Pathian’ mission “Missio Dei” ahihleh khelhna sal apan―mihingte khalam leh salam hotdamna, khovel leh a sunga thil omte―sing-le-gua leh ganhingte suahtakna ahi. Mihingte khalam hotdamna kia ahikei, gamsung kineksiatna, tawndan gilou, zawnna, nelhsiahna, leh politic apan suahtakna leng ahi (cf. Luke 4:18). Huaiziakin, tu i political movement ngei leng Pathian’ mission a tel chihna ahi. Politic, economic a nelhsiahna, education a sikdenna apan bang chi suahtak ding? Tu i buaina apan Pathian’ mission―suahtakna, bang chi sepsuah ding? chihte dotna poimohtak ahi. A dawnna om sun tuh galvan leh galdoumi hauh ziak ahikei a “khelh kisikna” ahi. Huaiziakin, tu i demand uh (UT+L) mu a politic a suahtakna i neihna ding un kisikna apoimoh hi.
Kisikna
tuh hel gamtatna apan kinung leh heikik a Pathian kianga kikna ahi. Pumpi,
lungtang kikhekna, khelhnate tawpsanna ahi (Isai 55:7; cf. Luke 19:8). Meitei gal ziaka buaina leh haksatna apan suahtakna
ngen in Pathian i buan ua, khelh kisik in ngaihdam i ngen ua, thumna hun tampi i
zang ua kipahhuai kasa hi. Himahleh, i gamtat dan uh i etleh Pathian panpihna i
deih ua, ahihziakin, a deihdan i zui ut kei uhi. Huaiziakin, tulel i dinmun et
in Lai Siangthou deihdan a kisikna diktak mimal leh heutute lak ah a sign muh ding tawm mahmah bang a, khelh
kisik lou, poisak thoh lel i bang uhi. Politic
a suahtakna mu a i demand uh lohchinna ding in Lai Siangthou hon sinsak dan
banga i khelhnate uh kisik a, tawpsan a, Amah deihdan i zon ua i zuih apoimoh hi.
Huai ding in, i lak ua kisik louh khelhna kiselgute pholhkhia a kisik a i
tawpsan ding uh a kuul hi.
Poppy: I gintak
sangmah in Khrist a gingtu kichite’n midangte siatna tunthei “poppy” i chiing
nak mahmah ua, gam neitute gam susetu in i pang maimah uhi. Pathian in leitung
a ganhing, sing-le-loupa, gam leitangte susetu hilou a enkoltu hoih (good stewardship) hidinga mohpuakna hon
piak (Gen 1:26, 28; 2:15; Lev 25:1-5;
Deut 25:4; 25:6) limsaklou a i siatsak ziak un tu i buaina a thangpaihna
hiding i chih lai in kisik hetlou leh poisa hetlou a angmasial tak in poppy i chiing veve uh chih social media
leh news tungtawn in i za uhi. Narco-terrorist chih min Pathian hing nei namte kisapna
ding in zum huai lua hilou hiam? Huaiziakin, suahtakna i deih taktak leh Pathian
deihdan zon a, poppy chiin i tawpsan
vengveng ding uh ahi.
Politic
leh Nekgukna: Gam ka it i chi ua, himahleh i gam it dan uh mi thupi gam it
taktak a suahtakna ana muhpihte (eg. Gandhi, Nelson Mandela, Mao Zedong, etc.) gam
it dan toh akibang hetkei hi. A taktak a gam it i sak leh “gam it” kichi thumal
paulam leh phaw a zanga sum it kihimaimah hi. Sum deihna ziaka a muhna dinga
poimoh thuneihna delhte i hi uhi. Thuneihna khahsuah ding lauhman a midang in
dinmun poimohtak luahthei dingte dou petmah a dou thei heutu phet lel kihi
abatna om hi. Hiai bang nasepnate in i
melma kuate ahia chih hon mangngilhsak a, i galdou vual lel hilehang bang i chi
ding chih ngaihtuahna thuktak hon lakmangsak hi. Gam itna (patriotism) kichi leng Pathian’ mission
leh atate hih dinga thupiak ahi. Himahleh, gam it a politic sai i sakte a taktak a contractor
delh khong ana hidaih! Leadership crisis
nasatak tuak zaw i hi uhi. I political
goal uh Pathian’ mission ahihlam i thei kei uhi.
Huan, sum
deihtakna a letluat ziak in kuapeuh nekgukna ah suakta i om kei uhi. A neu lua,
lian lua chih omlou in nekguk theihna lam teng ah i negu uhi. A niampen i chih
uh inn bawl a nasem mistry-te, mimal a nasem, mimal leh saptuam a contractor neute leh govt nasem leh contractor te’n leng i negu chiat uhi. Gentehna in, head mistry khat in a
jugali-te nitha Rs. 350 pia, aman inneite kiang ah Rs. 400 ngen. Aman Rs. 50
negu. I kineksiatna ziak ua Pathian lungkim louhna maituah a buai i kisak lai
un, panpihna hongpaite sai ut, negu ut a contractor
kituh i bang sim uhi. Huaiziakin, politic
a suahtakna kichi Pathian’ mission a tel ahih chih phok a huai mission sem dia
hamphatna piak a om ka hi chih kithei a sum leh thuneihna politic saina tawpsan
a, nekgukna tawpsan a diktatna toh gam leh nam itna taktak toh Pathian mel zon a
politic i sai kei leh angmasialna politic in suahtakna ahon pekei ding hi.
Sumpung: I gam
sunga khamtheih zuak, nekgukna, leh chingpi kap a hausate chihlouh sumpung hawm
a hausa i hi ding uhi. Hauhsakna khelhna ahikei, himahleh, dikloutaka hauhsakna
khelhna ahi. Banah, sumpung hawm a sia ahikei, himahleh, a hawm didan Lai
Siangthou in hon sinsak om ahi―gingloumi
leh summet bawlna dinga sumpung percent hun phet a hawm phalsak ahi (Deut
23:19-20). Himahleh, mizawng leh
gentheite kianga sum kia hilou nek-le-tak, leh thil dang himhim (eg. damlou
vai) a pung a lakkham ahi (Exo 22:25; Lev
25:36–37). Lai Siangthou sinsakna zuilou, itna leh tundingna tup-le-ngim tellou,
duhgoltak a mahni metna di kia en a sumpung i hawm un mizawngte neihsa tawp
kangsak ahihman in gingtute’n i tawpsan ding ahi.
Numei-Pasal kal Thangtatna: Numei-pasal
kal a thangtatna ei gingtu kichite lak ah i theihna sangmah in a uang zaw diam
chih ding khop in om hi. Mi khenkhat gendan in nungaknou college student te lak
ah call girl tam mahmah a mihausa a
upa lam deuhte’n lei zel uh achi uhi. Banah, nungak-tangval kingai a
thangtattak a om tam mahmah a, nupi leh papi lawm ngai leh thangtat tam petmah
zel achi uhi. Hiai bang khelhnate apan kisik a tawpsan a Pathian kianga
ngaihdam mimal chih in i nget chiat ding uh mimal leh gam sung chidamna omsun
ahi.
Pathian Miitna Phaw a Zang: Pathian lou belh ding kineilou ahihman in i buaina apan panpihna ngen in sai-ip puan silh a khelh kisik in ngaihdam i ngen uhi. Himahleh, kikhamisak a Pathian min phaw lel a zang kawm a mimal political agenda-te genna, pawl tuamtuamte demna thugenna, leh support-tu zonna a thumna program-te zang i bang uhi. Huaiziakin, i thilhih dan i et leh suahtakna tum taktak a Pathian min zanga adeih dan zawng i hi uh hia? Pathian pomtak hiding in i khelhna hihsate i tawpsan uh hia? Khelhna thil hihte apan i siang uh hia chih kidot tuak kasa hi. I khelhnate uh tawpsan hilehang Pathian mite’n kituahna (unity) kineita ding eive maw! Pathian min a mokna a loukha i hihleh a thangpaihna i tuah ding lauhuai kasa hi (Exo 20:7). Pathian thangpaihna i hihkhak leh bel i demand uh i mu kei ding uhi. Heutute’n sum deihna leh thuneih utna ziak lel a Pathian min zanga mipite hon maikaih a politic hon saipih uh houh ahi diam chih hun tam mahmah hi. Toupa min mahni hamphatna dia zang i hihleh tawpsan ni. Toupa kimawlpih kei ni!
A tunga khelhna leh thil chiin hoihloute banah khelhna tampi taklat louh om ding hi. Hiaite apan kisik a tawpsan a Toupa mel i zon taktak kei ua, Amah lauhna toh a deihdante i zuih kei ngeingei leh i demand uh muh kineplouh ding ahi. Khelh kisikna tellou a i demand uh mu a suahtakna i muh zenzen uhleh vualzawlna ahikei dinga hamsiatna ahi zaw ding hi. Khelh kisikna tellou a politic a suahtakna in tu i dinmun sang in siatna a huaise zaw ding hi. Huaiziakin, kisikna diktak tellou a suahtakna om khak ding lauhuai kasa hi.
Huan,
tu i buaina ah Pathian’ mission tuh dirty
politic apan suahtuakna, Amah deihdan
a vaihawmna (decent politic), A’ min
thupina, pahtawina, leh minthanna piakna gam hiding ahi. Huai ding in Khrist a
gingtu―mimal, heutu, leh saptuam in mohpuakna liantak i nei chiat ua, kuamah
hiai mohpuakna apan i suakta kei uhi. Huaiziakin, mimal in mohpuakna i neih
kawmkawm in khalam-salam ahon makaih saptuam in nam, beh, leh mimal guptuam
neilou a Lai Siangthou pansan a Pathian deihdan kia zon a nei a politic guhgel leh kituahna ding lampi ahon
bawlpih poimoh kasa hi. Hiai bang leng Pathian’ mission ahi. Hichibang hun poimohtak a Saptuam in a
dinsan a sukbuchinzoh keileh, Pathian in a thiltup huaisetak leh natak in a tangtungsak
veve ding hi. Huaiziakin, tuhun tuh kuapeuh a ding leh saptuam a ding in
hun poimohtak ahi.
Gelhtu,
Kapsuanmung
youngreformed@2023
0 Comments