“Khen lou
hial ding, huaite tengtengah, hon itna ziakin, vualtungtuangte sanga tungtuang zaw
i hi uhi” (Romte 8:37).
Sawltak Paul in
Romte 8: 1-2 ah, Khrist Jesu a omte a dingin, siamlouh tansak himhim a omkei a,
Khrist Jesu Kha dan in khelhna leh sihna dan apan hon suaktasakta chi in Rome khua
a gingtute kiangah agen hi. Gingtute tuh Pathian tate, agouluahte, Abba! Pa i
chi theita uhi achi hi. Vv. 18-25 kikal ah, haksatnate, thilsiam tengteng
leh mihingte’n khelhna ziaka haksatnate apan suahta a thupisak a omna ding
ngaklah a mau uh chiin ahilh hi. Vv. 26-28 ah, gingtute’n lungkhamna leh
haksatnate ziaka thum theilou, thumna sunga thu om dite (prayer contents) theilou
a om chiang ua, Kha Siangthou in gingtute puakgikte Amah puakgik banga ngai in
ahon puakpih a Pa Pathian deihdan in honna thumsak zel hi achi hi. Huan, vv. 29-30
ah, thugin giltak gingtute hotdamna toh kisai, thupisak a omna ding thu agen a,
vv. 31-39 kikal ah, Pathian’ hehpihna leh itna ziaka gingtute Khrist a hotdamtate
hotdamna bitdan, bangmah in Jesu Khrist a om Pathian itna apan hon khenkhia
theilou ding ahihdan uangtakin agen suk hi. Khrist a om Pathian itna in―gimthuakna,
lungngaihna, sawina, kialna, vuaktanna, lauhuaina, temsaute in ahon khenkhia thei
ding hiam? chiin in dotna amah leh amah a kidong hi. A dawnna amahmah in v. 37 ah
apia hi―“Khen lou hial ding, huaite
tengteng ah hon itna ziakin, vualtungtuangte
sanga tungtuang zaw i hi uhi” achi hi. A dawnna hihkipna dingin vv. 38-39
ah a dawnna a sunzom a―“Sihna hiam, hinna hiam,
angelte’n hiam, lalnate hiam, thil omlelte hiam, thil hong om dingte hiam, thil
hihtheihna hiam, sanna hiam, thukna hiam, thilsiam dangte himhim hiam in leng,
i Toupa Khrist Jesu a om Pathian itna akipan, honkhen theikei ding chih
diktakin ka thei ngala” achi hi. I Toupa hon itna thupi hina tel e.
Tang
37 a thumal vual poimoh mahmah “vualtungtuangte sanga tungtuang zaw” ahihleh
Greek thumal “hyperniko” ahi. Romte 8:37 ah “hyernikomen” akizanga, “Hyper”―khenlam
(beyond), “niko”―vualzou (victorious/victory), leh “men”―eite (we–1st personal plural) ahi.
Alehkhiakna, gingtute tuh Khrist a om Pathian itna ziaka vualzohna khenlam omte,
dinmun sangtak neite, Paul in a tunga agente tengteng zousa, phetlou a huaite khenlam
a vualzoute kihilai chihna ahi. Huaiziakin, gingtute tuh vualzohna pellam a
dinmun neite i hi uhi. Huan, gingtute’n Jesu Khrist experience―gimthuakna, vualzohna, leh hihthupinate i koppih ding uhi.
A sihna, a gimthuaknate thuakpih a, sihna apan vualzou a thohnawn bangin i
thounawn ding ua, vangam a Pathian taklam atut banga Pathian gouluahtute i hi
uhi.
Huan, khelhna khovel a teng lai i hihman un gingtute’n gimthuaknate/hihgentheihnate―nasepna, school/college, lawmte lakah, saptuam a kizatna ah i tuak ding ua, lungkhamna leh lungngaihnate lam tuamtuam abikin i inn sung mahmah ah i tuak ding uhi. Kuamah kianga gen ngamlouh inn sunga ei ut thu leng hilou a thiltung, i deihthu a control theih hilou i tuak ding uhi. Taksalam kia hilou in khalam leh emotional lam ah leng hihgentheihna i tuak ding uhi. Huaiziakin, khat veivei chiangin kingaihsiatna, Pathian kiangah dotna tampi i dot hun a om ding hi. I thumnate dawn a omlou abat hun, itna mulou kisak hun, kuamah ittu, kemtu leh khamuantu neilou i kisak hun a om ding hi. I nasepte ah, lohsam hileh kilawm abat hun, midangte gensiat leh huatna i tuah hun aom dinga, huan, nei zoulou i kisak hun a om ding hi. Hiaite banah mimal a i tuah tampi a om lai ding hi. Himahleh, Paul in Rome khua a gingtute kianga laikhak, tua i tang pansan mahmah apan i muhtheih ahihleh Jesu Khrist a om Pathian itna ziaka hiai bang a haksatna i tuahte khenlam pek a vualzou i hih chih i mangngilh louh ding un ka deih hi. Hiai banga haksatnate tuak a lungkham mangbang a om, kuamah kianga genngam lou i hihleh―Jesu Khrist in hiaite tengteng Cross a nang leh kei a dinga azohsa ahita, huaiziakin, Khrist ziaka midangte sanga vualzou or vualtungtuang zaw ka chih lungput nei dingin ka hon chial hi. Huan, gingtute’n vualzohna lungput i neih ding mah uh ahi, banah Pathian i lungkham hun a i naih ngeingei a, i kimakaihsak ding ahi. Jesu’n, “Nou semgim leh puakgik po tengteng aw, ka kiangah hongpai unla, keimah khawlna konpe ding” (Matt 11:28) chi a hon chialna mangngilhlou a, Amah kiang zuan a i puakgikte uh a kianga i ngak ding ahi. Huan, Paul ngei in gimthuakna a tuahte denchianga thupina amuh ding toh a teh chiangin bangmah in a simkei hi (v. 18). Hiai bang chithei a i puakgikte Jesu kianga nga thei dingin Toupa’n hon vualzawl chiat hen aw.
Gelhtu
Mr. Kapsuanmung
youngreformed@2022
0 Comments