaka amet (profits) Pope Leo X leh Archbishop Alber kihawm ding, banah Albert tuh third Archbishopric a dopsang ding chih ahi. Saptuam sunga kinetsiatna nasatak om in heutute summet bawlna munpi a suak hi.

 

Martin Luther in kipuahthakna apat lai a saptuam dinmun toh tulai i dinmun tehkak lehang kipuahthakna apoimoh petmah hi. Luther hun lai a saptuam dinmun toh tulai dinmun akikhiatna om in ka theikei. Kipuahthakna kichi khatvei thilhih ahikei a hih gige thil ahi. Huaiziakin, bang lam peuh ah―mimal, saptuam, gamsung politics, Lai Siangthou toh kituaka kipuahthakna alou theilou hi in ka mu hi. Kipuahthakna dinga poimohte:

1.     Pathian’ Thutak Nelhsiahna: Pathian’ Thutak a kimakaihna sang in mimal sum hau leh hihna sang neite’ thu/deihdan a saptuam kimakaih zaw i bang uhi. Pathian leh A’ Thutak nelhsiah leh limsaklou in mimal ngaihdan a thuzoh (brainwashed) leh pii in i om uhi. Pathian’ Thu tuh phaw (shield) lel a zang i bang uh. Huaiziakin, Pathian’ Thutak ah kiknawn a mimal kua hiamte sum hauh ziak hiam, dinmun poimohtak aneih ziak uh hiam a kithuzohsak mailou a Beria saptuamte banga Paul leh Sila thugen a dik leh diklou nitenga Lai Siangthou a a etchet gige (Nas 17:10-11) bang un i ngaihdan, theihdan, nasep dan, leh i kimakaih dante Pathian’ Thutak toh a kituak hiam etchian gige ding ahi.

 

2.    Saptuam Politic Hoihlouhna: Saptuam buaina, kisiatna tamzawte theology ziak hithou mahleh a taktaka saptuam politic ahi. Reformation hun in mimal hamphatna ding―sum, dinmun, thuneihna, etc. deih ziak in kivaihawmna dan hoih tuh zuih ahikei hi. Huaibangin, tulai inleng lal utna, thuneih utna-te ziak in thudik kimkhat leh sum-le-pai thahatna zanga gensiam hat thu a heutu leh upa tallangte thuzoh a agupna uh toh saptuam vaihawmna dan zuih maimai ahisek hi. Thudik kim khat tuh thudik ahikei! Lalna dinga mahni deihdan a midangte thuzoh hih paidan a suakta hi. Paunakte 29:12 in agen dik hi: “Vaihawm mi in zuauthu a ngaihkhiak leh a sikhate tengteng gilou ahi uh.” Kuahiam lalna dinga thudik kimkhat zanga semtu dang thuzohna in amaute kianga gilou chi a tuh hi.

 

DMK party apan Tamil Naidu CM 5 vei hilhial ana len politician Kalaignar Karunanidhi in, “Politic na theih ut uhleh CSI Church ah va pai un” chiin agen. Hiai apan gamsung politic sanga saptuam politic sang zaw ahihdan amuhtheih hi. I Pathian, politic a lunglut Pathian ahi i chisek ua, himahleh, mahni kipampuakna dinga saptuam politic i saidan Pathian lunglut ding in agintakhuai kei. Huaiziakin, Khrist’ Saptuam chidamna leh hoihna ding, a siangthouna kepbitna ding, akiphutkhiatna san sepsuah theihna ding in tulel a i saptuam politic puahthakna tuh alou theilou ahi. Kipuahthak ahihkeileh tunung saptuam maban ding gen ngamhuai kei hi.

 

3.  Thu Neihna Zatkhelhna: Reformation hun lai a Pope leh Bishop-te makaihna nuai a saptuam sinsaknate nial/kalh theihlouh bang in tulai in kuahiam heutu leh saptuam sinsakte leh paidante Lai Siangthou toh kituak zaw deuh leh chia advice pete or kalhte tuh heutu simmoh, heutu dou, saptuam dou chih min piak in om chetchet hi. Saptuam heutute sinsakna, makaihna, thuneihna, leh sum-le-pai muhna-te uh dot, advice, kalh theihlouh dinmun ah i om uhi. Huchibang a dotna bawlte etsoina leh koihna khat a koih in om a, deihsaktu di mi (e.g. pastor, tanau saptuam upa) aneih kei uhleh saptuam sung ah atakei uhi. Phetlou in, makai khenkhat in a thuneihna uh keklian in gamsung politic ah kihel in heutu hih nopsak thoh maimah uhi. Hiai bang dinmun ah Lai Siangthou toh kituaka mimal leh saptuam kipuahthakna tuh ngaihtuahphak ahikei. Huaiziakin, mimal hamphatna dinga thuneihna zatkhelhna apan kipuahthakna hih alou theilou a suak hi.

 

4.  Saptuam’ Siangthouna Mansuahna: Kum 1510 AD in Rome khua ah Luther a zin hi. Italy a Roman Catholic saptuam makaite (clergy) neksiatna, aguk a numei-pasal kal a thangtatna a kihel tampi amu hi (e.g. Renaissance Pope, Pope Judius tegel uang petmah). Saptuam in ahih di dawr a thunnunna bawllou ahihman in Luther lungtang anasak mahmah hi.

 

Saptuam dik leh diklou chiamtehna laka poimoh mahmah khat―thununna (discipline) ahi. Saptuam tuh Khrist mou ahi a, aneitu a siangthou banga khovel mite muh lel hilou a Pathian’ thupina dinga a siangthou ding chih ahi (Eph 5:22-23; Kil 19:7-9). Tulai in saptuam in khelhna ngaineu in church discipline ngaihzamna uang petmah a, kuahiam deihsakna tang khat khelhna a apuk chiang in politicize in a khelhna thilhih sangmah a saptuam a apoimohna uang gen in om a, a tungtang sai ding zekaisak (delay tactic) in heimang sawm teitei chihte saptuam koipeuh ah om hi. Thununna piaklouh khelhna in Khrist’ Saptuam siangthouna botlohsak a, khelhna maingalsak in Pathian ahihthangpai a, huan, khotang siatna atun hi. Church historian Gregory A. Wills in, “Thununna omlou saptuam tuh saptuam a sim ahikei” achi a, Martyn Lloyd-Jones in, “Thununna gingtalou leh zuilou saptuam tuh saptuam diktak ahikei” achi hi. Saptuam thununna ngaihsaklou/zuilou tuh Khrist’ Saptuam diktak ahithei kei hi. Huaiziakin, church discipline lam ah leng i kipuahthak ding uhi.

 

5.  Tanau, Sanggam, leh Beh-le-Phung Deihsaktuamna (Nepotism): Tulai in alangtang in Reformation hunma pek apan Roman Catholic saptuam a om saptuam office zuakna (simony) bang om chet kei mahleh, tanau leh sanggamte deihsaktuamna (nepotism) leh saptuam a dinmun sang (office) neih ut ziaka support-tu makai lunggulh ziaka sum-le-pai a phungvuhna a uang mahmah hi. Simony toh akilamdang tuan kei!

 

Tanau, sanggamte, leh beh-le-phung deihsaktuamna saptuam sung ah a uang petmah hi. Saptuam heutu tanau ahihkeileh beh-le-phung neite’n saptuam sung ah sepna mupah uhi. Apoi mahmah tuh saptuam heutu (pastor lak nangawn), tuailai, leh numei pawlte lak ah tanau pai, beh pai a kihuituamna om a, aguk in groupism bawlna om hi. Hiai banga group kibawlkhia tup-le-ngim tuh saptuam sunga politic play a amau tanau leh behte lalna ding, thupaina ding, huchia saptuam vaihawmna thuneihkhum (control) a minhoihna leh hamphatnate tan ding chih lungsim ngaihtuahna toh bawlkhiat ahi. Hiai group kibawl ahihleh friend circle ahikei, friend circle bel lawmta kipawlkhawm―mi tuamtuam, beh-le-phung tuamtuam apan ahi. Groupism in mi tuamtuam, beh tuamtuam apan himahleh saptuam sunga groupism tuh tanau-beh group ahi. Hiai banga beh politic saptuam sunga sai in Pathian’ Thutak nelhsiahna, midangte muhsitna, Pathian’ belamte lak ah kituahlouhna tun in khalam leh salam a Khrist’ Saptuam khantouhna a dal hi. Behte thugen ahih peuhleh amen, behloute thugen tuh dik thei ngeilou, amau beh group ahihkeileh behte khat kok kha a Pathian’ Thu kigen valh haksa sa agentu musitna toh athugen nolkhin hi zel. Reformation hun lai toh kikhiatna ding omlou ahihman in tanau, sanggam deihsaktuamna, leh beh politic hoihlou taktak apan kipuahthakna apoimoh petmah hi.

 

6.   Sum-le-Pai Deihtakna: Roman Catholic saptuam heutu Pope leh Bishop-te’n sum-le-pai a amau mimal hamphatna ding adeih ziak un Lai Siangthou’ sinsakna a tellou Indulgence a zuak uhi. Huan, saptuam sunga kineksiatna nasatak om in heutute summet bawlna munpi a suak maimah! Tulai in Roman Catholic makaite bang in dikloutaka thilhih heutu mohpaih ahikei, mohpaihtu dite leng dikloutaka thil ahihziak un amohpaih theikei uhi. Huan, saptuam in indulgence bang hial a sum muhna ding zuak aneikei, himahleh, saptuam makai khenkhat in sum-le-pai a hamphatna ding kia ngaihtuah in anei uhi. Pathian’ belamte it a veina sangmah in sum itna leh deihtakna nei makai khenkhat om hi. Khat veivei saptuam bang leng business company abatna chiang om hi. Huan, saptuam sung ah sum-le-pai neite mai-etna leh biakna leng a uang mahmah a, sum-le-pai neite’n deihsakna atang uhi. Saptuam dinsan leng sum abatna chiang om a, Khrist’ saptuam kiphuhkhiat tup-le-ngim tuh phokphak ahikei dekdek hi. Huaiziakin, Lai Siangthou in, “Dangka sum deihtak zaw gilou chiteng bul ahi” (I Tim 6:10) achih bang in sum deihluatna in politic hoihloutak saina tun a gitlouhna lungsim chi tuh in thil hoihlou a tunnak hi. Sum poimoh mahleh sum tuh thil tengteng ahikei. Sum-le-pai deihtakna apan kipuahthakna apoimoh nawn hi.

 

7.   Heutu Hih Nopsakna: Sum-le-pai mu, thunei ahihman un Roman Catholic makaite’n heutu hih nuam asa uhi. Huaibangin tulai in saptuam heutu hih nopsakna, mite zahtak utna a uang mahmah hi. Pathian in a nasemtu (servant), A’ belamte enkoltu, A’ thutak gentu leh sinsaktu, khalam leh lungsim lam damloute counseling petu leh thumsaktu hidinga a sapte i hihlai un, Reverend, pastor, Evangelist, leh local saptuam heutute khosak dante company a CEO bang in a lal ua, thu anei ua, celebrity-te bang in a minthang ua/minthan a sawm ua, mi thuzohna ding in sum pengam hial ua, reality star-te bang in vantang muh ah tallang leh minthan sawm in career bawl in platform tuamtuam―chialpi, camp, seminar, leh thugenna program ah politic play in kituklut ua, gamsung politician-te bang in saptuam sung ah politic nasatakin play uhi. Huaiziakin, Pathian hon sapna phokthak a mimal chih kivelchian a i kipuahthak chiat ding uh ahi.

 

8.   Sinsaktu Diklou: Roman Catholic saptuam heutute lal leh thunei ahihman un a sung uah kimai-etna a uanga, Pathian zahtakna leh A’ Thutak genna nolkhin ahi. Tulai saptuam sung ah leng heutute mai-etna, maivilna uang petmah a, Reformation hun sang in a uang zaw diam chih theih hi. Huan, hiai banga heutute mai-etna in Pathian’ Thutak, thugil, thugin sinsakna ngaihzamna, Khrist’ Tanchinhoih hihsiatna leh ahibangtaka gen ngamlouhna, khovel thilte etna, mahni deihdan a Lai Siangthou kaihna leh heikoina, Pathian’ Thu hing a belamte vak/etkol zohlouhna tun a, A’ thutak nelhsiahna tun a sinsakna tengteng pomna (liberalism) leh belamte veina sanga thildang veina tun in, emotion tungtawn a belamte vakna tun hi. Hiaite liberal leh sinsaktu diklou chiamtehna hi. Huaiziakin, kimai-etna hi zawlou a heutute kizahtakna, Pathian zahtakna, thugin sinsakna, Gospel ahihna bangtaka sinsakna, khovel thilte sanga vanlam thilte etna nei a, liberal sinsakna leh sinsaktu dikloute theichian in i kipuahthak ding uhi.

 

9. Emotional Worship Apan: Reformation hun lai in biakna toh kisai kipuahthakna―Roman Catholic saptuam biakna paidan leh thilhihte apan a om hi. Huaibangin, tulai a kha-polh biakna chih a om Pentecostal-Charismatic emotionalism leh manipulation worship, mihing bawltawm paidan/thil chiin Lai Siangthou’ sinsakna a tellou i lak ah hong lutte apan kipuahthakna apoimoh hi. Biakna a pau tuamtuam a pau (speaking in tongue), thum hun a music play, laa saksa sa tuantuan (repetitive songs), kitawm vonvon, leitual a kikhuk, tal a kisawn puk, kikou vongvong chihte ahi. Hiai bang biakna thil chiin tuh Pathian’ theihna tellou a mahni nopsak zawnga feeling leh emotion tungtawn a Pathian biak sawmna ahi. Mihingte emotional being i hih ziak un i feeling-emotion tuh music leh laa in a bawllamdang (manipulate) pahpah a hiai bang biakna addictive mahmah hi. A nuihzathuai khat tuh music play a kikou, kap a thumna nei, music a bei leh Kha nasep bei hiau! Music in Kha Siangthou control chihna suak, Kha in i ngaihtuahna, omdan, thumna a control ding hinapi! Huaiziakin, lungtanga Pathian’ Kha Siangthou houpihna tanna dinga hiai thil chiinte a sapkhiak theih ahikei hi. Huan, kitawm vonvon, lei lak a kikhuk, tal a kisawn puk, kikou vongvong chihte Lai Siangthou akigelh sunga doilutte om dan ahi (Hindu sahkhua zui pawl khenkhat inleng ahih uh), Pathian’ Kha nasepna ahikei.

 

Lai Siangthou’ sinsakna a tellou i chih chiang in hiai bang gingtate’n, “Pathian box sung khat ah koih ken un” (Don’t put God in a box) leh “Kha Siangthou hihmit/dal kei un” (Don’t quench the Spirit) achi uhi. Himahleh, Pathian box sung khat a koihna ahikei a, Kha Siangthou hihmitna leng ahikei hi. Pathian in Amah biak didan bikhiah (limit) leh standard nei ahihdan Lai Siangthou a hon sinsakte gen kihi zaw hi. Gingtute’n Pathian phat laa sa a kikou a, khuk di’n a, khut benga, laam a, lu kuun a, musical instrument tuamtuam toh Amah pahtawi a biakna nei dingte i hi uhi (Sam 63:3-4; 95:1-2; 96:1; Neh 8:6). Himahleh, i zalenna Pathian’ thunuai a kitahlut a, Lai Siangthou a biakna toh kisai zuih dinga kigelh thudikte akingak ding ahi.

 

Huaiziakin, Lai Siangthou a biakna diktak tuh “Kha leh Thutak a” biakna ahi (Johan 4:24). Biakna tuh i feeling ahihkeileh i nopsakdan ahikei, Pathian’ hihna theihna, A’ thu theihna, huai tungtawn a i lungtang, i kha, emotion luahdimna leh makaihna ahi. A’ thudik phokthak a―Khros a hon tatkhiatna, ahihdamna, abawlhoihna, angaihdamna-te ngaihtuah a huchia Jesu Khrist lam en a kumpite Kumpipa Pathian’ phatna lungtang tawnga hong luangkhia kipahna leh phatna ahi. Huan, biakna tuh i tunga Pathian hoihna leh nasepte ziaka kipahna toh Amah lam en a kipahthugenna, huai taklatna music kizang ahi a, music a ziak (means) ahikei hi. Banah, biakna mood leh kithalawpna ahihleh Pathian’ Thutak apan ahihding, music leh thildang apan ahihlouh ding ahi. Pathian i nopsak zawnga biak ding ahikei a, Amah deihdan a biak ding ahi zaw hi.

 

Martin Luther pat kipuahthakna i etleh mipi lamsang in saptuam heutute, a sinsakna dikloute, a chiindan dikloute, a gamtat hoihloute uh kalh a kipuahthakna ahi. Mimal huat ziak hiam in apan kei! Huaibangin, kuahiam mimal huatna nei leh saptuam dou a hiai article gelh ahikei hi. Luther kipuahthakna apat lai a saptuam dinmun bang in tulai inleng mipite sang in saptuam makai―Pathian’ Thutak nelhsiah, sum-le-pai deih, thuneih ut, tanau leh beh paite’n kipuahthakna apoimoh bik uhi. Mimal in kipuahthakna poimoh chiat mahleh makaite’n poimohna a lian zaw hi. Israelte’n Pathian thei heutu aneih chiang un lampi dik a pii in Pathian a kipaksak a, himahleh, heutu hoihlou aneih chiang un nam pumpi siatna atun hi. Simtu deihtakte aw, a tunga kipuahthakna dinga ka hon taklat point-te apan kipuahthak thei ding in i Toupa’n hon vualzawl hen aw!

 

Gelhtu,

Kapsuanmung

youngreformed@2023