Biakna
Dik Bang Ahia?
Mi
tampite’n biakna dik i thei ua i zui uhi. Himahleh a theichian lou tampi
leng om dingin ka gingta hi. Biakna i gen chiang un; musical instruments tuamtuamte―drum
sets, guitar, lyres, lutes, etc., choirs,
laa sakna, thumna nei (citing) leh a
dangdangte i lungsim uah hong ompah in, i biakna theihdan uh leng ahi mai hi. Tanchinhoih
Johan 4 a biakna dik toh kisai a Jesu leh Samari numei kihouna in i mit uh hon
vaksak mahmah hi.
Johan
4:20 ah, Samaria numei in ka pupate un hiai tang (Mount Gerizim; Deut 11:29;
27:12) ah Pathian a bezel ua, himahleh nou (Judate’n) Jerusalem (2 Chron 6:6;
Sam 48:1-2) ah Pathian biak ding na chi sese uhi chi in Jesu kiangah agen hi.
Jesu’n v.21 a kiangah, gingta in, a hun a hong tung dekta hiai tang leh Jerusalem
chitchiat lou a Pa na biak hun uh ahong tung ding hi. V. 23, ahun a tung dekta,
tu inleng a tung lel, huai hun chiangin Pathian be taktakte’n “kha leh thutak” in
Pa abe ding uhi chiin agen hi. Jesu’n mun-le-mual kia a Pathian biak ding chi a
gindan Samarite leh Judate’n a neih uh diklou ahihdan a hilhchian hi.
Biakna dik
bang ahia? Jesu gen apat in biakna dik tuh “kha leh thutak” a biakna ahi. Tang 24
ah, Pathian tuh Kha ahihman in abe mite’n kha leh thutak a biak ngeingei ding
uh ahi, huai hun a hong tung ding chiin agen hi. Pathian tuh Kha ahi, ei banga
taksa (physical being) hihna nei
ahikei hi. Hiai toh kisai i theih chiatsa uh ahi.
Kha leh
thutak a biakna bang ahia?
(i) Kha (pneuma)―huih (wind), naak (breath), hinna petu (life-giver),
khalam sunggil (inner spiritual life)
chih ding ahi. A khiakna tuh Pathian i biak chiang ua i kha tengteng, i khalam
sunggil apan, i hinna tawng apan, leh i lungtang tengteng ua biak ding chihna
ahi. Gendan dangah, i pumpi i taksa, i kha, i hihna leh i hihna tengtenga Pathian
biak ding ahi. Huaiziakin, biakna dik tuh i lungtang tawng, i khalam sunggil
apan hong luangkhia Pathian itna, Amah zahtakna, ngaihsanna, pahtawina leh
phatna ahi.
(ii) Thutak (truth)―Lai Siangthou
a Pathian hong kilakna–Jesu Khrist sa hong suahna, Lai Siangthou a A’ Thu tuh
thutak ahi. Gendan dangin, Pathian hihna theihchetna ahi. Hiai in a etsak ahihleh
biakna dik thiltup (object) Jesu
Khrist ahi (vv. 23, 26).
Huaiziakin,
biakna dik lungput leh hon kilawpsaktu (attitude
& motivate) tuh i lungtang tawng apan hong luangkhia Pathian itna,
ngaihsanna, zahtakna, leh pahtawina ahih ngeingei ding ahi. Huan, biakna dik
lungput ahihleh Pathian deihdan leh Laisiangthou a thudik toh i biaknate a
kituah (conformity) ding ahi. Thil
bangmah dang ahikei hi. Etsakna in,
biakna i neih chiang ua duty banga hihlouh
theihlou banga a ngai, ki force thoh,
emotion, music, keyboards, thumna
nei (citing), laa sa, minthanna,
heutute pahtak utna, siamna lahkhiakna, mun-le-vanzatte ahi kei hi. Pathian
itna ahi, musical instruments, emotion,
thumna, lasak chihte leng huam kha tham mah a, himahleh biakna hon panpihtu lel
ahihman in a primary hilou in secondary ahi.
A tawpna in,
biakna dik tuh Pathian theihchetna leh i lungtang tawnga pan a Amah itna,
zahtakna, thupina pia a, pahtawina pia a, Amah a nopsakna leh lungkimna ahi.
Dotna ka hon notsiat ut ahihleh biakna nei a biakinn or devotion na neihchiang un bang lungput nei in na hihzel ua? Bang in
na biakna uh hon motivate masapen a?
chih ngaihtuah dingin ka hon ngen hi. Lungtang tawng apan Pathian itna tellou
ahihleh kivelthak a biakna dik nei dinga pan lathak dingin i kichial uhi.
Gelhtu,
Mr.
Kapsuanmung
0 Comments