“…michih a ding in Tanchinhoih kipahhuai mahmah ka hon tut ahi. Tuni in nou a ding in David khua ah Hondampa a piangta, amah Khrist Toupa ahi” (Luke 2:10-11).
Birthday lawm a theihpihtu khat hiding in inn kuanpihte, tanaute, lawmte, banah khosakna leh pilna-siamna a i kikimpihte uh chial ahisek hi. Mi neizou in mi neizou mah a chial a, mi neizoute birthday ah mimawl leh liangvaite theihphak leh phok ahi sek kei uh. Hiai khovel paidan toh kibang hetlou in TOUPA’N Messiah Jesu birthday theihpihtu hiding in leitung kumpite, tanaute, lawmte, mi neizoute a chial kei a mimawl simmoh leh nolkhin a om belamchingte a chial zaw maimah hi. Thil lamdang leh mak a chih louh theih kei hi. Bang ziaka TOUPA’N a Tapa birthday theihpihtu hiding a leitung kumpite chial lou a belamchingte chial mok hihiam? Lai Siangthou in chiangtak in hon sinsak―Liangvaite kianga Tanchinhoih gen dinga hong piang ahihziak ahipen hi. Kumpi lungsim bangpu, smart Khristian-te a dia Jesu hong piang ahikei a, tuabang mite chial ahikei uh!
A Liangvai Messiah Jesu
Thukhun Lui hun a
Zawlneite genkholhna bang in Messiah Jesu tuh gentheitak in hong piang a,
liangvaitak in a sihtan dong a khosa hi. Nu-le-pa carpentry nasem lel a kivak,
mizawng innkuan apan hong piang a, Bethlehem ah gan annpiakna kuang ah sial in
om maimah hi (Luke 2:7). Hiai in a dinmun, genthei leh muhsit a om ahihdan
taklang hi. Huan, naungek lai himahleh Herod thahsawmna ziak in liangvai leh
beidongtak in Egypt gam ah galtaipih in om hi (Matt 2:13-14). Belamnou a
kithoih zoulou in vakhu/vapal nou kop khat tawi in a kithoih hi (Luke 2:22-24; cf.
Lev 12:8). A ministry omna mun Capernaum ah Simon Peter’ Inn a zang a, pahtawi
a Jerusalem a lutna ding sabengtung nou khel a, Paikan Annkuang luina ding room
khelh thoh in, a kivuina ding han nangawn a khelh thoh maimah tel hi. Huaite ziak
in, Mathai 8:20 ah hichi’n Jesu’n a gen hi: “Sehalte’n kua a nei ua, tung
leng vasate’n leng bu a nei uh, himahleh, Mihing Tapa in zaw a lu ngakna ding
mun a nei kei.” Paul in 2 Korinth 8:9na ah eite i hauhtheihna ding in, hau
mahleh a [Jesu] hong genthei hi a chi hi. I Toupa Jesu genthei leh liangvaitak
ahi.
Messiah Jesu’ Mission: Liangvaite Kianga Tanchinhoih Thugen
“Liangvaite kianga Tanchinhoih gen dinga n’on seh ziak
in Toupa Kha tuh ka tung ah a om;
Aman a hon sawl, salte kiang ah pawtna thu leh,
mittawte kianga mitvak neih nawnna thugen ding, simmawh thuakte pawtsakna ding.
Toupa lungkim kum thugen ding in”
(Luke 4:18-19 cf. Isai 61:1-2).
I tang tel in “michih a ding in Tanchinhoih kipahhuai” chi’n gen a, michih liangvai leh gentheite a dia Messiah Jesu hong piang ahi ngut hi. Liangvaite kianga Tanchinhoih (good news) thugen nasem dinga commission (Toupa kha piak) piak in om hi (Luke 4:18). Kuate ahia Dr. Luke in genthei leh liangvai a chihte? Mi khenkhat in khalam a gentheite kia ahihkeileh sum-le-pai tasamte (spiritually poor or economically poor) chi mahle uh nidanglai a Luke & Acts world a Mediterranean tawndan, sahkhua leh khotang vai et in hiai banga hilhchetna kipete’n a hilhchian zoukei deuh hi. Khalam leh sum-le-pai a gentheite gen mahleh a huamkhak lian zaw in khotang leh sahkhua vai a kideidannate, kisimmohnate leh netniam a omte a huamkha hi. Amaute’n le’ng Pathian hehpihna zalzou ua a kiang ua lametna leh suahtakna thugen dinga Messiah Jesu hong piang hi.
Nihna, saltangte kianga zalenna thugen ding. Bat pe zouloute, khelhna nuai a saltangte, setan thuneihna nuai a saltangte ngaidam a zalenna (Aphesis- release means forgiveness) thugen dinga Messiah hong piang ahi. Pathian dan i bohsiatna uh batte hon piaksak dinga hong piang hi. A sihna in i bate uh a ngaidamta hi (Col 2:14). Khalam a saltangte leh bat piak zohlouh ziaka penalty muh ding le’ng a huam tel (Luke 5:27-32; 7:36-50).
Thumna, mittawte kianga mitvak theihna nawnna thugen ding. Khalam leh salam mittawte mitvakna peding a Messiah hong piang hi. Mikhialte tuh khalam a mittawt, za napi a theisiam lou (Sam 82:5), mit nei napi a mu theiloute i hi uhi (Jer 5:21). Huaiziak in, Jesu tuh “mittawte vaksak dinga” hong piang ahi him hi (Isai 42:7).
Lina, simmoh leh nelhsiah a omte zalenna peding a hong piang ahi. Nelhsiah a omte tuh khalam a liangvai leh hinkho haksa tuakte ahi. Jesu’n simmoh leh nelhsiah a omte a gen chiang in khovel a kha giloute thuneihna a saltang―kampau a simmoh leh hihgentheihna tuakte, khalam a liangvaite, lungsim leh salam a thuakgimna tuakte ahi. Tulai pau in “abuse” engbawlna tuakte. Damloute damna pia, kha giloute holkhia, khelhnate ngaidam, social justice apan zalenna peding a hong piang ahi.
Ngana, Luke 4:19 “Toupa lungkim kum thugen ding in” (quoted Isai 61:2) Jesu a hong piang hi. The Year of Jubilee (Lev 25:10) kum 50 zel a Judate’n a lop uh ahi. Hiai kum chiang in suak-le-sal tangte khahkhia ua, leibat neite ngaihdam in om ua, gam neitu diktakte kianga piakkikna leh toldamna in zang uhi. Huaiziak in, “Hotdamna Ni” (Isai 49:8) leh “Tatkhiakna Ni” (Isai 63:4) tuh Messiah Jesu ah tungkimta ahi chih puang dinga hong piang hi. Amah ah hotdamna/suahtakna tungta, Messianic era kipanta, Toupa kumpi lalgam tungta chih thupuang dinga hong piang ahi taktak hi.
Leitung kumpi Lungsim Neite a Di’n a Liangvai Messiah Jesu’n Mun a Neikei
Messiah Jesu tuh leitung kumpite a dia hong piang ahikei chih kichiantak in muhtheih hi. Kumpi Herod “the Great” banga salam leh khalam kiliansak, thupi kisa, thunei kisate’n panpihtu-hondamtu poimoh lou akisak ziak un amaute a di’n Jesu hong piang kei hi. Amaute lungsim ah Jesu’n mun a nei kei a, a lungsung uah a piang thei kei, phetlou in, a hinkhua ua Jesu lal ding a phal kei uh. Kumpi Messiah in tuabang mite toh kisaikhakna anei kei hi.
Huaiziak in, Messiah i Toupa Jesu hong pianna theihpihtu hiding in Roman kumpi Kaiser, Judate kumpi Herod, suahkhua heutu lian Pharisaite leh Sadukaite sam dia lamet ahihlai in society a simmoh leh tuamkoih (outcasts), migenthei leh liangvai, mimawl belamchingte theihpihtu hiding in Pathian Angel in a chial zaw maimah hi. Belamchingte nasep tuh sakhua biakna toh kisai in thilsianglou a koih ahihman in Temple huang sung a lut ding uh phal ahikei! Tua kia ahikei, kizuakte toh dinmun kikim banga ngaih ahi uh. Hichibang mite, Toupa’n Mesiah Jesu birthday theihpihtu khat hidinga chialna (top of the invite list) a koih mok hih ngaihtuah tham ching lua hilou hiam?
Liangvaite Suahtakna
Genthei leh liangvai,
simmoh leh muhsit a omte, khalam a dangtakte, khotang leh sahkhua a mun
neiloute, lametna neiloute lametna thak hotdamna leh suahtakna peding a Jesu
hong piang hi. Jesu mission lailung pen ahi. Huan, suahtakna a piak dite dinmun
a om in hong kingainiam hi. Paul in Phil 2:6-7 ah, “…hong kihih awngthawl a,
sikha bang in a hong om a, mihing bang a bawl in a hong om a” chi’n ana gen hi.
Tulai a sum-le-pai nei, a inn mun lou mun, car hoih taktak ngaih poimoh masa a nei
a smart tak a tualniam genthei leh simmoh a omte Jesu khebul tutpih ding nasep a
neite toh Messiah hinkhua kigamla mahmah mai hi. Jesu’n smart tak in mite a zol
kei a, sum-le-pai, thuneihna zang in a nungzui ding mi a bawl kei hi. Smart
Khristian-te nasep dan leh i Toupa Jesu nasep dan a kigamla mahmah hi.
Salam a genthei leh liangvai, mite simmoh, muhsit, nelhsiah a omte a di’n Messiah Jesu pianchampha in gen anei a, khalam a genthei suahtakna lunggulh tuntunte a di’n Jesu birthday in lamgdanna leh tungtuanna a nei bik hi. Messiah birthday tuh hinna pethei leh khek lumlet thei birthday hing omsun ahihman in, koltannate, nelhsiahnate, simmohnate apan a suahtakna apia hi. Huaiziak in, liangvai leh gentheite a di’n hiai birthday a manpha bik hi. Mimawl leh nelhsiah a om belamchingte birthday theihpihtu hiding a tel ahih bang un, belamchingte banga simmoh leh nelhsiah a om khalam leh salam a genthei, suahtakna lunggulh tuntunte a pian champha theihpihtu hiding in a hon tel hi. Huaiziak in, na lungtang leh pumpi kheksak ding in Messiah Jesu vaidawn inla na lungsung ah piangsak in, huchi’n na khalam leh salam koltannate apan suahtakna hon peding hi.
Toupa’n simtute hon
vualzawl chiat hen!
Merry
Christmas!
Gelhtu,
Mr. Kapsuanmung
youngreformed@2024
0 Comments