KEI THOHNAWNNA KA HI

Huan Jesu’n a kiang ah, kei thohnawnna leh hinna ka hi; kuapeuh hon gingta tuh si mahleh a hing gige ding; A hing peuh mah ahon gingta peuh khantawn in a si kei ding; huai thu na gingta hia? achi a (Johan 11:25-26).

Amasa in, I Toupa Jesu min in chibai ka hon buk ahi. Hiai RESURRECTION DAY, I Toupa thohnawnna ni dam a mel i muhtheih ziakin i kipak petmah uhi. Toupa’n simtute hon khamuan hen aw.

Awle, tun in Resurrection/Easter Sunday bang chi kipat hihiam chih sui ding hilou in, Jesu thohnawnna thu tomchik kikum lehang chi i hi zaw hi. Hiai i Bible chang tel tomchik a background gen lehang, Lazar asih a han a a kivui khit nung a Jesus Bethany khua a ava hoh sukna thu, Martha toh a kihouna thu uh ahi. Hiai ah chang 21 leh 22 chihte i et leh Martha in, “Toupa hiai ah om hi lechin, ka sanggampa silou ding hi a” chi in, thohnawnna thu Martha in atheihsiam dan akihouna ua pan kimu thei hi. Huai tuh nitawpni chianga thohnawn hun ding ahi. Jesu in Martha kiang ah nitawpni chianga taksa thohnawnna kia hi lou a alungsim zau sak a saupi ngaih tuah ding in deih hi. Huai ahihleh hiai hun mahmah ah leng Jesu in Lazar hingsak thei ahi chih Martha kiang ah lak nuam hinapi in Martha in tua bang lam ngaihsun lou a, Lazar pen nitawpni chianga thou dingin ngaihsun pah mai hi.

Hiai i Bible chang tel, i theihsiam jok na dingin point nih in khen le hang i chi ahi.

1. Kei Thohnawnna Leh Hinna Ka Hi (I Am The Resurrection And The Life):

Jesu’n hiai ah "Kei" kichi, the great “I Am” i chih uh sagih agente lak ah khat ahi. Huai ahihleh “kei thohnawnna leh hinna ka hi” chihna ahi. Jesu’n agen ut tuh, amah, taksa thohnawnna leh tangtawn hinna ahi chih taklang nuam hi. Kua mah hiai bang thilhih thei leh anei a om kei him ahi. Ahihleh tuh, hiai Jesu thugen in huai hun lai a Judate thohnawnna thugin (nitawpni a thohnawnna) kia hi lou a, Lazar mahmah leng tu-le-tu a hihhing thei ahihdan taklang hi.

2. Kuapeuh Hon Gingta tuh Si mahleh Ahing Gige Ding (He Who Believers In Me, Though He May Die, He Shall Live)

“Kuapeuh Hon Gingta tuh” achi a, hiai ah Ginna (belief) i chih tuh tangtawn a hinna neihtheihna dia poimohtak khat ahi. Huai tuh khelhna ah sikhin himah lehang, Pathian hehpihna jiakin Jesu ah ginna tungtawn in hihhing in i om uhi. Hiai hihhinna tuh Khalam hihhinna ahi a tangtawn hinna, sehtheilou puan silhna ahi.

I hamphat dan uh maw? Hiai thohnawnnani kumteng a i zat uh i hamphatna uh leh i hamphatdan uh i theih chet ding ut huai mahmah hi. I gintat ding pa Jesu a om a, amah tuh tangtawn hinna kempa ahi chih i chiansem uhi. Huaijiakin, a gingta peuh mah si khin himah lehang Jesu ziakin i hing uhi, mangthang mah le hang Jesu jiakin muhsuah i hi uhi. Toupa tung ah kipahthu gen in. Toupa'n mimal chih hong kem in hong ompih tawntung ta hen.

RESURRECTION DAY zatnuam chiatni

Lian Hangshing

Young Reformed