“HOSANNA”
BANG CHIHNA HI HIAM?
“Hosanna” chih kammal tuh kammal minthang tak ahi. Ei
pau ahihlouh hang in ei pau bang a kizang khat ahi. Tumnah Ni (Palm Sunday)
teng in aneu-alian in lampi zui kawm toh kikhopna innte khawng ah ki-awng
zuazua hi. Huchituk a minthang a aneu-alian in zum-le-zah khuallou a agen ngam
uh leh a kikoupihngam uh kampau tuh bang chihna hi mawngmawng ding hiam chih
ngaih sut huai hi. Huai ding in “Hosanna” kammal hong kipatna i
Laisiangthou sung apan sut ni.
“Hosanna” kammal tuh English kammal ahi. Hiai English
thumal ahihleh Greek apan kilasawn ahi a, huai Greek kammal tuh Hebrew apan
kilasawn nawn ahi. Huaiziak in “Hosanna” kammal tuh Hebrew pau apan hong
kipan khia ahi. Hiai sang a ngentel zaw in ensuk ni.
“Hosanna” tuh Greek ah Ὡσαννά (Hosanna) ahi a,
Hebrew ah הוֹשִׁ֘יעָ֥ה (howosiah) ahi. Thukhunthak ah “Hosanna”
kammal tuh gukvei muh in a om a [Matthai 21:9 (nihvei), 15; Marka 11:9,10;
Johan 12:13]. “Howosiah” Hebrew kammal ahihleh Thukhunlui ah khatvei kia
muh in a om hi. Sam 118:25, “Toupa aw hehpihtak in (hondam) inla, Toupa
aw, hehpihtak in vangphatna hon sawl in.” Hiai Bible tang a “hondam” thumal tuh
“Hosanna” kammal ahi.
Huchi
ahihleh “Hosanna” bang chihna hiding hiam? A paubul, Hebru ah הוֹשִׁ֘יעָ֥ה (howosiah) tuh thumal nih
kigawmkhawm ahi. Amasapen יָשַׁע- “yasha” ahi a, “hondam ding ahihkeileh
honkhia” chihna ahi. Ban ah, אָנּאָ – “anna” tuh, “hehpihtak in, kon
ngen ngutngut” chihna ahi. Huaiziak in hosanna thumal khiakna tuh Pathian kiang
a “hehpihtak in hon hondam in” chia thum ngutngutna kammal ahi. Hiai thumal
kizatna Sam 118 pumpi simsuak leh a kithei khat ahihleh hiai Sam gelh tupa’n
mihing sang a Toupa a muan zawkdan gelh a, kumpite sang amuan zawkdan gelh a,
huaiban ah, nam tampite’n umkimvel leh leng, Pathian a hatna, kibukna leh
hotdamna hi a, Toupa min a huaite satkhe ding ahihdan nasatak in gen hi.
Thildangte hutkhiat ding sang in, a hunkhe dia midangte leh thil tuamtuamte
asap sang in Toupa a sam ngitnget hi. Toupa nang mahmah in hon hunkhia in a chi
ngitnget hi. Eite leng, thildang sang in, i dinmun chiat ah Toupa mah in hon
hunkhe leh kidetdou ding hi. Sum-le-pai, hauhna, lawm-le-gual, mihingte leh
mahni kithununzohna khawng in i dinmun apat hon hotkhiat sang in Toupa mah
kihonkhe sak ni, Amah mah sam tinten ni, “Toupa hon hondam in” chithei le, hon
hondam ding in i Toupa hat mahmah hi.
Huaiban
ah, i theihnawn ding a ka deih khat ahihleh “Hosanna” kammal pen “Toupa
hon hondam in” chia kah khiatna na ding kia a kizang ahikei a, “lametna leh
pahtawina” genna ding in leng a kizang hi. Bangziak a “lametna leh pahtawina”
kammal hong hithei mawk ding hiam? “Hosanna” tuh kum 100 vel khawng
“Toupa hon hondam in” chia kah khiatna dia kizang himahleh, hun hong paizel in,
Judate pau zatdan ah “lametna leh pahtawina” genna ding in leng hon kizang hi. Lamdang
satak leh kithalawptak a, “Hotdamna! Hotdamna! Hotdamna hong tungta” chihna
ding in a zang uhi. Huaiziak in, Thukhunthak a “Hosanna” mipite’n a chih
zuazua chiang un, “Kipah huai ei! A kipahhuai hotdamna hong tungta! Tu’n ah
hotdamna ei lak ah a om, hotdamna! Hotdamna!” chia kipaktak leh hotdamna
lamentak a kikouna ahi. A tom a gen in, “Hotdamna hong tungta! Ka kipak” chihna
ahi.
Tumnah
Ni (Palm Sunday) tungtawn in Jesu a hotdam nailouh khate, Toupa’n “hon hondam
in” hon chisak ngutngut henla, hotdam a omsa khate, Toupa’n “Hotdam a omta ka
hih ziak in ka kipak” hon chisak hen.
Sam
118:26, “Toupa min a hong pai in nuam a sa hi; Toupa inn a kipan in vual ka hon
zawl uhi.”
Liansuanthang
H
30th
March 2023.
0 Comments