NGAIHDAM THEIHLOUH “KHELHNA”

“Kha Siangthou hiilhial gensia bel ngaihdam ahi ngeikei diing, taangtawn khelhna a khial ahih jiak in,” achi hi. Marka 3:29 (Paite- CL)

THUPATNA

Khristian hinkhua ah ‘Pathian in khelhna himhim ngaihdam zohlouh a neikei (1 Johan 1:9-10)’ chih i thupi leh i thugin ahi chileng i khial kei ding hi. Himahleh, Laisiangthou a Thukhun-Thak i sim suksuk chiangin akiseel, thupoimoh mahmah khat, “NGAIHDAM THEIHLOUH KHELHNA” chih muhtheih in ana kigelh hi. Hiai Pathian’ thu bel mun thum ah muh theih in a oma (Matthai 12:31; Marka 3:29; Luka 12:10), mi tampite lunghimoh sak leh patau guih sak mahmah hi inleng a gintaak huai hi.

Huaiziakin, hiai khelhna toh kisai saulou in hiai dan in i suut khawm ding-

1. A omzia,

2. Bangchi khelhkhak leh

3. Gingtute i khial kha diam?

1) A OMZIA

Laisiangthou in bang gen hiam i chih leh, “…Pathian a gensiatna chiteng uah ngaihdam ahi diing ua, himahleh Kha Siangthou gensia tuh ngaihdam ahi kei diing hi. (Matthai 12:31)” achi hi.

Hiai Laisiangthoua thumal “gensia/gensiatna” tuh Greek pau thumal chinih gawmkhom “blapto+faymay” a kipan laak khiat ahi a, pau tuamtuam a lehkhiak in a om a, English in “blaspheme/blasphemy” chih ahi a, Paite pau in “gensia/gensiatna” chiin i na let uhi.

Hiai Greek thumal khatna “blapto” khiatna bel- liamsak (injure), nasak (hurt) leh poisak (harm) chih ahi a, a thumal nihna “faymay” khiatna ahihleh- minthangsak (fame), thutak hilou (rumor) leh pulaak (report) chih ahi hi.

Gensiatna a omzia tuh “liamna, natna leh apoi tunthei a kampau” chih ahi. Huai mah bang in, Kha Siangthou gensiatna tuh “Kha Siangthou leh anasepna poisakthei/liamsak/nasakthei a kampau” chih ahi hi.

2. BANGCHI KHELHKHAK

Laisiangthou in hiai khelhna a gen khak jiak thilkhat ana om hi. Huai bel, Toupa Jesu Khrist in mi khat dawi mat, mittaw leh pautheilou akianga hihdam diinga atonpih uh ana hihdam hi. Huai mit a muten lamdang sa in, Toupa Jesu Khrist ah lametna liantak ahon neih chiang un, alangpang Pharisaite’n dawite ukpi khat, Beelzebul thuneihna a adamsak ahi anachih sak uhi.

“Dawite lal, Beelzebul jiak lel in ahi hiai mi in dawite ahawl khiak” Matthai 12:24

Hiai banga Toupa Jesu Khrist nasep mit a mu ngoihngoih hiala om hinapi in, Laisiangthou siam leh sahkhua a makai, Pharisaite thugen in Pathian nasep bangmahlou asuahsak dek hi.

Hiai mun ah ahi Toupa Jesu Khrist in “Ngaihdam theihlouh khelhna” ahon puankhiak pat.

Pharisaite’n Kha Siangthou nasep mit a mu nazeenpi a zuau leh naan a alep chiang un Toupa Jesu Khrist lungtang dawtkha mahmah hi. A lungtangte uh khauh leh gaw mahmah (kisiikna himhim tellou) ahi chih amuh phet in Toupa Jesu Khrist in aheem in hiai mite vauna leh mohpaihna pia in “Kha Siangthou gensia tuh ngaihdam ahi kei diing hi.” (Matthai 12:31) ana chihkhum ekmai hi.

3. GINGTUTE IKHIAL KHA DIAM?

Hiai khelhna ah gingtute i bit mahmah uh chileng i chi khial lawmlawm kei diing hi. Bang ziak in?

Hiai khelhna tuh Pathian gingta nuamlou, thudik pom nuamlou, kisiik nuamloute tantuam khelhna ahi. Pharisaite banga lungtang kisathei, Pathian Tapa Jesu Khrist mit a mu zeenpi a mulou kineihte khelhna ahi zaw hi.

Ei gingtute’n Toupa Jesu Khrist tuh salam mit in mukei mahleng, Kha Siangthou nasep tungtawn in Ginna ah i mu zaw uhi.

THUKHUPNA

Gingtu i hihna ah hiai bang Laisiangthou thute’n hon buaisak theih aleh kipaak ni. Na ginna ah mi chitak hih na lung-gulh ahi chih akilang hi. Pathian lungtuah louh khaak diing lauthei gingtute’n hiai bang khelhna ahih ngeikei diing uhi, tupmawng in hia ahihlouh leh tupmawng louh inleng. Ajiak bel, Kha Siangthou in amah leh amah aki gensesak himhim kei diing a, baan ah, a misiangthoute ngei leeng thudik lampi ah api zeel diing hi.

“Thutak Kha ahong tun chiang in, thutak tengteng ah nou ahon piilut diing” Johan 16:13

Gelhtu,

Lianunsang Baite