PATHIAN OM TAKTAK AHIHDAN CHETNA

 

Pathian om taktak ahihdan chetna

(Evidence of the existence of God)

 

Mihing tengteng in bang hiam mihingte sanga thunei zaw, thilhihthei zaw leh hat zaw om ahi chih theihna chiat khat kinei hi. Bang hiam hinna (Being) nei mihingte kingaknatak leh mohpuakna nei om ahi chih theihtelna (conviction) kinei chiat hi. Hiai in a gen ut tuh Pathian hing khat om ahi chih ahi. Pathian hing taktak om ahihdan i ensuk ding.

1. Mihing pianken lungtang in Pathian om ahihdan theihna khat nei hi (Inner Sense of God): Khovel a mihingte tengteng pianken lungtang in Pathian thil bangkim siamtu leh mihingte bawltu khat om ahi chih theihna nei hi (Rom. 1:21). Himahleh, tulai in Pathian om gingtalou mi (atheist) a om uhi. Amaute’n tuh akhuak pilna uh zangin Pathian om a nial (deny) uhi. Hiai bang mite tuh i Lai Siangthou in leng a theihpih hi. Sam 14:1; 53:1 in hichiin a gen hi, “Mihai in a lungsim in Pathian a om kei” a chi hi. Pathian om gintaklouhna tuh khelhna ziak ahi (Rom.1”18, 20, 23, 25, 28, 32). Himahleh, gingtute’n tuh hiai pianken theihna tungtawn in Kha Siangthou in hon panpihna in Pathian theihna nei in, Pathian tuh Pa (Abba) leh Pathian ta i hihdan i thei uhi (Rom. 8:15, 16). Huai kia ahihkei a Jesu Christ ei a teng ahihdan i thei uhi (Eph. 3:17; Phil. 3:8, 10; Col. 1:27; Johan 14:23).

2. Pathian om ahihdan chetna Lai Siangthou leh Thilsiamte ah (Evidence in Scripture and Nature): Pianken lungtang chetna ban ah Lai Siangthou pumpi in Pathian om ahihdan chetna a pia hi (Ex. 33:12-13; Sam. 119:168; I Cor. 8:3; 13:12). Atung in Pathian in lei leh van a siam (Gen. 1:1). Pathian nasepte Lai Siangthou a i muhte in leng chetna a pia hi. Thilsiamte’n Pathian om ahidan chetna a pia (Rom. 1:20; Nas. 14:17). Vante’n Pathian thupina a sulang uhi (Sam. 19:1-2). A thilsiamte tengtengin Pathian om ahihdan chetna a sulang hi.

3. Pianken apan a chetna (Traditional proofs for the existence of God): Pathian om ahihdan chetna mi pil masate pianken apan a zui dan i en zek ding:

(a)   The Cosmological Argument: Khuavannuai a thil om tengteng in omsaktu leh omna ziak a nei chiat hi. Hiai bang omsaktu tuh kuamah bang ahikei a Pathian ahi achi uhi. Heb. 3:4, “Inkuan chih in pape’n kuahiam bek anei chiat ngal ua; bangkim pape’n bel Pathian ahi” a pansan uhi. Greek mipil Plato leh Aristole te’n hiai chetna a pansan uhi.

(b)   The Teleological Argument: Khuavannuai a thil tengteng omzeneitak leh pilsiamtak a bawl ahi. Hiai geelkhetu (designer) tuh Pathian ahi (Sam 19:1; Rom. 1:20; Nas. 17:23) apansan uhi. Etsakna in- ni leh kha leh hunbite khong omzeneitak a siam ahi.

(c)   The Ontological Argument: Khuavannuai a hoihbukim a om kei, a om sun tuh Pathian ahi. Amah tuh hoihbukim leh tungnungpen ahi. John 3:19, 20, Rom. 3:11 apansan uhi.

(d)   The Moral Argument: Thilsiamte’n abul apan sia-leh-pha theihna a nei uh. Himahleh, vaihawmna dik apoimoh hi. Hiai sia-leh-pha theihna tuh Pathian apan ahi. Khatvei tei vaihawmna dik kuapeh in a nei ding. Hiai gindan German mipil Immanuel Kant in a zang hi. Lai Siangthou pansan uh Rom. 2:14-15 ahi.

 

Pathian om ahi chih ei gintak leh gintaklouh thu a kinga hilou in, tangtawn apan tangtawn dong a om gige, kipatni leh tawpni nailou ahihdan Lai Siangthou, thilsiamte leh mihingte khuak pilna tungtawn in akithei thei hi.

 

 

Kapsuanmung