PATHIAN' VUALZAWLNA-TE SIM IN

PATHIAN’ VUALZAWLNA-TE SIM IN

(Count Your Blessings)

 

Thupatna

Pathian’ vualzawlnate ahi banga ngai (granted) a lak abaihsam a, phetlou in mangngilh leh phok khaklouh (unaware) baihsam zaw lai hi. Himahleh, Lai Siangthou in gingtute kiang a vualzawlna i tante uh khatkhat a sim dingin hon deih hi. Hiai context toh kisai in Peter in Pathian’ hehpihna tungtawn a gingtute’n khalam vualzawlna leh salam vualzawlnate niteng a mu uh ahi chih I Pet 2:3, “Toupa tuh mi hehpihthei tak ahi chih na chiam khin thamta uhi” ah ana gen hi.

 

Pathian’ vualzawlna, hoihna, lainatna leh hehpihna i hinkhua uah ngaihtuah a sim thakthak ding ahi chih laa in, “Count Your Blessings, name them one by one; count your many blessings see what God has done” ana chi a, hiai laa in i hinkhua a Pathian apan vualzawlna i tan tampite sim zel a, kipahthu gen ding ahihdan hon hilh thakthak. Hiai kha chiindan (habit) in neithei lehang a chih huai petmah hi. Huaiziakin, i hinkhua a Pathian apan vualzawlna i tante etdan nih; khalam leh salam in i ensuk ding hi.

 

Khalam Vualzawlna (Spiritual Blessings)

“I Toupa Jesu Khris Pa leh Pathian phat in om hen. Aman vanmun khawng a khalam vualjawlna chiteng in eite Khris ah hon vualjawlta” (Eph 1:3).

 

Pathian in a itna ziak liauliau in mikhial si dingte, a tapa neih sun siitlou hial in nang leh kei hotdamna dingin leitung ah hon sawl hi (John 3:16). Huchiin, Jesu’n Khros ah hong si in hon hondam a, Pathian mai ah siam hon tangsak in (justifying righteousness), khelhnate leh Dan nuai a hamsiatna apan hon tankhia in (redeemed), a sisan mahmah in hon hondam hi. Huaiziakin, Pathian’ gouluahtu, A tanu-tapate hihna tanvou or hamphatna (Rom 8:15) i neitheita uhi. Pathian’ phat in om hen!

 

Himahleh, Pathian in hehpihna hau in a hon itna thupitak jiakin, tatleknate jiaka si i hih hilhial lai in leng, Kris toh a hon hihhinga (hehpihnaa hotdam na hita uh), Kris Jesu ah amah toh a hon kaithou-a van munte ah amah kiangah a hontusak hi: Huchia hun hong tung ding te khawnga, Kris Jesu-a i tunga migitna neia, a hehpihna nak hauh dan tuh a etsak theihna dingin (Eph 4:7).

 

“Toupa chitnate ziak ahi hihmanga i om louhna uh, lainatnate a juau ngei louh jiakin. Jingsang tengin a thak jel ua; na ginomna a thupi (Kahlate 3:22-23).” Pathian’ hoihna leh ginomna i tung uah zing kal tengin hihlat in a om gige hi. Ngaihtuah lehang Adam khelhna ziaka khelh man tuh sihna ahi chih Lai Siangthou in chiangtakin hon sinsak hi (Rom 6:23). Himahleh, Pathian’ hehpihna leh itna ziak kia in khalam vualzawlna a hon tangsak hi (Eph 2:8-9; 1:4-5). Dotna ngaihtuah ding a ka deih ahihleh Pathian’ hehpihna tang dingin i phu hia? “Hehpihna” (Grace) thumal Hebrew in “hen,” Greek a “charis” verb “charizomai” apan kilasawn, Pathian’ hehpihna (gifts of divine grace) genna ahi. Hehpihna thumal khiakna tuh “phulou deihsakna” (unmerited divine favor) chihna ahi. Khelh man tuh sihna ahi a chih bang a, mikhial i tan ding uh or deserve tuh sihna tangtawn meidil a gawtna ahi. Pathian’ hehpihna tang taklou himah lehang a itna ziakin a hehpihna (phulou deihsakna) i tang uhi. Hiai banga vualzawlna i tan nak kipahhuai lua i gen zou kei ahi.

 

Salam Vualzawlna (Physical Blessings)

Khalam vualzawlna i tan kia uh hilou in, Pathian’ hehpihna leh itna apan hong luangkhia tungtawn in ahoihna tampi i hinkhua uah i mu ua, Lai Siangthou mahmah in leng agen hi. “Aw TOUPA kiangah kipahthu gen un, amah lah a hoih ngala; a chitna khantawn a om ding ahi ngala” I Chro 16:34.

 

Huan, Lai Siangthou ah Pathian’ hoihna chitna (goodness and providence) mun tamtak ah muhtheih hi. A hoihna ziaka hun tenga kipahthu gen gige ding ahihdan a hon sinsak lai hi.

Ngaihtuah lehang, mikhial i hih ziak mah uh ahi ding, a haksa lam, a selam, a gilou lam, chitlouhna lam ngen i ngaihtuah tangpi uhi. Etsakna in, A4 blank paper ah bangmah kigelh lou, bang hiam a ngouna lai ah i gelh chiang un akilang pah hi. Hiai bangin thil hoih tampi i hihna lak uah, thil hoihlou khat i hihkhak pen a kilang pahpah hi. Huaiziakin, i hinkhua uah, Pathian apan vualzawlna i tante, ahoihnate muh a haksak mahmah mai hi. Huaisangin, i thil hih khelhte uh leh i chitlouhnate uh i mu mun zaw ua, Pathian bang kimohsa kha zel zomah hi. Tuabanga, hihkhelhna lam leh chitlouhna lam kia i ngaihtuah munluat ziak un, lungsim chidam louhna tun a, kipahna nei tawm in kilungkham zel, phetlou in i nasep hon subuai in kibahloh khasek hi. I zak gige bang un, khovel a mi hehpihhuai pente tuh kipahdan theiloute ahi i chisek uhi. Dik leng a dik mahmah hi. Ahihziakin, ei leng hon huam telkha hi. A selam kingaihtuah tam zaw a, huai in kipahna sangin, phunna di kizong or kimu in complain kihau thei zomah hi.

 

Ngaihtuah thak lehang, mikhial bangmah tangtak loute Pathian in khalam vualzawlna hon pia a, huai kia leng hun salou a, salam vualzawlna tuamtuamte; damtheihna, neih-le-lam, sum-le-pai, nek-le-dawn, taksa hoihna piangsual mai lou a, amah biak theihna hun, mi dangte hehpih theihna, it theihna, lainat theihna, panpih theihna leh vualzawlna lam chituamtuam ah hon pia hi. Hiaite i ngaihtuah chiangin Pathian tungah mikhial in vuina ding, phunna ding, complain ding i neikei tel uh maw. Paul in mi khialte lak a khial pen ka hi a chih banga, mikhial i hi ua, niteng, hunteng Pathian deihlou dan a om gigete, mi kihhuaite, bang chi lawmlawm a hiai bang vualzawlna tang i dia aw chih ka ngaihtuahna a om gige hi. Toupa bang ziak a na hehpihna, na itna kei bang leltak, tangtak hetlou, phu hetlou hiai bang hamphatna khalam leh salam a nawn na piak? chih ka kidong zel hi. Hiai bangte ka ngaihtuah chiangin hun paisa leh tutan in Pathian tungah vuina ding, phunna ding leh complain ding khat lel leng ka mukei hi. Huaisangin, Toupa bangziaka na hon vualzawl chih ka dotna ahi zaw hi. Heutupa T. Pumkhothang la phuah “Aw itna thukpen, aw itna sang pen” chih in a gen kha mahmah. Pathian itna thupi hina tel e!

 

Pathian vualzawlnate i sim chiangin vualzawlna hiai a nuai a bang i tang zel uhi:

(i)     Jesu Khrist a lungkimna (Contentment)

Khelhna khovel a lungkimna taktak a vang a, pianken a neih theih chi leng ahikei hi. Khat veivei, sepna hoihtak, sum hau ding, inn lianpi nei ding, zi leh pasal hoihtak nei ding, pil leh laisiam ding chihte ah lungkimna om ding i sa kha zel uhi. Himahleh, sunggil a kipahna, lungkimna hiaite’n apia theikei ahi. Paul in lungkimna thuguk hichiin ana gen hi.

 

Taksap jiaka hichibang thugen ka hi kei a: bang chi bangin om mahleng, huai a lungkim a omdan ka thei kheta hi. Jawndan ka siama, hauhsakdan leng ka siam: thil chih leh thil tengtenga gilvah leh gilkiala om theihna leh niang leh tasama om theihna thuguk ka thei kheta hi. Amah hon hihhatpa ah thil tengteng ka hih thei hi (Phil 4:11-13).

 

Apostle Paul in Khrist a lungkimna a zil theihleh nang leh ken leng i zil khia thei uhi. Khrist a lungkimna dingin tuh Pathian apan vualzawlna i tante sim a kipahthugen gige ding ahi. Puritan thugen siam, Jeremiah Burroughs in, “Niteng a Pathian hehpihna leh vualzawlnate ngaihtuah a, A min phat a hun zang dingin a hon lamen, Pathian min phatna ding a ziak tampi na nei uhi” chiin ana gen hi. Pathian in hon veng a, i poimohte hon pia a, i khelhnate hon ngaidam a, hon thunun a, a thu hon sinsak a, i tungah zahngai a, Khrist a migitnate hon musak gige hi. Bang ziaka Pathian kianga kipaklou leh lungkim lou ding i hi ua? A van khua leh tui hihna hon tangsak a, a gouluahte, a tanu-tapate hihna dingin Khrist ah hon hondam hi.

 

(ii)  Khelhna tunga vualzohna khangsak

Pathian’ vualzawlna tampite ziaka atung ah i kipah chiangin khelhna tunga vualzohna hon lunggulh sak hi. Pathian tunga i kipah chiangin Amah deihlouh dante hih utlouhna chi (seed) ei ah kituh hi. Pathian vualzawlnate i sim chiangin Pathian leh a vualzawlnate (khalam leh salam) manphatna (value) kimuhsuah zel ahi.

 

(iii)       Khat leh khat kihanthawnna hon tun

Haksak hun in Pathian’ vualzawlnate sim lehang kipahna hon pia ding a huai in midangte a dia hanthawnna tun zel hi. Haksatna, lungkhamna neilou chihna hikei mahleh gingtute’n hiai bang hun haksa a i kipahna leh lungkimna hinkhua ki experience thei hi.

 

(iv)  Gingloute kianga Pathian theihpihtu hihna hon tun

Gingtute’n Pathian’ vualzawlnate sim in kipahthu i haksak hun in (complain i bawl sang un) gen lehang i kim leh kiang a ginglou omte’n i Pathian’ hehpihna hau, itna Pathian ahi chih theih ding ua, nna thupitak sem kihimai ding hi. Pathian a kipahthu i gen chiangin Pathian hotdamna nasep leh a hehpihna thu tangkoupih kihi ahihna ah mi tampi’n i Pathian hing hon muhloh thei ding uhi. Huai ahihkeileh kuaman vualzawlna a tante uh a theithei kei ding, Pathian avualzawltu atheih masak louh chiang un (Jacob 1:17).

 

Thukhitna

Huaiziakin, a selam ngaihtuah topsan in, phunna leh complain na di zong lou in, Pathian in Khrist tungtawn a khalam leh salam a hon vualzawlnate sim in, thei in, kipahthugen gige dingin i kichial hi. Phetlou in, Pathian kianga kipahthugen ding tampi i ba ua, i gen seng kei zomah ding uhi. Paul in tawp lou in kipahthu gen gige un a chih bang in gen gige ni (Phil 4: 4; I Thess 5:16,18), i hinkhua a hil hoihlou banga i ngaihtuahte ah leng Pathian in thil hoih tum ahi chih theikawm in. Huan, Pathian itna (love) thei leh kipahna (gratitude) thugen tuh lungtang damna ahi. Pathian’ vualzawlnate sim thakthak a kipahthugen tuh lungsim kisiate a dia damna ahi. “Aw TOUPA kiang ah kipahthu hilh un; amah tuh a hoih ngal a: a chitna leng khantawn in a om ding ahi ngala. Aw, mihingte'n TOUPA a chitna jiak leh, mihing tate tunga a thillamdang hihte jiakin phat himhim le u aw! (Sam 107:1, 8, 15, 21, 31).”

 

 Kapsuanmung