Jesu
Kingaihniamna Nasep Apan Sinlai
Amah [Jesu] tuh Pathian banga om hinapiin, Pathian toh kikim a om
tuh thil khiaklah dingin a sep kei a, himahleh amah tuh a hong kihih awngthawl a,
sikha bangin a hong om a, mihing banga bawl in a hong om a; Huchiin mihing mel
a honpu a, hong kihihneu in, si ding hial in leng thu bang a hon manga, ahi, Cross
a sihna nangawn (Phil 2:6-8).
Mikhialte
hondam dingin Jesu Khrist leitung ah eite bangin mihingsa hong suak hi. Hiai
toh kisai Paul in Philippi saptuamte kianga laikhak Philippi 2:6-8 a, “kihih-awngthawl”
(empty, kenosis theory) pansan in i kikum ding hi. Mi khenkhat in, Jesu
Khrist in a Pathian hihna bangzah hiamte koihkhia in hong kihih-awngthawl a chi
uhi. Hiai lehkhiakdan a dikkei deuh hi, aziak tuh Jesu a Pathian hihna a neusak
(lesser God) suak dinga, za-a-za Pathian
hilou chihna hi ding hi.
Jesu Khrist kihih-awngthawlna
tuh a Kingaihniamna
Jesu
Khrist kihih-awngthawl (kenosis) in agen
ahihleh Khrist tuh amah leh amah hong kihih-awngthawl a, van mun a hamphatnate
(privileges)―thupinate (glories), mangtutphah tunga lalnate (throne) koihkhia in bangmah lou in hong
kibawl in suak (servant) bang mai in
hongpai hi. Cross ah sihna tan dongin hong thumang hi. Jesu a Pathian hihna
neusak ahihkeileh bei chihna (ceased)
ahikei, himahleh Pa Pathian leh Kha Siangthou thunuai a kingainiam a kipelut a,
hong thumang ahi zaw hi. Tanchinhoih John ah, Pa in hon piakte kia ahi ka sep,
Pa deihlam kia ahi ka hih chiin Jesu’n agen hi (John 5:19). Pa thunuai a
kitahlut a total obedience a taklang hi.
Huaiziakin, Jesu Khrist tuh za-a-za Pathian, za-a-za mihing hihna a beituan kei
hi. A Pathian hihnate (attributes) a
koihkhia chihna ahikei hi. Jesu kingaihniamna (humility) genna ahipen hi. Theih dinga poimoh khat ahihleh Jesu
Khrist mihing hihna lam gen in phakchiang nei―huai ahihleh mun tengah ataksa a
omkei hi. Gentehna in, Galili gam a
ataksa a omlai in ataksa India gam ah a omkei a (om leh za-a-za mihing ahithei kei
ding), himahleh, a Pathian hihna lam ah mun tengah om in, thilteng athei hi (omniscience and omnipresent). Pathian
leh mihing hihnate aneituak hi.
Nang
leh kei hotdamna dingin Jesu Khrist Pathian goihgoih in Pathian mission sembuching dinga van mun hamphatnate―thupinate,
nopsaknate nusia a leitunga hongpai ngaihtuah lehang thupi luatel hi. Thupi
luatel ahihman in, Pathian mission
sembuching dinga Jesu Khrist hong kihihneu ziakin Pathian in amah ahihlianta a,
min tengteng lak ah min tungnungpen apeta hi (vv.9-10).
Jesu Khrist kihih-awngthawlna
Apan sinlai―Kingainiam a Pathian Mission Sepna
Jesu
koihkhiak hamphatnate thupi sakna kia hun lou in, nang-le-ke’n bang ahia a hon
notsiatte (John 13:1-17, “nungzuite khe silhsakna”) apan zilkhiak theih ding, bang
hamphatnate i taisan ngam a chih kidot tuak kasa mahmah hi. I nopsakna munte (comfort zone) i taisan ngam diam? I nopsakna mun apan Pathian na sep sawm i
hi hia? Comfort zone paikhiaksan ding thil haksapi ahi. Haksa mahleh ngiat in i om uhi.
Jesu nungzuihna maw aman tam eive. Pathian tapa tang neihsun Jesu hinna man
tawm liailou ahi. Huaiziakin, i hinna nangawn ahon sukling chiang kia in lohchinna
om thei pan hi.
Huan,
Genesis 12:1-3 a, “Abraham sapna” i etleh a tenna gam, tanaute, leh a pa inn apan
gam atheih ngeilouh apai dingin sap in a om hi. Abraham in akhelah mahmah ding
chih theihsa ahi. Himahleh, Pathian thu mangin a nopsakna mun paikhiaksan ngam
in Pathian thuchiam bangin vualzawl pawtu ahong suak hi. Jesu kihih-awngthawlna
leh kingaihniamna ziakin Pathian mission
sepbuching a om in, phetlou in amah tuh hihthupi in a om hi. Jesu kingainiam kia
ahihkei a, akingaihniam kawmkawm in Pathian mission
a sembuching a nang leh kei hotdam in i om uhi. Toupa phat in om hen! Huan, mikhialte
toh awmkhawm a (Matt 11:19), a nungzuite kiangah om gige a, phetlou in, mipite
lakah pai in damloute, khebaite, sipotte, zengte dinmun velchian in athei mahmah
in ahihdam hi (Matt 8:23-28; 15:30-31; Luke 19:1-10). Mipi 5000 ngasa leh
tanghou in a vak hi (Matt 14:13-21). Jesu nasep dan i etleh mipite toh kithuah
in a dinmun uh a theichian mahmah hi. Huai kia hilou in apoimohte uh a pelai
hi. Khalam damlouhna kia hi damlou in, taksa lam ah leng avak hi. Jesu nasep
tuh kum zabi 1 na a thiltung himahleh tunitan in khalam leh salam dangtakte hondam
in apanpih lai a, maban ah leng ahih zel ding hi. Huan, mikhialte khalam kia hondam
in a paisan maikei a, salam panpihna nasep leng a sem hi. Lauhuaina mun ah leng
a nungzuite a ompih hi (Matt 8:23-28).
Hiai
apan sinlai lak ding gingtute’n i nei uhi. Kingaihniamna toh midangte khalam
hotdamna ding sialsaktu kia hilou in salam panpihna nasep leng i neih ngeingei
ding ahi. Salam panpihna ka chih khatvei kia nasep ahikei, sep gige dinga
thupiak thil ahi. Tulai in Pathian thu siam taktak in i gen ua ahoih kipahhuai
hi. Himahleh, i hinkhua ah kingainiamna toh i thugente a taka sepsuahna muh
ding vang mahmah hi. Leitung gou, neih-le-lamte buaipih louh ding, bangmah
ahikei, vangam hon tunlou ding, lei a tui ekte’n a neksiat lel ding ahi chi a thu
gengente leitung neih-le-lam ngai poimoh pen a nei, neih-le-lam kaikhawm tampente
akihidaih zel hi. Banah, hehpihna leh itna gengente’n hehpihna leh itna neilou
pente i hi zel uhi. Huan, 2 Kumpipate 4: 1-7 a, zawlnei Elisha in meithai
chimoh mangbang bat neih ziaka leibasaktu in a tate nih suak-le-sal a pii ding
lai, abat piaksakna dingin sathau bel ahih dimsak hi. Pathian nasepna, Khrist
nungzuihna mantam ahi, chimoh mangbangte leibat piaksakna, panpihna ahi. Hiai
bang nasep tuh kha miitna ahi. Jakob in,” I Pathian
leh Pa mitmuh a sabiak siangthou leh gilou pang lou jaw hiai ahi, tagah leh
meithaite gimthuak lai a veh leh, khovel buahna bang lou a kibawl zel” chiin ana
gen hi (Jakob 1:27).
Huan,
midangte dinmun theichianlou, midangte taksap leh poimohte theihpihlou,
midangte toh kithuahlou a ei muhna tan lel a Pathian thu hang santaka gengen lehang
mi dinmun i thugen toh kituakloute a di’n phatuamna a neikei ding hi. A tunga i
gen Jesu Khrist tuh mikhialte toh nekhawm, dawn khawm in a kithuah a, nungzuite
toh akithuah a, midangte haksatnat a theihpih in huchiin panpihna nasep a sem
hi. Tuni in i thugen Pathian in hatzaw sem a zat ding i deih leh Jesu Khrist
hihdan i zuih apoimoh hi. I saptuamte, i tuailaipihte, dinmun a i kikoih chiangin
a haksaknate uh, a lungkhamnate uh i theichian pan dinga, huchiin amaute
poimohte thei in Pathian thugen lehang effective
tuan mahmah ding ahi. I dinmun a kikhiak luat chiangin i thugen nek haksa ahi. Car
mantam taktak a tai in panpihna tellou a Pathianni chianga suang sek a nektawm
zongte kianga thugen in amaute a dingin phattuamna aneikei ding hi. A
phatthuampih theihna ding un, amaute dinmun theihpih a, houlimpih a, a
haksatnate uh theihpih a kingaihniamna toh panpihna nasem in Pathian thu hing genpih
lehang amaute lungtang tawng dek kha theipan ding hi. Hiaite khong ahi i nopsakna
munte pel a kingaihniamna toh Pathian nasepna.
Huaiziakin,
Jesu Khrist in vanmun a thupina leh hamphatnate khelah lou a eite tan dinga
hongpai a, mikhialte toh dinmun thei a hong omkhawm bangin kuapeuh in Pathian
nasem dingin i comfort zone uh paikhiaksan a midangte toh
kithuah a, ahaksatnate theihsiampih in Pathian in vualzawlna hon piakte zangin kingaihniamna
toh panpihna nasep sem dingin i kichial uhi. I sum-le-paite, i hun, i tha-le-zungte,
khovel nopsakna lungputte potkhiaksan in Pathian nasepna di’n zang ni. Hiai
banga Jesu etton anei in zuih dinga hon sinsak a khekhapte zui lehang Pathian
vualzawlna leng i tang ding uhi.
Gelhtu,
Kapsuanmung
0 Comments