Himahleh, Pathian’ kumpigam leh A’ diktatna zong masa un, huchiin hiaite tengteng ahon piak behlap ding hi (Matthai 6:33).
Mihingte
hinna dinga poimoh―nek-le-dawn, silh-le-teen, taksa pumpi zepna dingte ah Jesu’n
lungkham in lunghimoh kei un chiin a nungzuite leh mipite kiang ah agen hi.
Tungleng vasate Pathian in a vak dan leh gamlak lili pakte a kembit dan
tehkakpih a nei in, Pathian in hiaite enkai a zem ahihleh noute hiaite sang in
manpha zaw hilou na hi uh maw? Ginna neu neite aw. Pathian in na poimohte uh hon
petawk lou di hia? Gentle-te’n hiaite tengteng abuaipih uhi. Noute poimoh Pa
van a om in thei gige ahi (Matt 6:25-32) a chi hi. Hiai thute Jesu’n agen zoh
in tangtung a a thugente lak a poimoh mahmah―“Himahleh, Pathian’ kumpigam
leh A’ diktatna zong masa un, huchiin hiaite tengteng ahon piak behlap ding hi”
(v. 33) a gen hi.
Hiai
Matthai 6:33a apan thumal poimoh theih ding om hi.
Greek
pau in “kumpigam” tuh βασίλειο
ahi. Jesu’n, “Pathian’ kumpigam” a chi chitchiat hi. Huai in agen ut ahihleh
Pathian’ kumpi hihna, thuneihna, lalna, vaihawmna (Deut 9:26; Sam 24:10; 29:10;
Isai 6:5; 33:22), leh diktatna a thukhenna gam (Sam 9:4) a chihna ahi. Huan, thumal “diktatna” tuh Greek in δικαιοσύνη
ahi a, Pathian diktatna, a dik a vaihawmna, a siangthouna, a thupiakte zuihna,
Pathian mitna, (cf. Johan 6:28–29; 2 Kor 1:12; 2 Pet 3:11) genna ahi. A nasemtu
(verb) “zong” ahihleh Greek
pau in ζητεῖτε (zeteite) ahi a chihtakna toh i thil zonpen lohchinna dinga pan
naktaka lakna leh lunggulhna a gen hi. A grammar ah “zong” ahihleh present
active imperative ahi. Akhiakna―thupiak (command/order), Pathian’
kumpigam tuh tuhun mahmah in thathou/kilawp/taimatak in zong un chihna ahi. Thumal
“zong” kia a chi kei a “masa” [πρῶτον (proton)] chih
a behlap hi. Thil dang tengteng sanga Pathian’ kumpigam leh A’ diktatna zon
masak penpen a neih ding a chihna ahi. Tuabanga hiaite zon masakpen a i neih
leh Pathian in i poimoh bangkim thei ahihman in nek-le-dawn,
silh-le-teen, taksa pumpi zepna dingte apoimoh bangbang in hon piak behlap ding
ahi chiin Jesu’n thilhih di leh vualzawlna muh ding agen hi.
Nek-le-dawn,
silh-le-teen, leh kizepna dingte nangawn ah Pathian a ginna neu neih ziak in
mihingte lungkham in i lunghimoh gige uhi. Himahleh, Jesu’ thugenna apan in
hiaite sanga poimoh zaw om eive chih hon sinsak hi. Huaiziakin, i Khristian
hinkhua enkikthak lehang bang zon masakpen in i nei ua―sum hia? thuneihna hia?
nopsakna hia? nek-le-tak, silh-le-teen hia? Pathian’ kumpigam leh a diktatna
zon masak ahih keileh tuh ginglou Gentle-te toh kibang a milim bia kihi maimah
ding hi. Huaiziakin, Pathian’ kumpigam leh a diktatna zong masapen a nei ding in
i kichial hi.
Pathian’
kumpigam zonna in a huamkhakte:
i) Kumpite
Kumpipa Pathian diktak zon masak ding.
ii) Jesu
Khrist a hotdamna zon masak ding.
iii) Jesu
Khrist it ding.
iv) I
hinkhua a Jesu Khrist’ kumpi lalpen leh thuneipen hihsak ding.
v) Pathian
kimakaihsak ding.
vi) Pathian
thunuai a kiniamkhiak a kitahlut ding.
vii) Pathian
muan a gintak ding.
viii) Pathian
deihdan zon a sep ding.
ix) Tanchinhoih
puanzakna tungtawn a Pathian’ kumpigam a midangte piilut ding.
x) Pathian
deihdan a thudik a vaihawm ding.
Pathian’
diktatna zonna in a huamkhakte:
i) Hun
paisa a Pathian diktatnate sut a hinkhua a diktat ding. Negulou ding.
ii) Siangthouna
delh ding. Pathian a siangthou banga ei leng siangthou ding (1 Peter 1:16).
iii) A
thupiakte zuih ding.
iv) Thudik
a vaihawm ding.
v) Pathian
deihdan hinkhua zat ding (godly life).
Khrist
a gingtute’n i lungtang uah Pathian’ kumpigam leh A’ diktatna i zong masapen uh
hia? A laizang pen ah i koih uh hia? Ahihkeileh i hinkhua uah Pathian vaihawmna
i experience ta uh hia? chihte kidot tuak kasa hi. Bang chibanga
Pathian’ kumpigam zong masa chih kithei ding? I lungsim, tha-le-zung banah i
hun zat munna pente ahi mai hi. Huan, thil dang nek-le-takte buaipih kei un a
chikei a himahleh amasapen in koih kei unla, Pathian’ kumpigam leh A’ diktatna
(atunga i taklatte) zong masa un, Amah hihlungkim unla a deih dan hih le uhchin
Aman na poimohte uh thei ahi honpe lua ding a chihna ahi. Huaiziakin, Pathian’
kumpigam leh a diktatna kilawptak a zong teitei dinga thupiak i hihman un, zong
ni. Tuabanga i hihleh Pathian in i poimohte thei a honpe ding chih Jesu Khrist
mahmah in hon chiam hi. Banah, i Meitei gal douna ah leng thuneihna,
sum-le-pai, leh a thil dangte zong masalou in Pathian’ kumpigam leh a diktatna zong
masa lehang aman i deihte (eg. SA) honpe ding hi. Toupa’n simtute Pathian’
kumpigam leh A’ diktatna mah zon masapen a neithei ding in hon vualzawl hen!
Gelhtu,
Kapsuanmung
youngreformed@2023
0 Comments