Dawnna Nem

“Dawnna nem in thangpaihna a heimang a, himahleh thu sia in hehna a tokthou hi.”

Paunakte 15:1

Hehna leh thangpaihna nuamtak a tuah chih a omkei a, kipaktak leh lungkimtak a heh leh thangpai kichi leng a om tuankei hi. Hehna leh thangpaihna tuaktute’n nuam salou ua, heh leh thangpaite leng kipak tuanlou uhi. Huchibang ahihziak in hehna leh thangpaihna “ahoih ahi” chih theih ding vual hilou hi. I hin hon nuamlou sak ahihman in bang hiam lohngai hi. I Lai Siangthou ah hehna toh kisai 200 val bang akigelh dipdep hi. Huaite lak ah Solomon in Paunakte 15:1 ah hehna maituah didan ana gen hi. Hehna leh thangpaihna a kuanzak ding leh a daih ding tuh i dawndan leh saidan ah kinga mahmah ahihdan agen hi.

Solomon in kuahiam heh leh thangpai mahmah a om chiang in a daisak theitu tuh dawnna nem, kamnem ahi a chi hi. Hiai a kamnem kichi tuh aw awl dialdial a dawng chih ahikei a, a thangpai theitu ding pen thangpaih behbeh theihna ding kampaute zanglou a, a daihtheihna ding, a lung soulai a khin theihna ding thute a dawngthuk chihna ahi. Ban ah, hiai mun a “thangpaihna’ kammal kizang tuh lungsim leh kampau a thangpaihna kia ahikei a, thagum thatang suah dinga thangpaihna ahi. Kuahiam heh a thangpai thei di hial om chiang in a dalthei omsun tuh “dawnna nem” ahi, thusia omlou a thuhoih gen ahi.

Hehna leh thangpaihna ahihleh “nemtak a dawn” ahih chiang in “thu’ thil hihtheihna” kilang a, banah apoimoh mahmah “kidekzohna leh pichinna” leng a ensak hi. Gintute tuh a hun-le-mun zil a kibawllem tawmtawmte i hih ding uh ahikei hi. Kuahiam aheh leh ei heh zawk ding, a nem uhleh ei nemzawk ding chihte gingtute omdan ding ahikei hi. Hehna di mun ah hehlouh teitei sawm ding, kuahiam a zaidam leh hun lemtang a lak tuanlouh ding, kipahpih ding chih gingtute lungsim put ding dan leh om ding dan ahi. Hinsan khat i neih ding poimoh hi. Mi omdan zil a i omlouh ding, Lai Siangthou gen zui a i om ding uh hizaw ahi. Kuahiam thangpai di lai i dawnna nem ziaka a thangpaih louh chiang in khelhna a puk ding lai a dalsaktu i hithei a, i thu hoih gen ziaka mi lungkim a aheh kei leh khelhtheihna hunlem bawlsak lou kihi mai a, Toupa kipak lam sem kihi ahi. Dawnna nem leh kampau khum zatna ziak in mite’n Toupa muhloh thei ua, huan, midangte nasak thei kampaute apan kikepbitna in khalam pichinna ahon tun thei hi. Dawnna nem leh kampau hoih in thangpaihna a heimang a, zatute leh a gentute ding in lungsim damna, kituahna, leh khalam pichinna atun hi.

 

Gelhtu,

Liansuanthang H.

youngreformed@2023