Lau Kei Ni

 

Lau Kei Ni

Lau kei un, kei lah na kiang uah ka om ngal a; mangbang kei un, kei lah na Pathian uh ka hi
ngal a: ko’n hatsak ding a; ahi, k’on panpih ding; ahi, ka diktatna khut taklam in k’on len gige
ding (Fear not, for I am with you; be not dismayed, for I am your God; I will strengthen you, I will help you, I will uphold you with my righteous right hand) Isai 41:10.

Mihing in lauh ding kihau mahmah a, beidot mahmah hun in leng hon bawm thei zel hi. Huai hun laitak in i kianga om ding i poimoh a, mi muanhuai i khut a hon len a hon galkai pih ding, hon thuak pih ding i poimoh petmah hi. Kibah lua ahihman in, hatna, panpihna, huhna chihte kipoimoh petmah hi. Huai bangteng i ngah chiangin hinman om kisa a i kha mahmah tawldam hi. Huchibang ahihlouh chiangin khakham vei in sihloh theih hial hi. Lauhna, beidotna, panpihtu ngaihna hinkhua zangkha i hihleh hiai Bible tang ei a dinga kigelh ahi.

Hiai lametna kampau pen, Pathian mi, Israelte’n haksatna tawpkhawk atuah lai ua Isai in Pathian apan khamuanna agen ahi. A haksatna tuah ziak uh leng kua dang ziak ahikei a, amau hihkhelh ziak ahi zomah hi. Isai hun lai in a khelhnate uh tam mahmah hi; thutak hei kawi ua, a zawngte nesia ua, Pathian hing biakna apan milim biakna ah kihei ua, Pathian a pan panpihna ngetsang in, milim bete kiang leh sepaih thahatna panpihna ngen zaw ua, Pathian deihlou in a thupiakte pampaih ua, khalam leh taksalam hindan ah Pathian toh thukhun om pen sukham uhi. Hiai teng ziaka Babylon te’n a khua uah pomang uhi. Namdang thuneihna nuai ah om, a khua uapan puakkhiat hilai ahih ziak un mangbang mahmah uhi. Pathian mite ahih ziak un, amau thilhih ziak mah a mangbang himahle uh, Pathian in hihhat ding leh panpih ding ahihdan chiam veve hi. Toupa a thuchiam ah amuanhuai dan leh itna, hehpihna ahauh dan chiang mahmah hi. Ei ut dandan a khial a haksatna i tuah hun in leng, amah mizia, itna leh hepihna toh hon it veve hi. Kihampha petmah hi.

Isai 41:10a, “Lau kei un, kei lah na kiang uah ka om ngal a”
Israelte hiai mun ah saltang himahle uh, hiai thuchiam pen tulai gingtute a ding in leng zattheih vek hi. I Toupa kibang ahihman in. A masapen ah, “Laukei un” chi a, a lauhlouh ding ziak uh toh genkhawm ngal hi, huai tuh, “kei lah na kiang uah ka om ngal a” Pathian akiang ua om ahihziaka laulou dingin hilh hi. “Toupa a mite kiang ah om gige ahi” chih ataktak (kam kia a gingta tamlua hi) a gingtalou te a dingin, lauhna toh hinkhua a zat tai dimdem theih hi. Israelte leng hotkhiat a om nailou, haksatna thuak lai ahihman un “Toupa i kiang uah a om” chih gintak haksa sa uh hi ding ahi. A taktaka gen in ah, en phawk kei lehang leng, en thei gige kei lehang leng, amah gingtate kiang ah Toupa om gige hi. Gingtute’n hinkhua, maban ding khawng lautak a i zat ding uh hilou hi, “Toupa’n hon ompihna ahi” i chih theih zawk ding poimoh mahmah hi. Ei thil hihkhelh ziaka lau a om i hihleh Toupa zuan ni, aman hon ngaidam dinga hon lungmuangsak ding hi. I laisimna ah, innkuan i vaihawmna ah, i nasepna ah, “Toupa lam ah pang kahi, Toupa’n hon ompih ahi” chih thei kawm gige in kalsuan le i lauh mahmah, i tuahsa leh tuah nailouhte a theng in thengkei zong in Toupa toh kizou ding hi. I lauhte a then apoimohpen ahi kei a, Toupa toh i zohkhop a poimohpen ahizaw hi. Toupa hil hial in “lauken” hon chih leh “hilehle” chi sese lou a, thutaktak a i lak ding ahi. Laulou a Toupa ompihna phawk gige di’n Toupa’n hon ompih hen.

 

Isai 41:10b, “mangbang kei un, kei lah na Pathian uh ka hi ngal a”
Anihna ah, “mangbang kei un” a chi a, a mangbat louh ding ziak uh toh gen ngal hi, huai tuh, “Kei lah na Pathian uh kahi ngal a” chih ahi. A mangbatlouh ding ziak uh tuh Toupa a Pathian uh ahihziak ahi. Hiai Toupa, a Pathian uh tuh, namdangte pathian toh a kibangkei hi. Isai 41:1-9 tan ah Toupa amah-le-mah hihnate kipuang hi. Ama deihlam sem dinga amah gingtaloute nangawn zangtheih ahihdan gen a (v2- suahlam apan= Perisa apan Cyrus II), namte kipatna leh namte sumangtheitu ahihdan gen hi. Huaban ah hiai Toupa pe’n mihing hinna siamtu hi a, khovel ama chihdandan in pai hi. Hichibang a thunei leh thilh hihthei Pathian nei na hihman un, mangbang kei un, chi hi. Mihingte i mangbat khak zel ziak tuh i gintak Pathian i gintak dan aneu ziak ahi. I buaina leh haksatna leh poimoh i sakte ah hong kigolh a thil paihoih sak thei ditan a i gintaklouh ziak khawng hi nuam mahmah hi. A diktaka gen in Pathian khutma tellou a, ei panhat ziak a thil i ngah lah om mahmah lou. I ngaih poimohte, i maban a thil i hih dingte, i thuakgimna te, i lunglelhnate, hinnuamlou i saknate ei kia a thuak a, ei kia a mualsuah ding chih ngaihtuah lehang mangbat huai ding mah ahi. “Kei kia a pang kahi” chih ngaihtuahna toh mi tampi kimangbang petmah hi. Gingtute huchibang a beidong leh mangbang dingin Toupa’n hon phallou hi. Ei kia i ki sak khak leh mangbang ding mah i hi a, i Toupa, i Pathian’ hihna, hon ompih detna, hon itna leh lainatna thei gige lehang i mangbang kei ding hi. Ei kia i ki ngaihtuah leh mangbang ding mah i hi a, ei sanga thupizaw, thil hihtheizaw, leh a penpen i Toupa toh pangkhawm i hihlam phawk gige lehang i mangbang kei dinga, Paul bang in “Amah hon hihhatpa ah thil tengteng ka hih thei hi” (Philippite 4:13), i chitheita ding hi. Toupa toh kisai i ngaihtuahdan a dik masiah i mangbang den ding hi. “Toupa nang toh kisai, a dik in hon ngaihtuahsak inla, hon theisak in,” chi’n thum ni.

Isai 41:10c, “ko’n hatsak ding a; ahi, k’on panpih ding; ahi, ka diktatna khut taklam in k’on len gige ding.”
A thumna ah, Toupa’n “hon hatsak ding,” “hon panpih ding,” leh “A khut taklam a hon
len gige ding,” ahihdan gen hi. Israel te’n haksatna tawpkhawk a tuah hun ua apoimoh penpen uh tuh, hatna, panpihna leh huhna ahi. Toupa’n a lauhna uh leh a mangbatna uh a then ding kia adeihkei a, a hat ding uh leng deih a, huai ban ah huhna leh panpihna leng poimoh chih thei ahihman in huaite leng piak chiam hi. Ei ngaihtuahna sangin Pathian ngaihtuahna chiim zaw a, en poimoh i chihte sangin aman poimoh a chihte bukim zaw hi. A saltanna uh a thuakzohna ding un Toupa’n hatna chiam hi. I buaina leh i ma/lampi a sing lian pipi om, i lampi pai hon nawngkaisak a haksatna hon tunte omkei hen kichi theilou a, khovel in khelhna gu thuak ahihman in a om teitei hi. Huai hun chiang in, “om kei leh hoih di” chih sang in palzoh na ding, kan zoh na ding hatna kipoimoh zaw hi. Toupa’n leng buaina om louhna hinkhua hon chiam kei a, huai buaina apan hatna, panpihna leh huhna hon chiam zaw hi. I Lauh hun in khamuanna hon chiam a, i bah hun in hatna leh panpihna pe dinga hih dan hon chiam hi. Toupa’ lampi leh mihing hihna lampi lelleng ei kia a paisiamlou i hih lai in, Toupa’n a khut taklam a hon len gige ding ahih dan hon chiam hi. Toupa’n a let-te bit ua, Toupa’n a let-te hat ua, panpih in om ua, laulou ua, beidong lou uhi. Toupa muang ding in, na lungtang Toupa’n hon nemsak henla, Laulou ding in a ompihna hon phawksak gige henla, Beidong lou dingin a Pathian hihna hon theichiansak henla, Hat thei ding, panpihna dong thei ding leh Toupa’n alet mi hithei ding in Khalam pianthakna hon pia hen.

The 18th January 2023.

By Liansuanthang H.