Tuni’n nou a di’n David khua ah Hondampa a piangta, amah Khrist Toupa ahi

 

“Tuni’n nou a di’n David khua ah Hondampa a piangta, amah Khrist Toupa ahi”

Luke 2:11

 

I hinkhua a bad news i maituah louh chiang un good news i theisiam kei ua i kipahpih kei uhi. Huaiziakin, good news theisiam leh kipahpihna ding in hun haksa leh hun sawtpi a lasek hi. Jesu Khrist hong pianna tuh good news kia ahikei best news khovel in a muh omsun ahi. Himahleh, mi tampite’n thil tampi―haksatna, damlouhna, sihna, Meitei gal ziaka it leh ngaihte sunna, inn-le-lou mansuahna, lohsapna, etc. a maituah ziak un Jesu hong pianna ngei leng lamdang sa a khem a om in “Bang di a?” a chi maithei uhi. Huan, khenkhat in Jesu Khrist hong pianna “Ni” leh “muhtheih thilpiakte” (gifts) ngaihpoimoh a nei in lawm ua, himahleh, Jesu Khrist’ hihna leh hong pianna tup-le-ngim a ngaihsak kha kei uhi. Khristmas hong tun toh kiton in Messia Jesu Khrist hong pian ding genkholhna, tangtunna, a hihna, hongpaina tup-le-ngim, nang leh kei personal a dia hongpai, mimal leh gam a dia lemna tun dinga hongpai ahihdan saulou i kikum ding uhi.

 

Jesu Khrist Hong Pian Ding Genkholhna

Jesu Khrist hong pian hun, mun, nasep, leh hihnate Lai Siangthou in a genkhol hi. Amasapen in, “protevangelium” chih a om Genesis 3:15 (offspring) ah Jesu Khrist hong piang ding thu good news/gospel chiam in om hi. Huan, Zawlnei Isai in chiangtak in, “…nungak siangthou khat a gai dinga tapa a nei dinga, a min di’n ‘Immanuel’ a sa ding uh” (7:14) a chi hi. Immanuel ahihleh “Toupa i kiang ua om” chihna ahi. Naungek tuh min tuamtuam―“Min Lamdang, Lemthei, Pathian hat, Khantawn Pa, Lemna Lal” chiin agenkhol nawn hi (Isai 9:6). Zawlnei Mica in Israelte’n a ngaklah mahmah uh kumpi Messia Jesu Khrist hong pianna mun khota―Bethlehem ahiding chiin genkhol hi (Mica 5:2).

 

Huan, post-biblical hun in Judate laibu tuamtuam in Messia siampu hihna nei, Aaron leh Israel suan apan (Damascus Document I QS 9:11, Qumran I QSa 2:11-12; 14-15; 20-21), mihing hihna kia lou “Pathian hihna nei” (The book of Enoch chapters 37-71), gamsung kumpi (The Apocalypse of 4 Ezra 12:32), leh Israelte galte tengteng hihchimit ding (The Apocalypse of Baruch) hongpai ding chi in a genkhol hi.

 

Jesus Seminar kichi liberal scholars te’n Lai Siangthou a Jesu pianna record/account diklou chi in ginglel mahle uh a taktak history a thiltung ahi. Pathian’ thuchiamna leh Zawlneite genkholhna bang in a hun chiam hong tuntak in David khua Bethlehem ah naungek Messia hong piang hi (Matt 1:18-23; Luke 2:4, 11; Gal 4:4-5). Bang ziaka Bethlehem David khua chih a om hiam i chihleh David pa Jesse tuh Bethlehem a teng leh Joseph tuh David suan ahihziak ahi (cf. Luke 2:11). Tanchinhoih Johan in, “Thu tuh sa a hong suak a, eite lak ah a teng…” (1:14b) a chi hi. Hiai in “Khristmas” hihnatak (essence) tomkim in a gen hi. Pathian’ hehpihna, itna ziaka mihing a hong kibawl in i khelhnate, haksatnate, leh i kipahnate hon pompih hi. Khrist, mihing a hong kibawlna (incarnation) in Pathian tuh mihingte hotdamna dinga mihing mahmah a kibawl in thuktak a kihelna (intimate involvement) a ensak hi.

 

Jesu Khrist’ Hihna

Dr. Luke in Jesu’ hihna chi thum―Hondampa, Khrist, leh Toupa a record hi (2:11).

(i) Hondampa (Savior): Naungek personal min ahihleh Jesu ahi. Hebrew pau יֵשׁוּעַ [Yeshua, contracted of יְהוֹשׁוּעַ or ) יְהוֹשֻׁעַYehoshua or Yehoshua), Sap pau a “Joshua,” Greek a Ἰησοῦς (transliteration Iēsoús), Sap pau a “Jesus” ahi. “Joshua” leh ‘Jesu” kibang ahi. “Yeshua” khiakna ahihleh “Tankhia, Hondampa” ahihkeileh “TOUPA tuh Hotdamna” chihna ahi. Huaiziakin, Angel Gabrel in (Luke 1:31) ahihna toh kituak “Hondamtu” chiin Jesu min a phuak. Jesu’n amite a hotdam ding ziak in ahihna leh nasepna min piak in om hi (Matt 1:21; cf. Johan 4:42; Tita 1:4; 2:13; 2 Pet 3:18). Huan, hondamtu hihna ding in “…khelhnate ngaihdam theihna thuneihna anei hi” (Luke 5:24).

(ii) Khrist (Anointed One): Jesu official min ahihleh “Khrist” ahi. Khrist ahihleh Greek pau a Χριστός (Christos) “thaunilh” (anoint) apan kilakhia, Hebrew pau in מָשִׁיח (masiah) “thaunilh” (anoint) ahi. Messia tuh siampu (Lev 4:3, 5, 16; 6:22), zawlnei (Deut 18:15; Sam 105:15; I Chro 16:22), leh kumpi (2 Sam 22:51; Ps 2:2) hihna anei hi. Huan, Jesu Khrist ah siampu (Heb 3:1; 4:14-16; 8:1), zawlnei (Matt 21:11; John 6:14; 7:40), leh kumpi (Matt 27:11, 37, 42; Kil 17:14; 19:16) genkholhna tangtung hi.

Thunkhun Lui leh post-biblical hun a Judate genkholhna bang in Messia Khrist Jesu (Johan 1:41; 4:25; Mark 8:29; 14:61-62; Matt 16:16-17) thaunilhpa (Sam 45:7), kumpi (Mark 15:2; Matt 26:64b), leh siampu lianpen (Heb 4:14-16) in hong piang hi. Israelte lunggulh leh kinepnate ahih buching hi.

(iii) Toupa (Lord): Hebrew pau a אדן “adon” ahihleh “Toupa” (Lord) or “Makaipa” (Master)―lalpen, neitu, leh thuneipen genna ahi. Pathian genna in a kizang hi (Isai 1:24; 10:16, 33). Greek in κύριος “Kurios” ahihleh “Toupa” (Lord) or “Makaipa” (Master)―lalpen, neitu, leh thuneipen genna ahi. Hiai Hebrew leh Greek thumal tuh Jesu genna in kizanga, Luke 2:11 mahmah in, “Hondampa, Khrist Toupa” chi a, hiai in Pathian ahihna taklang hi. Jesu kam mahmah apan in “Toupa” ahihdan a gen: “…Toupa’n a deih ahi…” (Mark 11:3), leh “Toupa, Toupa hon chi peuhmah vangam a lut kei ding…” (Matt 7:21). Huan, Thomas in, “Ka Toupa leh ka Pathian na hi” (Johan 20:28) a chi hi. Peter in Jesu tuh “mi tengteng Toupa ahi” (Nas 10:36) ahihdan a gen hi. Huaiziakin, Jesu tuh Hondampa, Khrist Toupa ahi. Amah tuh vaihawmtu, lalpen, thuneipen, leh Pathian hat ahi.

 

Jesu Khrist Hong Pianna Tup-le-Ngim

Jesu, Hondampa, Khrist Toupa tuh Lai Siangthou’ genkholhna bang in Bethlehem khua ah hong pianna thu (news) in gah thupitak a tun hi. Tup-le-ngim nihte:

“Tungnungpen ah Pathian’ Thupina henla,”

“leitung a amah kipahpih mahmah mite lak ah lem thu leng hen”

(Luke 2:14) chih ahi.

(i) Pathian’ Thupina ding (God’s Glory): Naungek Jesu Khrist mikhialte hondam dinga hong pianna tuh Pathian’ thupina kilakna thupipen ahi. Jesu Khrist pianna in Pathian hihthupi in pahtawina laa sak in om hi. Van angelte kia lou leitunga mihingte’n leng Pathian’ thupina apia hi. Thilsiamte leh Khrist hotdamna nasepte in Pathian’ thupina a pia a, a thupina tuh lemna tungtawn in pahtawi in om hi. Jesu Khrist leitunga hongpaina tup-le-ngim tuh Pathian’ thupina ding ahi―hotdamna nasep, a thillamdang hihte, ami hihdamte, kampaute, Khros a sihna, leh thohnawnna tanpha a Pa Pathian’ thupina ding ahi.

(i) Lemna ding (Peace): Naungek Jesu hong pianna tup-le-ngim tuh “Lemna” ding ahi. Zawlnei Isai in “Lemthei,” “Lemna Lal” (9:6) chiin agen. Huaiziakin, naungek Jesu lal leh hondampa a pom dinga Pathian kipahpihte/telte (cf. Luke 2:14b) kiang ah lemna om ding hi. Amaute’n lemna a nei ding uhi. Jesu’n a nungzuite kiang ah, “Inn khat peuh a na lut chiang un: Hiai inn ah khamuanna tung hen, chi masa un. Tua lai a khamuanna mi a om leh na khamuanna thu uh ama tung ah a om ding…” (Luke 10:5) a chi hi. Pathian in Khrist tungtawn in lemna khovel a hon pia (offer), himahleh, “lemna mi” (sons of peace) Pathian deihsak mite kia (Luke 2:14) in a ngah uhi.

 

Jesu Khrist tuh leitung ah Pathian’ mite lak ah lemna bawl ding in hongpai hi. Aman lemna chi thum a hon bawl hi―Pathian toh kilemna, Mahni a lemna, leh Midangte toh kilemna.

(a) Pathian toh Kilemna: Jesu Khrist hong pianna tup pipente laka khat tuh Pathian toh kilemna ahi. Romte 5:1 “Ginna ziaka siamtansaka om in i Toupa Jesu Khrist pansan in Pathian toh kilem in i om uhi” a chi hi. Pathian toh kimelmate himahlehang Jesu Khrist a ginna tungtawn in A’ diktatna ei a piak (imputed) a om in Pathian mai ah siamtansak i hi uhi (cf. 2 Kor 5:21). Hiai in Pathian toh hon kilemsak a, a tunga i khelhnate ziaka a hehna tuh nulmang ahita hi. Aman a ta ding in hon pom a, Amah Aba pa chi in i sam theita uhi. Jesu tuh Lemna kumpi ahi taktak hi.

(b) Mahni a Lemna: Pathian toh kilemna in i hinkhua ah lemna tun in lemna a khang in enjoy uhi. I tang tel ah “nou a di’n David khua ah Hondampa a piangta…” a chi chitchiat hi. Nang leh kei a dinga personal tak a naungek Jesu hongpai ahihdan agen hi. Huaiziakin, i lungsim-lungtang ngaihtuahnate lau, hihbuai, lungkham, khelhna ziaka mohkisakna (guilt), leh maban a maituah ding theihchetlouhte (uncertainties) ziaka lemna/lungmuanna hihlau a lunghimohna apan naungek Jesu Khrist a hotdamna tungtawn in Pathian toh kilem in lemna pepa neita i hihman un lemna i neita uhi (Phil 4:9). Lemna kumpi neita i hihman un sunggil a kipahna, lemna, leh khamuan lamdangtak i neita uhi.

(c)  Midang toh Kilemna: Naungek Jesu Khrist, i lal leh hondampa dinga pomna in Pa Pathian toh hon kilemsak a, sunggil a lemna/muanna hon pia in midangte toh kilemna hon tun hi. Khrist tungtawn a Pathian toh kilemtate’n midang toh kal a lemna a gahkhia uhi.

 

I Mimal Hinkhua ah Lemna Lal a Piangta Hia?

Jesu Khrist’ pian champha “Khristmas” lawm di’n bang chiin i kisakhol ua? Bang chibang in i kipahpih ua? Lawmte toh BBQ, innkuan kim, gift tampi muh ziak, ngaihzawngte toh hun nuam zatkhawm ziak, leh thildangte ziaka kipak i hi uh hia? Khristmas lopna kipahna ahihleh Jesu Khrist’ hotdamna polam (external) apan ahihlouh ding ka chi masa hi. Jesu Khrist tellou Khristmas lopna leh kipahna tuh apotham kipahna (superficial) ahi.

 

Naungek Jesu, nang leh kei a dia hong piang a, Khros a hong si a, thounawn ahi chih i lungtang uah piang nailou a, Pathian toh kilem nailou, sunggil a muanna/lemna neilou, leh midangte toh kilemna neilou i hih leh tu Khristmas hun in Toupa’ Kha Siangthou in hon houpih hen! Huai ding in, thil dang tengteng sang in naungek Jesu Khrist mah buaipih a nei in, lungtang kongkhak hong ding in i kichial uhi.

 

Huan, mimal hinkhua leh gamsung dinmun en lehang “Lemna Lal” i hinkhua uah piang taktak lou bang hi. Lemna lal pianga Amah lal hileh, mimal kisiatna, kidemtuahnate, gingtu gamsung makaite lak ah kidemtuahnate, tungnung kituhnate om kei dinga, lemna leh kitheihsiamna om ding hi. Paul in hichiin agen: “Ahihtheih hiai leh, noumau lambek, mi tengteng toh kituak in om un” (Rom 12:18). Ephesate 4:31-32: “Khatna bang, thangpaihna bang, hehna bang, hanna bang, gensiatna tengteng tawpsan in omta hen, gitlouhn tengteng toh. Huan, kihehpih chiat a lainatna nei in om unla, Pathian in Khrist a a hon ngaihdam bang in noumau leng kingaidam tuah chiat un” a chi hi. Hun paisa mi toh kisiatna-mimal leh nam vai, na nasak vilvel kampau leh nasepte, communal nasep leh kampaute, ngaihdam louhte Pathian in Khrist Jesu a hon ngaihdamna ngaihtuah a lemna delh teitei thei ding in i Hondampa Jesu Khrist pian champha in hon kimuchiansak chiat hen ka chi hi. Lemna lal in kituahna leh lemna mimal, saptuam, leh gamsung makaite lak ah hon piak keileh lemna petu neilou i hikha ding uhi. I Meitei gal douna ah i kituahlouh dan uh Lemna kumpi Jesu Khrist gingtate lak a lemna om theilou tuh thil zahlakhuai ahi. Heutu lemna kumpi nei in kilemlou ding in tuailaite a phuihsia kei a, ideology tuamtuamte lemsakpih keimahleh theisiam kawm in lemna leh kituahna ding a ngaihtuah zaw hi. Huaiziakin, tu kum Khristmas in tu gal neih hun in mimal hinkhua leh gamsung vai ah gen nei mahmah ding in ka gingta hi. Mimal leh saptuam-gamsung heutute lungtang ah “Lemna Kumpi” hong piang hen la mimal, nam leh pawl tuamtuamte lak ah lemna leh kituahna hon tun leh ka chi petmah hi. A tawpna ding in, Jesu Khrist tuh gift thupi leh lianpen ahi. Gift tuamtuam leh a chi tuamtuam in Khristmas lawm in nuam nasa maithei, himahleh naungek Jesu, lal leh hondampa dinga i pom keileh kipahna bukim, mimal, heutu leh gamsung ah lemna bukim i nei kei ding uhi. Toupa’n simtute lungtang ah Lemna Lal Khrist Jesu hon piangsak hen chih ka thumna ahi.

 

Gelhtu,

Kapsuanmung

youngreformed@2023