Dawnna nem in thangpaihna a heimang a,
Himahleh thu sia in hehna a tokthou hi.
PAUNAKTE 15:1
Hehna leh thangpaihna nuamtak a tuah chih a omkei a, kipaktak leh lungkimtak a heh leh thangpai kichi leng a om tuankei hi. Hehna leh thangpaihna tuak tute’n nuam salou ua, a heh leh thangpaite leng kipak tuanlou uhi. Huchihbang ahih ziak in mihing hehna leh thangpaihna “ahoih ahi” chih theih ding vual hilou hi. I hin hon nuamlou sak hi. Huai ahih ziak in hiai tegel tuh bang hiam khat lohngai hi. I Laisianghthou ah hehna toh kisai 200 val bang ana kigelh dipdep hi. Huaite lak ah Solomon in leng Paunakte 15:1 ah hehna maituah didan ana gen hi. Hehna leh thangpaihna a kuanzak ding leh adaih ding tuh I dawndan, I saidan ah kinga mahmah ahihdan ana gen hi.
Solomon in mi khat heh mahmah leh thangpai mahmah a aom chiang in a daisak theitu tuh dawnna nem, kamnem ahi ana chi hi. Hiai a kamnem kichi tuh aw awl dialdial a dawng chih ahi kei a, a thangpai theitu ding pen thangpaih behbeh theihna ding kampaute zanglou a, a daihtheihna ding, a lung soulai a khin theihna ding thute a dawngthuk chihna ahi. Huaiban ah hiaimun a “thangpaihna’ kammal kizang tuh lungsim leh kampau a thangpaihna kia ahikei a, thagum thatang suah ding a thangpaihna ahi. Mi aheh a thangpai thei di hial a aom chiang in a dalthei omsun tuh, “dawnna nem” ahi a thusia omlou a thuhoih gen ahi hi.
Hehna leh thangpaihna hunte “nemtak a dawn” a hih chiang in “thu’ thil hih theihna” a kilang a, huaiban ah apoimoh mahmah “kidekzohna leh pichinna” leng a kilang hi. Gingtute tuh ahun-leh-amun zil a kibawllem tawmtawmte ihih ding uh ahi kei hi. Mi a heh leh ei heh zawk ding, a nem uleh ei nemzawk ding chihte gingtute omdan ding ahi kei. Mi a heh leh leng ei hehlou ding, mi anem leh leng hunlem a lak tuanlouh ding, kipahpih ding chih lungsim I neih zawk ding uh ahi. Hinsan khat ineih ding poimoh hi. Mi omdan zil a I omlouh ding, Laisiangthou gendan zil a I om zawk ding ahi. Ei dawnna nem ziak a mi a thangpaih louh chiang un, huai mite khelhna bawl ding dalsaktu ihi a, ei thuhoih genziak a mi alungdam ua aheh kei uleh a khelhtheih nang uh hunlem kibawlsak lou ahi mai a, Toupa leng kipak ding hi. I kampaute ziak hiam, I dawnnate zil in mite’n Toupa muhloh thei ua, ei mahmah leng thil hoihlou leh mite nasak thei ding thilte I genlouh ziak in I khalam piching hiai hiai thei hi. Dawnna nem leh thuhoih tuh a za tute a ding in le, hoih a agen tute a ding in le hoih hi.
Liansuanthang H
0 Comments