THUMAPI
Mi bangzah hiam ding kawm in ka ki
umkual ua, Laisiangthou thu toh kisai leh gindan Laisiangthou apa’n mitampi’n
amau ngaihdan a la a, kai kawi a, thugin diklou tampi hon bawlkhia uh ahihdan
leh doctrine dik hinkhua a poimoh ihih dan kaki kup lai un ka kiang ua ding
lawmte khatin, “Jesu Kris ka gintak
nakleh doctrine ka poimoh kei!” a hon chi hi. Huchiin, kenleng bangdang
ngaihtuah sau hetlou in, “Hiai thuvual na
genkhit lel lehleng na doctrine hi khin ahi chih phawk lou tel na hi hia? Jesu
Kris na gintaka, doctrine ka poimoh kei na chih leh na mi gintakpa theilou
hikha zaw ding hive chin aw.” chiin ka dawngsuk kha paha, ka khonung
ngaihtuah leh kisuanlah huai ka sa mahmah hi. Himahleh, thudik hilh ka hi chi
in kaki hehnem hi.
Doctrine chih thumal maimai i
genkhak chiangin kuakua te hiam in zadah mahmah ua, phetlou in a hehthei pawl
bang om hi. Hichi bang ngaihtuahna i neih theih mawk uh hi lamdang kasa hi. Gingtu
Laisiangthou simmun mahmah kichi te tata bang hichi bang omdan in i om mawk
uhi. Alehlam ah, Laisiangthou kichi aki gelh bangbang, a gen bangbang a i pom
utlouh ziak uh hi dingin gintakna lianpi ka nei a, huaiziakin doctrine bang hi
hiam chih saulou a gensawm ihi.
DOCTRINE HIHNA
Doctrine i chihchiang in ‘thugin
ahihkeileh kisinsakna’ chihna ahi a, i hinkhua a i zuihte genna ahi. I
laisiangthou mun tuamtuam ah doctrine diklou apan kiven ding thu ahah gen
mahmah hi (Eph. 5:11; Rom. 16:17-18; 1 Tim. 4:1; 2 Jn. 1:10; Rom. 16:17). Huan,
chiangtakin Doctrine poimoh ahihdan aki muthei hi. Kisinsakna poimoh lou hi
henla, Doctrine dik poimoh lou hileh Jesu’n, “Kei mah lampi, thutak leh hinna (Johan 14:6)” achi kei hial ding
hi. Doctrine i gen chiangin Laisiangthou polam a om, mihingte bawltawm bangin i
koih ua, i ngai poimoh kei uhi. Himahleh, Doctrine bawlkhetu mihing hizaw lou
in Pathian hizaw ahi chih i laisiangthou ah i mu thei hi. Mihingte’n
Laisiangthou a omsa thute gen lel ki hi ahi chih phawk le hang deih huai kasa
mahmah hi. Doctrine tuamtuam bangziaka hichi tam hi hiam chih i ngaihtuah
chiangin Laisiangthou in a thu-tun pen bang hi ding hiam chih mihingte’n i sut
sang mah unleng “KEI NGAIHDAN A HIAI GEN AHI.” Chih a hongtam luat ziak hi zaw
hi. Doctrine i gen chianga theih tuak mahmah tuh; a dik leh a diklou om ahi
chih theih a poimoh a, a dikte i poma, i zuih ding leh doctrine diklou apan a
iki ven ding tuh Laisiangthou deihdan ahi (Ezek. 13:9; Jer. 14:14; Mat.
16:11-12; 24:24; 7:15-21; 2 Tim. 4:3-4; Nas. 20:28-30; 1 Jn. 4:1-6; 2 Pet.
2:1-22).
DOCTRINE DIK POIMOH NA
Doctrine dik poimoh na tampi
a om a, i hinkhua hon makaih tupen leng ahia, huan, Pathian deihdan theihtheih
na leng ahi hi. Huaikia leng hilou in, sinsakna tuamtuam, sahkhua gindan
tuamtuam apan hon vengtu leng ahi hi. Khenli in i khen ding:
1. 1. Amasa penpen in Doctrine dik poimoh
na tuh Pathian’ thu leh a vaihawmna dik toh kisai tomkim tak leh theihsiam
theih dingin a hon hilhchian hi. Tehkhinna ah, Tatna toh kisai kisinsakna
(Doctrine of atonement) tuh i laisiangthou bu-teng ah kimu vek leh Pathian’
ngaihdamna toh kisai aki genkhakna tang te tengteng lakhawm in tomkim tak leh
theihsiam theih dingin hon bikhiah hi-Thukhunlui a gan’ sisan a kithoihna apan
in Kros ah Jesu Kris sihna, ei mohna teng pua, ei sik-leh-tang a Pathian’
thangpaihna hong thuak chih tomkim takin doctrine in a hilh chian hi. Jesu Kris
theihchetna leh ahihna hon thei chiansaktu ahi. Doctrine poimoh lou hileh Jesu
Kris i theikha se kei ding uhi.
2. 2. I hinkhua a i thil gintakin hon pi leh
hon makaih ahihmanin Doctrine dik i theih leh i pom a poimoh mahmah hi. Paul in
Korinth saptuamte kiangah, “Mu thei a
pailou in, ginna in I pai zaw zel uhi/We live by what we believe, not by what
we see.” (2 Korinth 5:7) ana chi hi. Huaiziakin, Jesu Kris tuh ei hon
tanpa, amah ziaka Pathian toh kilemthei a om ihih dan gingtate ihih ziakun amah
a ginna toh i hing uhi. Himahleh, sahkho dangdang te’n Jesu Kris pathian ahi
achi ua, himahleh ei gindan in a gingta kei ua, a hindan uh tuam leh a paipih
uh a tuam hi. Amau Kris hondampa in a pomkei ua, hotdam a hih theihna dingun
thilhoih hih ah bang pan ala nak mahmah uhi. Himahleh, thugin diklou (doctrine
diklou) a gintak ziakun hotdamna a mukei ding ua, Pathian toh ki zopna a neikei
ding uhi.
3. 3. Doctrine dik pomna tuh gahsuangna
ahi. Doctrine dik i chih chiangin a thu kia ahikeia, hin a hin khiatna ahi.
Huaiziakin, Doctrine dik poimoh na tuh gah i neihtheih na dingin a poimoh nawn
hi. Na thugin gintak in na hin dan ding ahon bikhiah sak hi chih theih a poimoh
mahmah hi. Paul in Upa hihtheihna ding leh chitna te agenna ah; a sinsak ding
uhleh huai hinpih ding ahihdan a gen hi. Hiai gel ki khenthei ngeingei lou ding
hi (Tita 1:5-9; 1-16; 2:1-10; Isai 55:10-11)
4. 4. Doctrine dik in nang a hon veng ahi.
Puktheihna suang leh melmapa Setan in Saptuam sungah mite zangin Pathian’ thu
dik leh doctrine dik suksiat sawm in pan nasatakin ala a, mi tampite ngeileng
huaite a i puk ua, Pathian hihna leh a mel i susia ua, i hindan uh i
Laisiangthou deihdan lou a hingin pialmang tampi petmah i om uhi. Huaiziakin,
Laikhakte ah Doctrine dik sinsak ding, zui ding leh Doctrine diklou leh
sinsaktu diklou apan ki ven ding thu ahah gen mahmah hi. Aziaktuh, Doctrine
diklou in i hotdamna a hon ginglel saka, i gamtat khohei, mite toh iki zopna a
susia a, gindan diklou hon neisak a, Pathian apan hon gamla sak tu leh tanchinhoih
nasatakin a susia hi. Huaikia leng hilou in Pathian’ hihna nasatakin a susia in
a gense nak mahmah hi ( Lk. 6:26; Mat. 7:15-20; 16:11-12; 24:24; 2 Tim. 4:3-4;
Nas. 20:28-30; 2 Pet. 3:14-18; 1 Jn. 4:1-6; 2 Pet. 2:1-22; Jud. 1:3-4; 1 Tim.
4:1-5; 6:3-5; Rom. 8:7; 2 Thes. 2:3; Johan 17:17).
THUKHITNA
I hinkhua ah doctrine
in hon makaih ahihna ah poimoh lotel mah ahi. Poimoh lou hileh I laisiangthou
muntampi ah doctrine dik sinsak ding thu bang, doctrine diklou apan kiveng ding
leh pomlouh ding ahihdan ahah gen mahmah kei ding hi. Huaiziakin, Gingtu khat
na hih a, Laisiangthou ka makaitu ahi na chih leh Doctrine poimoh dan na thei
ding hi. Huchilou a thei khollou na hih a, doctrine poimoh lou naki chih leh ki
velthak na ding atam mahmah ding chih a chiang mahmah hi. Hiai thu saulou
tungtawn in Pathian in i hinkhua ah amah a dinga kalsang zaw suantheihna hial
hon tuntu leh iki bawl thakna ding in simtute hon vualzawl chiat hen.
Munga Guite,
Young Reformed
0 Comments