PATHIAN NEUTE I HI UHIAM?
(Are we little gods?)
“pathiante na hi ua, na vek un
Tungnungpen tate na hi ua, ka chi hi. Himahleh, mihingte bang phet in na hong
si ding ua, mi lian khat bang in na hong puk ding uhi”
(Sam 82:6-7).
“Jesu’n a kiang uah, Na Dan
laibu uah, pathiante na hi uh, ka chi, chih gelh ahi ka hia?” (Johan 10:34).
Gingtute lak ah theihkhelh baihsam mahmah “Khristiante pathian neute i hi uhiam?” (Are we little gods?) chih thupi kikum khawm lehang chi’n ka hon tel hi. Sam 82 leh Johan 10:34 a kigelh thugen minthang tamtak abik in tulai a “Christian Mega Church” worship a minthang mahmah―Elevation, Bethel, Hillsong leh a dangdangte’n apaipih khat uh ahi. Ngaihtuahna a hong om tuh Genesis 1:26 a kigelh, amah batpih a siam hive hang pathiante kihi lou ding hiam, chih ahi.
Huaiziak in, eite pathian neute kihi mah hia chih Lai Siangthou pansan in enkhawm le’ng i chi hi.
Kuate’n hiai sinsakna apaipih ua?
Roman Catholic-te’n mihingte tuh pathian hihna (divinization) nei chi’n a sinsak uhi. Genesis 1:27 a kigen bang in mihingte “kha” (soul) kia nei a bawl ahikei ua, khovel leh thilsiamte tung a vaihawmna leh thuneihna nei a bawl ahi. Huaiziak in, khalam ah (Spiritual class) Pathian toh kibatna mihingte’n kinei ahi. Amah batpih a siam mihingte i hih ziak un chi a gingta in a sinsak uhi (The Catechism of the Catholic Church, Second Edition, Section 2, Chapter 2, Article 3, Paragraph I, I:460).
Tulai a TV leh social media platform tuamtuam a prosperity
thugen minthang Joel Osteen, Kenneth Copeland, Benny Hinn, Joyce Meyer, and
Steven Furtick te’n Pathian kiang a ginna toh thil i nget chiang in i thumnate
a dawnlouh theihlouh ahi chi’n gen uhi (He is compelled or bound to fill the
request that we ask in faith). Pathian neute i hih ziak un i thu ngette in
tha (power) nei mahmah a chi uhi. Prosperity theory nasatak in paipih ua
a gen tangpi uh ahihleh “na gen peuh na mu ding” (name-it-claim-it) leh “Pathian
na neih leh na hausa ding a na damthei ding” (health and wealth gospel)
chihte gen tangpi in a nei uhi.
Pathian neute chih thumal hilhchetna
Pathian neute thumal tuh Johan 10 leh Sam 82 ah muhtheih hi. Pau bul Hebrew apan i etleh Pathian min Elohim ahi. Exodus 22:8-9 ah Elohim thumal mah leng vaihawmte (judges) genna in a kizang hi.
Lai Siangthou ah pathian neute (little gods) chih
thuvual mihingte genna in a kizang vang mahmah hi. Himahleh, Exodus 7:1 ah
Pathian in Mosi kiang ah, “Pharaoh lak ah Pathian bang in ka hon bawlta” a chi
hi. Bang genna ahia? Mosi Pathian chihna ahi diam? Mosi tuh Pathian chihna ahikei, himahleh, Israel mipite mai a Pathian
sik a ding ding leh Pathian sawltak chihna ahi. Huan, Elohim thumal tuh
Exodus 21:6 mah ah vaihawmtu genna in a kizang hi.
Khristiante pathian neute kihi taktak mah ahi diam?
A tunga i gensa bang in, pathian neute thumal in mihingte
leh gingtute tengteng genna hilou ahi chih i theihchet masak poimoh kasa hi. Johan
10:34 ah, Jesu’n “pathiante na hi uh” chih thumal a zang hi. Thunkhun Lui a Sam
82na apan a laksawn ahi. Jesu leh Judate kihouna uh a Messiah na hi hiam hong
kipuangkhia inla chiantak in honghilh in chi a agenna uh ahi. Jesu’n a kiang
uah, “Kon hilhta hi, na gingta kei uh….Kei leh Pa lah pumkhat ka hi uh,”
chi’n a dawng hi (Johan 10:24-30). Judate’n Pathian gensia chi’n suang la in den
a sawm uhi. Hiai hun in, Jesu’n, “Na Dan laibu uah, pathiante na hi uh, ka
chi, chih gelh ahi kei hia? Pathian thu tunnate bawn pathiante a chih leh,
Pathian Tapa ka hi, ka chih ziak in, Pa in a seh a khovel a a sawlpa kiang ah,
Pathian na gensia, na chi uh ahi maw? Ka Pa nasem ka hih keileh, hon gingta kei
un” (10:34-35) chi’n a dawng hi. Jesu’n khovel a dikloutak a vaihawmte
nasan pathian chi a saptheihna a dinmun ziak ua piak ahihleh kei a tapa bang
ziaka Pathian chih a om lou ding ka hia achihna ahi.
Ahihleh, Jesu’n pathiante (little gods) na hi
uh a chih bang genna ahi ding.
i)
Hiai a
pathiante a chih tuh vaihawmna toh Pathian sik a (representative) om mite
agenna ahi.
ii) Mihing tunga vaihawmte (Judges, magistrates and rulers) Pathian phalsak a vaihawm mite ahi uhi.
Huaiziak in, a din mun uh ziak in zahna piak, a hih ua
amau tuh a mite a ding in kampau a i na zatsek uh ‘pathian tuk a ngaih uh’ i chih
bang ahi uhi. I theih ding “tehkakpih nei” (metaphor) kampau ahi. Jesu’n
Johan 10:34 a mitengteng a genna ahikei, himahleh, a vaihawm dan uh Pathian’
dan toh a kituah ding, a ziak ahihleh sithei ahi ua, vaihawm khum a om ding ziak
un chih agen zaw hi.
Awle, hiai Lai Siangthou bung leh chang pansan a Khristian-te hih pathian neute (little gods) chi a thutawp bawl i kei hi. Pathian batpih a bawl himah lehang pathian neute a hon bawl chihna ahikei hi. Himahleh, vaihawm theihna, thilsiamte lak ah tungtuanna nei a hon bawlte i hi uhi. Gingtu i hih ziak ua pathian neute i hi chihna ahikei, a tapa a tanute i hi zaw uhi (1 Kor 6:18).
Huan, Pathian hing sanga i ngaih thupi zawkte, Amah sanga
ei mah kingaihpoimoh zawkna [taksa pianken hihna hilou, ei ut ziaka numei or
pasal a kibawl tawmna (transgender)], mite tunga lal kisak biknate leh Pathian
zahlouhna gamtatte in eimah leh eimah pathiante a kibawl hon suaksak a, hiai
tuh milim biakna ahi. Pathian neute i hi kei ua, i hi ngeikei ding uhi. Pathian
taktak chih theih mihing apan piangkhete laka om sun―Jesu Khrist ahi (Johan
1:14), adang kuamah aphu khat lel leng a om kei hi. Bang ahia Pathian’ batpih a
bawl/siam chih omzia a nawn chiang in chiangtak in i enkhawm ding uhi.
Simtute Toupa’n hon vualzawl chiat ta hen aw!
Gelhtu,
Mr. Lamkhanlian
youngreformed@2024
0 Comments