(A call from secular mindset to
missional mindset)
I Khristian hinkhua i et chiangin a tamzawte i Pathian thu zaksate un hon bawlhoih mahmah ta
leh a kilawm hi. Mi tampi a bawlhoih leng a omta hi. Himahleh, Lamkate Pathian
thu za-le-thei tuk a za a thei khovel ah om kei ding chih thugen tampite apan i
za zel uhi. Dik dingin a gintak huai hi. Pathian thu i zak-le-theih tam tuk ua i
hinkhua, practical life mahmah a zui,
mission lungsim (missional mindset) pu i vang petmah zel uhi. Thugen siam tampite’n
guh dok zen in hon gen zel ua, himahleh ahon bun zou tuankei uhi. Hiaite bang
ziak hiding ahia? Lai Siangthou in tanchinhoih (Gospel) tuh a gingtate a dia hinna khektu thil hihtheitak ahi ana
chi hial hi (I Cor 1:18). “Pathian’ thu
tuh ahing a, thil ahihthei a, namsau hiamtuah bang
chibang sangin leng ahiam zaw a, hinna leh kha, guhlawi leh guhngek tuamkhen
hial khop in a sun thei a, lungtang a ngaihtuah leh tupte a theipah ngal thei
ahi” (Heb 4:12) ana chi hi. Himahleh,
Pathian thu a hiamsa, hon khektu i chih in ei a dia hiam lou a, hon khek zoulou
ahihleh bel bang hiam taksap khat om hiding chihna ahi.
Mimal (Individual)
I
mimal hinkhua uh i et chiangin, i kampau, omdan, nasep dante un Pathian in Lai
Siangthou tungtawn a hon thupiak, “Kuan
unla, nam chih ah nungzuite bawl un” (Matt 28:19) chih mission lungput atamzawte’n i nei kei uhi. A tamzawte’n gingloute
lungput pu in sum deihtakna toh muhna diklou leng poisa lou in Manipur system ahi chih paulam a nei in
Pathian deihlouh dan in i gamtang nak uhi. Poi mahmah! I kichiamtehna uh thumal
“Sunday Christian” a dik mahmah hi.
Sum
dawng in dawr i bawl ua, mi inn luah sak in, private school tuamtuam ah sum i
dawng ua, sum muhna hoih mahmah suak in i khosakna uh hon panpih petmah a, i
hauhsakloh hial ua kipahhuai kasa hi. Himahleh, apoi mahmah tuh Khristian hinapi
in missional mindset or tanchinhoih
lungsim put neih ding ahihlam i mangngilh uhi. Lamka a private school neite tengteng Khristian vek i hi ua, kipahhuai
ahihziakin, school thuneitute’n mission
lungput neilou, phetlou in mihehpihna, lainat, itna tellou (abikin mizawngte)
in fees leh uniforms ut hunhun a khangsak mok zel uhi. Hiai toh kisai “none of
your business” na chi kha maithei, himahleh Khristian i kichih leh i nungzuihpa
(Jesu) sinsaknate Lai siangthou apan i khalam, salam leh i niteng hinkhua a hon
makaihtu ding ahihman in, “it’s absolutely a Christian business” ahi. Lai
Siangthou in gingtute itna, lainatna, hehpihna a hinding ahihdan hon sinsak
genkhia lel i hi.
Huaiziakin,
gingtu khat i hihleh Pathian thupiak bang in dawr a van i zuakte, i schools te
ah sum ka muh a, naupangte’n lai a sim uhleh hun chih kia tup-le-ngim (motive or intention) a neilou in
Lai Siangthou hon sinsak mission
lungput nei in hih lehang i nasep himhim ah salam leh khalam ah gah dik kisuang
khe ding hi. Sum-le-pai poimoh lou ka chihna hikei, himahleh i hinsan Pathian mission nasep, Jesu Khrist in a nasep
hon nutsiat sembuching a, nasep khat peuhpeuh ah huai mission lungput i neih masak ding chi i hi zaw. Huan, mission lungput tuh bang chibang a midangte panpih thei ding, piangthak
loute Jesu khebul ah piilut thei ding chihte ahi. Hiaite tellou in gingtute
nasep khat peuhpeuh a bukim kei hi. Mite hehpih a, lainat a, na hoih sep tuh
Pathian in a vanzat thupitak in a zang hi. Huaiziakin, na khat peuhpeuh i sepna
ah mission lungput i neih ngeingei ding
uh ahi.
Saptuam (Church)
Local
saptuam sunga department tuamtuam leh
saptuam pumpi nasep dante et in mission
nasep tup-le-ngim dik (right intention)
toh sem tamlou om a kipahhuai i sa ahi. Himahleh, a tamzawte mission lungput (missional mindset & attitude) neilou, a minpu maimai a mission nasem a tam mahmah mai hi.
Local
saptuam sunga mission nasepna di tam
mahmah a, panpih ngaite panpihna, khamtheih hih zongsangte panpihna, innkuan
kisiate panpihna, dah a lungkham kingaisiate tanchinhoih toh houlimpih a khalam
leh salam a panpihna nasepna leh a dangdangte. Himahleh, hiai bangte i sem tham
a, ahihziakin mission lungput
kichiantak omlou in i semkha sek uhi (a sem kha bel om tham). Mission lungput toh semlou in i sepkhiaksate
ah i kisuang mahmah lai uhi. Local chih a department
tuamtuam; Numei pawl, Tuailai pawl leh Mission department te nangawn in leng projects leh year plans i
neihte, na i sepkhiakte ah missional
mindset leh attitude nei kichian
lou in i mangngilhta uh a banga, poi mahmah, huai sanga tulai khovel lungput pu
in, kou tuailaite’n hiai bang nasem, kou sum-le-pai hiai zah ka thoh ua, mission na kasem uh, kou nasep lou kua
ahia hiai bang nasem chiin i kichaphousak zomah uhi. Hiai ahi secular mindset toh mission nasem chih paulam a nei. Mission nasem kichi in mission
lungput pukha lou. Saptuam mission school
te tuh sum muhna buk lel suak bangta a, bang chi leh naupangte Jesu khebul tun a,
mizawngte panpihna nasem ding chih a om nawnta kei hi. Poi mahmah! Saptuam in mission school i neihte tup-le-ngimte
tuni chiangin kidot thak a, ngaihtuah thak poimoh kha ding bang hi.
Philanthropic
organization
Philanthropic
organizations a heutute gingtu Khristian vek i hi uhi. I society sung ah na hoih tampi i semkhia ua, kipahhuai petmah kasa
hi. Amaute tungtawn in Pathian in i society
chidam sak a kipahhuai. Himahleh, i nasepte enkik lehang salam vai sahkhua toh
kisai khalou secular mahmah a, khalam
vai gingtute mission lungput ding
mangngilhta i bang uhi. Gentehna in, guta i man ua, ahoihna ding un i zep ek
ua, thuhilhna chi in i khahzel uhi. Hoihna ding, hotdamna ding leh mi lungsim
kikhekna (change) taktakna dingin
“force” in thil a hihthei tawm mahmah, mi khenkhat kikhekna tun sam mahleh.
Huaiziakin, mikhialte pumpi (wholistic
change) bawlhoih a khek taktakna dingin Pathian’ thu Gospel loungal a om kei hi.
Mission nasep tuh deihtel
theih (optional) ahikei, thupiak ahi
David
Platt in, “Mission nasep tuh saptuam program optional, ban ah mi bangzah hiam
huai nasem dia sap leh telkhiakte a ding kia ahikei. Himahleh, gingtu Jesu Khrist
nungzuite a dingin i hinsan uh ahi” ana chi hi.
Khristian i kichih leh, mission lungput neih ding tuh i mohpuak ahi. Mi khenkhat mission lunglut lou om a, himahleh Jesu nungzuite a dingin Pathian in ei lam a lunglut leh lutlouh genlou in mohpuakna hon na pia top mai hi. I hinsan leng ahi a, a dik mah hi. Khenkhatte a kuan khe ding, khenkhat thumna leh sum-le-pai a nasem dinga sapna tang i om chiat uhi. Himahleh, gingtute tengteng mission lungput nei a mission nasem ding (I hinkhua mahmah, i kampau om dan, nasep dante a mission lungsim neih ding ahi) dinga sap a omte i hi uhi. Evangelist minthang D.L. Moody in tuh niteng in mi khat zel kiangah Gospel tanchinhoih genpih sawm in panla a, agenpih zel hi. Tanchinhoih genpih ding mi zong in a delh thoh hun bang anei zel hi. Hiai ding mah ahi tanchinhoih gen dinga phattuam ngaihna (zeal) i neih ding. Huan, mission nasepna mun dang a kuan khia, thumna leh sum-le-pai thoh kia in neusak (limit) sak kei ni. Mission nasepna tuh hiai thil thum khen a lungtang leh lungsim a mission lungput nei a Jesu thupiak zui a atak a sepsuahna ahi. Lehlam ah, hiai bang lungsim nei theilou, semkhia thei mahmah lou i hihleh, mission nasem dinga thu hon pepa Jesu Khrist toh mimal kizopna neilou kihi maithei a, kivel chet ding ahi.
I
niteng hinkhua zatna, nasepna, sumsinna, office,
school, mi toh kihoulimna, laa sakna, bang hiam vai a kimuhkhawmnate (picnic, bbq, family gathering), local department tuamtuam a year plans te, biakna, thugenna, small group fellowship, panpihna nasepte
a mission lungput i neih teitei ding
uh ahi. Mission lungput neilou a
nasepna himhim a bukim kei hi. Na hoih tampi mission lungputna toh i sep keileh i na hoih sep bukim lou ding
ahi. Pathian’ mission tuh khovel a mikhialte
hotdamna ahi. Huai dingin gingtute tengteng i hoih leh chit ziak hilou in hamphatna
(privilege) hon pia a, hiai bang
hamphatna pen hamphatna a la a thanuamtaka i nasep tengteng a mission lungput nei kawm a sep ngeingei ding
ahi.
A
tawpna dingin, gingtute’n i hinkhua a i nasep leh thil hihte tengteng ah mission lungput nei chiat lehang i mimal
hinkhua, inn sung, saptuam leh society
a nop didan vangam chiamlok kihi
ding ahi. Jesu Khrist in thum didan hon sinsak, “…Na deihlam van a kihih bangin, lei ah leng kihih hen” (Matt
6:10) a chih vangam i tunma in atak in hiai leitung ah hong tangtung ding hi.
Pathian in gingtute tua ding in ahon deih hi (Heb 12:28). Huai dingin Jesu
Khrist thupiakte limsak in zui lehang hong tung ding hi (Matt 7:21; 10:7-8).
Vangam tuh i sih chianga gingtute tangtawn a omna ding mun himahleh, leitung a i
hin sung in leng a zal zouthei ding (Heaven
is an eternal reality after we die, and it’s a present reality on earth if we
meet Jesus and follow him) i hi chih mangngilh kei ni. Huaiziakin, mission lungsim pu in Jesu thupiakte
sem lehang, i society hiai
sangin hong hoih zaw dinga, muhtheih in hong khang dinga, saptuam mission nasepna nasatak in hong khang
dinga, Pathian mission leh a hon
sapna semkha ding i hihman in Pathian a lungkim dinga, Amah lungkimna in ei gingtute
a hon lungkimsak ding hi.
Kapsuanmung
09/01/22
0 Comments